प्रेरितुल्कुना कबाह्क
लुकल रासता इंकुंदि पुस्तकोमता परिचयम
1
1 नावा पावरमगल्ला तियपिलुसa, नना मोदाटा पुस्तकोमते सुरुवनाल येसु बतल-बतल कीतोर आनि बतल-बतल करहतोर अदुना बारेमते रासतन. 2 अचोने आयका येसु पेर्कुत्ता प्रेरितुल्कुंकb पवित्र आत्मा हेंदाल आदेस हीसि, मर्रा स्वर्गमते तिरियसि होनानदाका पूरा पिसवरता बारेमते नना रासतन. 3 येसु हासोंचि तिरियसि तेदतस्के, “नना पिस्सि मंतन,” इंचि प्रेरितुल्कुंक गट्टिगा रुजुवु कीसि हूपिस्तोर. ओर नल्पै रोजकुनदाका ओर्क दिसेके आनि पेंदा राज्येम बारेमते वेहासेक मत्तोर. 4 उंदि मल्का ओरतोनि कलियसि मन्नेंके येसु ओर्कुन, “येरूसलेम सहर होळसिसि होनमट. नावा पेन बाबाल हीता पोल्ले बारेमते नना मीकु मुन्नेन वेहचि मत्तन, अद पूरा आयानदाका एदुर हूळसेक मंटु. 5 बारित्ते, योहान एतोनि बापतिस्मा हीतोर, गानि मीवा बापतिस्मा कोन्नि रोजकुंक पवित्र आत्माता हेंदाल आयार,” इंचि इत्तोर.पेन येसुन जीवाते मनेंकेने स्वर्गमते ओता
6 पजा अंटोर प्रेरितुल्क उंदि जेगाते जमा आतुर. अस्के येसुन, “सामि, निमे इदे वेलाते इस्राएल देसेमता लोकुल्कुंक ओरा राज्येम मर्रा हींतिना?” इंचि पूसकीतुर.
7 अस्के येसु ओर्कुन, “अद सिराप पेनबाबांके तारीक आनि टाइमता निरनायम एतना अदिकारम मंता. दान एरपाट कियमड मीवा कबळ आयो. 8 गानि पवित्र आत्मा मीवापोर्रो वातस्के मिमेट येरूसलेम सहर, पूरा यहुदिया एरिया, सामरिया एरिया आनि बूमिता आकिरदाका नावा गवाइ आयना मीकु ताकत बलम वायार,” इंचि इत्तोर.
9 येसु इल्हा इत्ता पजा ओर हूळसेके मननेंकेन ओन स्वर्गमते तेहाचि ओयमड़ जर्गुता. ओर्क दिसाकोंटा उंदि मब्बु तेर्पे अड्डम वासि ओन मुच्चुता. 10 ओर पोर्रोड्कु तेदिस होननेंके अगा मत्ता प्रेरितुल्क मब्बुनहेके उंदेतीर हूळसेके मत्तुर. अस्केने इव्वुर तेल्ला कपडीं केरतोर ओरगा वासि नितुतुर आनि, 11 “गालिलि लोकुल्कुनिटा, मिमेट इल्हा नितिसी मब्बुनहेके उंदेतीर बारि हूळसेके मंतिर? येसुन मीवागटाल स्वर्गमते तेहकुंचि ओयमड़ जर्गुता गदा! अय्ते बल्हा मिमेट ओन स्वर्गमते होननेंके हूळतिरो, अल्हेने ओर मर्रा तिरियसि वांतोर,” इंचि इत्तुर.
प्रेरितुल्क यहुदियाना जेगाते इंकावरोन मनकन निलाहतुर
12 पजा प्रेरितुल्क जैतुन मराकुना गुट्टातगाटाल नोमकेम रोजुनचो लक्कु मत्ता येरूसलेम सहरते मल्सि वातुर.c 13 ओर अगा वासि, बद मिद्देते मनुंदुरो अदे मिद्देता पोर्रोटा अर्राते होत्तुर. अगा पत्रु, योहान, याकोब, अंद्रियाल, पिलिप, तोमाल, बर्तलमय, मत्ती, अल्पिना मर्रि याकोब, सिमोन (जिलोतिd) आनि याकोबुना मर्रि यहुदल ईर मत्तुर. 14 ईरतोनि इच्चुंग मुरताह्कु, येसुना यावल मरियल आनि ओना तम्मुह्क ओर अंटोर उंदे मनसुने पारतना कीसेके मनुंदुर.
15 उंदि रोजु नूटा इरवै (१२०) विस्वासि दादालोरा नड्डुम पत्रु नित्तिसि, 16 “नावा दादालोर्कुनिटा! दर्मसास्त्रमते रासि मत्ता पोल्ले दाविद राजाल मुन्नेने पवित्र आत्मातेंदाल इंचि मत्तोर, अद इंदके यहुदाना हेंदाल पूरा आता. ई यहुदाले येसुन पियानोर्कुंक मुन्ने अर्तोर. 17 यहुदल मना लोप्पोटोरे वरोर मत्तोर, मनातोनि कलियसि सेवा कियालय आसर आतोर,” इंचि इत्तोर.
18 (येसुन हव्कानोर्कुंक अपाजेपसि ओरा हेंदाल कोत्तां एतता पजो, अव कोत्ताने यहुदल उंदि बूमि अस्तोर. अदे बूमिते बोक्बोरलें अर्ताहेंका पीर पय्सि ओनां पूरा पोदुह्कंता पलाते पेस्तां. 19 इदु येरूसलेम सहरते मत्तोर्कुंक अंटोर्कु तेळियता. दानहाटीं ओरा बासाते आ नेदुन हकलदामा, इत्ते ‘नेत्तुटा नेलि’ e इल्हा पोर्रोल अर्ता.)
20 पत्रु इंका इल्हा इत्तोर, “अदुनहेंके बजन संहिताते इल्हा रासि मंता गदा,
ओना लोन पाडासि दांता
अवुने मनालय वरोर इंका पिसोर.
ओना पेद्दातनम,
इंका वरोंक दांता.f
21-22 दानहाटीं येसु सामि बच्चुं रोजकु मनातोनि कलियसि होंचेके-वासेके मत्तोरो, इत्ते योहानुना बापतिस्मातगाटाल अय्ते येसुन मना नड्डुमताल स्वर्गमते तेहाचि ओयनदाका बोरय्ते मनातोनि मनुंदुर अंटेताले वरोन पेरते बेस मनंता. आनि ओर, येसु हासि मर्रा तेदुतद मनातोनि गवाइ हियमड़ गावाले,” इंचि इत्तोर.
23 दानहाटीं इव्वुर मनकलोर्कुन मुन्ने तत्तुर. अव्टेटाल वरोर योसेप, ईनु बरसब्बा इनुंदुर, इंका ईनु यूसतुस इंचिगुडा एरपाट कियुंदुर. आनि इंका वरोर मत्तिया. 24-25 अस्के प्रेरितुल्क पारतनाते, “सामि! निमे अंटोरा मनसुन एरपाट किंतिन, यहुदल अय्ते ओन्कु हीता कबऴतुन होळसिसी ओर होनना जेगाते होत्तोर. गानि निमे ईर इव्वुरा लोप्पोटाल प्रेरित इंचि नीवा सेवा कियालय बोन पेर्कुत्तिन माकु हूप्सा,” इंचि तल्कतुर. 26 अस्के ओर ओराहाटीं सिट्टिं वाटतुर आनि सिट्टि मत्तियाना पोर्रोलते पेस्ता. अस्के पदाकोंडु मंदि प्रेरितुल्कुने आ मत्तियालगुडा कलियतोर.