सामरिया राज्येमता मुरतळ येसुंक कलियता
4
1 येसु योहानुंकन्ना एक्को मंदिक बापतिस्मा हीसंतोर, योहानुंकन्ना एक्को मंदितुन ओना सिस्युल्क कीसंतोर, इंचि परिसिल्कुंक तेळियता. 2 (निजम हूळते, येसु कुद्दु बापतिस्मा हियाकोंदुर, ओना सिस्युल्क बापतिस्मा हियुंदुर.) 3 इद पोल्ले सामिंक तेळियतस्के ओर यहुदिया राज्येमतुन होळसि, मर्रा गालिल राज्येम होनालय पेय्सतोर. 4 गानि इंदके ओन्क सामरियाa इनना राज्येमताल होनापीता.5 इल्हा येसु सामरिया राज्येमते मनना सुकर इनना नाटे एवतोर. ई सुकर नार, एनकटा यहुदिल्कुना मातिर दादल याकोब ओना मर्रि योसेपुंक हीता जेगाक दग्गेरे मत्ता. 6 अगा याकोबुना कुहि मत्ता. वेल्लेन लक्कुनाल ताकसि वाताहेंका नेरबळसि येसु, आ कुहिता पक्काते उद्तोर. अस्केळक पिय्यल आसि मत्ता. 7-8 अस्के तिननाहाटीं बतलन्ना तर्रालय येसुना सिस्युल्क नाटेंक होंचि मत्तुर. अदे वेलाते उंदि सामरि मुरतळb एतुक वाता. अय्ते येसु, “उनालय नाकु इच्चो एर हीम,” इंचि अद मुरतटुन तल्कतोर.
9 अस्के अद मुरतळ, “निमे यहुदि जातितोन आसिगुडा, उंदि सामरि जातिता मुरतटुन, उनालय एर हीम, इंचेके बल्हा तल्कसंतिन?” इंचि इत्ता. (अद अल्हा बारि इत्ता इत्ते, यहुदि लोकुल्क सामरि लोकुल्कुनतोनि बदे संबंदम इर्रकोंदुर.) 10 अस्के येसु, “ओक्कला निमे गिंटा, पेनदा वरमतुन आनि उनालय एर हीम, इंचि नीकुन तल्कानोर बोर आंदुरो, एरपाट कीसि मत्ते, निमेने कुद्दु नाकुन एर तल्किस मन्नेन आनि नना नीकु पिसवर हियना एर हीसि मन्नेन,” इंचि इत्तोर. 11 अस्के आ मुरतळ, “कुहि अय्ते वेल्लेन लोतु मंता सर, इंका निहगा एर तोरालय बाल्टिगुडा हिल्ले. इसोंटस्के ई पिसवर हियना एर नीकु बल्हा दोर्कार? 12 माकु ई कुहि मावा मातिर दादल याकोब हीतोर. ई कुहिता एर ओर कुद्दु उनुंदुर, इंका ओना मर्क, एटीं, गोळ्कु-गोदां उनुंदुं. अय्ते निमे ओनकन्ना पेद्दोना?” इंचि पूसकीता. 13 अय्ते येसु, “ई एतुन उनना हरेक मनकंक मर्रा तप्पाकोंटा दूपांता. 14 गानि नना हियना एतुन बोरय्ते उंटोरो, ओन्क मर्रा बस्केने दूपायो. नना हीता एर ओना लोप्पो बस्केळ्क ऊरसेके मनना ऊटालेसिं मारियसि, ओन्क बस्केळ्क पिसना पिसवरतुन हिय्यार,” इंचि जवाब हीतोर. 15 अय्ते अद मुरतळ, “अल्हा अय्ते अद एर नाकु हीम सर! अद एतुन नना उट्टुनित्ते नाकु बस्केन दूपा आयो आनि नाकु मर्रा बस्केन एर ओयालय इच्चोर लक्कु वायना अव्सरमगुडा मन्नो,” इंचि इत्ता. 16 अस्के येसु दान, “होन, होंचि नीवा मुय्दोन केयसि तरा होन,” इंचि इत्तोर. 17 अस्के अद, “नाकु मुय्दो हिल्लोर,” इंचि इत्तस्के येसु, “निमे निजमे वेहतिन! नीकु मुय्दो हिल्लोर,” इंचि इत्तोर. 18 पजा येसु, “अद बल्हा इत्ते, नीकु हेय्युर मुय्दुर मत्तुर, निमे इंदके बोनतोनि अय्ते मंचंतिनो ओरगुडा नीवा मुय्दो आयोर. अदुनहाटीं निमे मत्तद मत्ताप वेहतिन,” इंचि इत्तोर. 19 अस्के अद मुरतळ, “सर, नीवा पोल्लें केंजसि नाकय्ते, निमे पेनदा कबुरतोन आंदिन इंचि नाकु तेळियता. 20 मावा एनकटा पेद्दाल्क इदे गुट्टापोर्रो मोळ्कुंदुर. गानि मिमेट बारे, मोळकना असल जेगा येरुसलेमे आंदु इंतिर,” इंचि अद मुरतळ येसुन इत्ता.
21 अस्के येसु दान्क इल्हा वेहतोर: “बाई नाकुन नम्मा! पेनबाबांक मोळकनाहाटीं इद गुट्टातगा हिलाकोंटे येरुसलेम सहर होनना अव्सरम हिल्ले, मिमेट बगानना मोळ्का परंतिट. इसोंटा वेला मुन्ने वासेक मंता. 22 मिमेट सामरिया राज्येमतोर मीकु तेळियवादान मोळकंतिर. गानि मोमोट यहुदिल्क अय्ते माकु तेळियतदुने मोळकंतोम, बारित्ते मुक्ति यहुदिल्कुनाहेंदाले वासेक मंता. 23 गानि पेनदुन निजम मोळकानोर पेनदा सत्तेमतुन एरपाट कीसि ओर पेनदा आत्माते मोळकना वेला मुन्ने वासेक मंता. आनि अद वेला एव्से मंतां. बारित्ते इल्हा मोळकानोर्कुने पेन मेच्कुंता. 24 पेन आत्मा रूपमते मंता. अदुनहाटीं दान मोळकानोर अंटोरगुडा आत्माते, सत्तेमते मोळकना,” इंचि वेहतोर.
25 पजा अद मुरतळ, “किरिस्तु इनना मेसय्याल वासेक मंतोर इंचि नाकु एरपाटे. ओर वातस्के माकु अंटोर्क अन्नि पोल्लें वेहानुर,” इंचि येसुन इत्ता. 26 अस्के, “नितोनि वळ्कानोन, ननाने ओन आंदुन,” इंचि येसु इत्तोर.
27 अच्चोटेने अगा ओना सिस्युल्क वातुर. येसु उंदि मुरतळतोनि वळकानद हूळसि ओर्क वेल्ले इचंत्रम आता. अय्नागानि बोरे ओन, “नीकु बतल गावाले? दानतोनि निमे बारि वळ्कसंतिन?” इंचिगुडा इना हिल्लुर.
28 अस्के अद मुरतळ अळ्कातुन अग्गेन होळसि नाटे होत्ता, होंचि लोकुल्कुंक वेहता. 29 होंचि, “इदवेरादाका नना कीतव अन्निना बारेमते वरोर मनकल वेहतोर. ओरे किरिस्तु बारे, मिमेट वासि हूळट!” इंचि नाटेनोर्कुन इत्ता. 30 अस्के नाटेनोर नाटुन होळसि येसु मत्ता जेगातगा वातुर.
31 अद मुरतळ नाटे होत्तस्के, सिस्युल्क, “गिचचो तिन रब्बी!” इंचि येसुन विनंति कीतुर. 32 गानि येसु, “नहगा तिनालय इसंटा तिंडि मंता गदा, अद तिंडिता बारेमते मीकु बतले तेळियो,” इंचि सिस्युल्कुन इत्तोर. 33 अस्के सिस्युल्क, “गुरुनाहाटीं बोरन्ना तिनालय बतलन्ना तत्तुरा?” इंचि ओरद-ओरे वळ्ककुनालय दल्गतुर.
34 अस्के येसु ओर्क इल्हा वेहतोर: “नाकुन लोहतोना इच्चा मत्ताप ताकमळ आनि ओर वेहता कबाह्कुन पूरा कियमळ, इदे नावा तिंडि आंद. 35 वंजीं वीतता पजा, इंका नालूं नेल्क अय्ते वंजी कोताक वांता, इंचि मिमेट इंतिर. गानि नना वेहनद केंजट, कळ्क विच्चि पोलमतेके बेस हूळट, पंटा कोताक वासि मंता. 36 पंटा कोयानोंक बूति दोर्कंता, आनि बस्केळ्क पिसना पिसवरताहाटीं जमा कीसेक मंतोर. दीनहेंदाल वीततोर आनि कोय्यानोर इव्वुरगुडा कुसिते कलियसि मना परांतुर. 37 वीतंतोर वरोर, कोय्यंतोर इंका वरोर, इनना वेसुड इग्गे बरोबर आंता. 38 बोरो वेरेतोर कस्टपळसि पंडिस्ता पंटातुन कोय्यालय नना मीकुन लोहतन. मिमेट कस्टपळा हिल्लिर, गानि ओर कीता कस्टमता पायदा मीकु दोर्कसंता,” इंचि येसु वेहतोर.
39 “नना कीतव अन्निना बारेमते वरोर मनकल नाकु वेहतोर,” इंचि वेहता, आ मुरतटा गवाइतुन केंजसि, अद नाटेना वेल्लेन मंदि सामरि लोकुल्क, येसुनपोर्रो विस्वासम इरतुर. 40 सामरि लोकुल्क येसुनगा वासि, “निमे महगा मन्नु,” इंचि विनंति कीताहेंके, येसु रोंड रोजकु अगा आगतोर. 41 येसु कराहता पोल्लें केंजसि इंका वेल्लेन लोकुल्क ओन नमतुर. 42 “सिराप निमे वेहतेंकेन मोमोट येसुन नम्मा हिल्लोम. इंदके कुद्दु मोमोटे ओना पोल्ले केंजसि, दुनियातोर्कुन पिसागोटना निजम किरिस्तु ईरे आंदुर इंचि मोमोट विस्वासम कीतोम,” इंचि आ लोकुल्क मुरतटुन इत्तुर.
सायाबुना मर्रिन येसु बेस कींतोर
43 रोंड रोजकु आतंका, येसु अगटाल गालिल राज्येमते होत्तोर. 44 (पेनदा कबुरतोन्कु ओना सतता देसेमते कदर दोर्को, इंचेके येसु मुन्नेने वेहाचि मत्तोर). 45 दाटसि होनना पंडुगुनाहाटीं गालिल राज्येमता लोकुल्कगुडा येरुसलेम होंचि मत्तुर. अगा येसु कीतव अन्नि कबाह्कुन ओर हूळतुर. अदुनहाटीं येसु गालिल राज्येमते वातस्के ओर अंटोर येसुन बेस दग्गेरे कीकुत्तुर.
46 बद नाटे अय्ते येसु एतुन अंगुर पानकम कीतोर, अदे काना नाटे ओर मर्रा होत्तोर. गालिल राज्येमता कपरनाहुम इनना नाटे, राजाना हिळु कबळ कियानोर वरोर सायाब मत्तोर, ओना मर्रि बीमार अरसि मत्तोर. 47 अय्ते यहुदिया राज्येमताल गालिल राज्येमते येसु वातोर इंचि ओन्क कबुर तेळियताहेंका ओर येसुंक कलियालय होत्तोर. होंचि येसुना काल्कुन पोर्रो अरसि, “नावा मर्रि इरगा बीमार आसि हायनाल आसि मंतोर, निमे ओन बेस कियालय नातोनि ताका,” इंचि विनंति कीतोर. 48 अस्के येसु, “अद्बूतामाता कबाह्क आनि इचंत्रम आयना चिन्हें हूळवद मिमेट नम्मनोर आयिर!” इंचि ओन इत्तोर.
49 आ सायाबु, “ना मर्रि हायका मुन्नेन निमे ताका,” इंचि विनंति इत्तोर. 50 अस्के, “नीवा मर्रि पिसंतोर, निमे होन,” इंचि येसु ओन इत्तस्के, ओना पोल्लेतुन नम्मिसि ओर तिरियसि होत्तोर. 51 ओर हर्रि पीसि होंचेकेन मत्तोर, नड्डुम हरदेने ओना जीतागाह्कु कलियसि, “सायाबु, नीवा मर्रि बेस आतोर,” इंचि वेहातुर. 52 अस्के “नावा मर्रि बद वेलाक बेस आतोर?” इंचि ओर्कुन पूसकीतोर. “निन्ने पिय्यल उंद एगनेंके ओना एळ्कि रेय्ता सायाबु!” इंचि ओर वेहतुर.