योहान 5

बेतसेदा सेरवुना ओड्‍डुंक मत्‍ता हेय्युं गुडसें

1 पजा येसु यहुदिल्कुना उंदि पंडुगुनाहाटीं येरुसलेम सहर होत्‍तोर. 2 येरुसलेम सहरते गोर्रे दरबाजा इनना जेगातगा उंदि सेरवु मंता, दान इब्रानि बासाते बेतसेदा इंचि इंतुर. आ सेरवुना ओड्‍डुंक हेय्यूं गुडसें वाटसि मत्‍तां. 3-4 बदो उंदि वेलाते पेनदा दूता वासि अद एतुन लोपुंदु, अल्हा लोपतस्के, अद एते बोर मनकल अय्ते मुन्‍ने होळियंतोरो ओर मनकल ओना बसोंटा बीमार अय्ना बेस आयुंदु. अदुनहाटीं पेनदा दूता एतुन बस्के लोपार इंचि एदुर हूळसेके गुड्‍डोर्कु, गूनोर्क, कुंटोर्क, लकवा बीमारतोर इल्हा वेल्‍लेन मंदि आ गुडसेने जेगा पीसि मनुंदुर. 5 अगा मत्‍तोरव्टे मुप्पै एनिमिदि वर्सानाल बीमार मत्‍ता वरोर मनकल मत्‍तोर. 6 ओर अगा मींडसि मत्‍तद येसु हूळतोर. हूळसि ओर वेल्‍लेन वर्सानाल कुक्‍कि पीसि मत्‍तद एरपाट कीसि ओनगा होत्‍तोर. होंचि ओन, “नीकु बीमारताल बेस आयानद मंतना?” इंचि पूसकीतोर.

7 अस्के आ मनकल, “नाकु बेस आयगोम इंचि मंता सर! गानि बतल कीकन? एतुन लोपतस्के नाकुन आ एतगा ओयालय नहगा बोरे हिल्‍लुर. एतुन लोपतस्के मेल्‍लगा-मेल्‍लगा नना होननदाका बोरन्‍ना वरोर नाकन्‍ना मुन्‍नेन होळियंतोर,” इंचि वेहतोर.

8 अस्के येसु ओन, “अय्ते तेदा! तेदसि नीवा कटुल पीसि ताकसेक होन,” इंचि इत्‍तोर. 9 येसु ओन अल्हा इत्‍ता इन्‍मळे आ मनकल बेस आतोर. आसि, ओना कटुल पीसि ताकसेक होत्‍तोर. इद गटना यहुदिल्कुना नोमकेम रोजुननाड जर्गता.

10 अदुनहाटीं बीमारताल बेस आता मनकन, “नोमकेम रोजुने निमे इल्हा कटुल तेहचि ताकमळ मावा दर्मसास्त्रम परकारम न्यायम आयो,” इंचि यहुदि पेद्‍दाल्क इत्‍तुर.

11 जवाबुने आ मनकल, “नाकुन बेस कीतोरे, नाकुन नीवा कटुल पीसि ताकसि होन इत्‍तोर,” इंचि वेहतोर. 12 अस्के “नीकुन कटुल पीसि ताका इंचि वेहतोर, ओर बोर आंदुर?” इंचि यहुदि पेद्‍दाल्क ओन पूसकीतुर. 13 गानि ओन बेस कीतोर बोर आंदुर इंचि, आ बेस आता मनकंक तेळियो. बारित्‍ते अगा वेल्‍लेन मंदि मत्‍तुर आनि येसुगुडा अगटाल पेय्सि होत्‍तोर.

14 इदंता आतंका येसु आ मनकंक गुळिते कलियसि, “हूळा, निमे इंदके बेस आतिन! मर्रा पापि कबाह्कुना जोलिक होन्‍मा. होत्‍तिनित्‍ते दीनकन्‍ना एक्‍को बीमार अर्रंतिन,” इंचि वेहतोर. 15 पजा आ मनकल यहुदिल्कुना पेद्‍दाल्कुंक कलियसि, “नाकुन बीमारताल बेस कीतोर, येसु आंदुर,” इंचि वेहतोर.

16 येसु इसोंटा कबाह्क नोमकेम रोजुननाड कीतोर इंचि यहुदि पेद्‍दाल्क येसुन तकलिप कियालय दल्‍गतुर. 17 अस्के येसु ओर्कुन, “ना बाबाल बस्केळ्क कबळ कीसेकेने मनंतोर. अदुनहाटीं ननागुडा कबळ कीसेकेने मनंतन,” इंचि इत्‍तोर. 18 येसु इल्हा इत्‍ताहेंका यहुदि पेद्‍दाल्क ओन हव्कालय उंदे पट्‍टु पीतुर. बारित्‍ते नोमकेम रोजुने कबळ कियानायो इत्‍ता नियमतुन ओर हेळाह्तोर. आनि पोर्रोटाल, पेनदुन “ना बाबाल,” इंचि वेहचि “नना पेनदुक समानमतोन” इंचि ओनद ओरे वेहकुत्‍तोर.

येसुनगा पेनदा अदिकारम मंता

19 अस्के येसु ओर्क इल्हा वेहतोर: “नना मीकु निजम-निजम वेहचंतन, मर्रि ओनद-ओर बतले किय्योर. गानि बाबो बतल-बतल अय्ते कींतोर, बाबो कियनदुन हूळसि मर्रि अल्हेन कींतोर. 20 मर्रिनपोर्रो बाबोंक वेल्‍लेन पावरम मंता, अदुनहाटीं ओर कियनव अन्‍नि कबाह्कुन ओना मर्रिंक हूपिच्‍चंतोर. वायना रोजकुने इवुंकन्‍ना पेद्‍दा-पेद्‍दा कबाह्क कीसि मर्रिंक हुप्‍सना मंता. अस्के मिमेट हूळसि अंटोर इचंत्रम आकिर. 21 बल्हा अय्ते बाबो हातोर्कुन मर्रा जीवाते तेहंतोरो, अल्हेन मर्रिगुडा ओन्क इस्‍टमातोर्कुन मर्रा जीवाते तेहंतोर. 22-23 बाबोनद अंटोर कदर कींतुर. अल्हेने मर्रिना कदरगुडा अंटोर लोकुल्क कियना इंचि बाबाल बोनदे न्यायम कियाकोंटा, न्यायम कियना पूरा अदिकारम मर्रिंक हीतोर. मर्रिना कदर बोर किय्युरो, ओर मर्रिन लोहचीता बाबाना कदरगुडा किय्युर. 24 नना निजम-निजम वेहासेक, बोरय्ते नना वेहना पोल्‍लेन केंजसि नाकुन लोहतोना पोर्रो विस्वासम इर्रंतोर, ओन्क बस्केळ्क पिस्सना पिसवर दोर्कंता. पेन ओन्क सिक्‍साता आदेस हिय्यो, ओर हामुरताल पेय्सि पिसवरतुन संपादिंच्‍कुंतोर. 25 नना निजम-निजम वेहासेक, हासोत्‍तोरगुडा पेनदा मर्रिना अल्किर केंजना वेला वासेक मंता. अद अय्ते वासे मंता. बोरय्ते अद अल्किरतुन केंजांतुर, ओर्क पिसवर दोर्कार. 26 बल्हा अय्ते पेन बाबाल कुद्‍दु जीवाता मालक आंदुर, अल्हेन मर्रिनगुडा जीवाता मालक कीतोर. 27 इच्‍चोन आयाका, पेन बाबाना मर्रि मनकना रूपमते पुटताहाटीं ओन्क लोकुल्कुना न्यायम कियना अदिकारम हीतोर. 28 मिमेट इदुन केंजसि इचंत्रम आयमटु. बारित्‍ते मुन्‍ने इसोंटा वेला वायनद मंता गदा, हातोर अंटोर पेनदा मर्रिना अल्किर केंजानुर. 29 ओर पलाते वातस्के, बोरय्ते बेस पुन्‍नेम कबाह्क कीतुरो ओर्क बस्केळ्क पिसना पिसवर दोर्कार. आनि पापि कबाह्क कीतोर्कुंक बारे सिक्‍साता आदेस हियनुर. 30 नावद नना बतले किया परोन. पेन बाबान हेंदाल केंजतापे न्यायम कींतन. नना नावा इच्‍चातुन पूरा कियालय वाया हिल्‍लेन, नाकुन लोहचीता पेन बाबाना इच्‍चातुन पूरा कियालय वातन. अदुनहाटीं नना कियना न्यायम सत्‍तेम मंता.”

येसु गवाइ वेहांतोर

31 “नावा बारेमते ननाने गवाइ वेहकुत्‍ते, नावा गवाइक विलुवा मन्‍नो. 32 गानि नावा बारेमते गवाइ वेहालय इंका वरोर मंतोर. ओर वेहना गवाइ सत्‍तेम इंचि नाक एरपाट मंता. 33 मिमेट मीवा मनकलोर्कुन योहाननेके लोहतिर. ओर मीकु सत्‍तेमता गवाइ वेहतुर. 34 मीकु मुक्‍ति दोर्कगोम, इंचि इव पोल्‍लें नना मीकु वेहासेक मंतन अचोने. गानि नावा बारेमते लोकुल्कुना गवाइता अव्‍सरम नाकु हिल्‍ले. 35 योहान वेडसिलेह्का पोत्सि मीकु वेलगु हीतोर. आनि मीकुगुडा गडसेमताहाटीं आ वेलगुने कूस मनालय बेस अन्‍पिस्ता. 36 गानि योहानुना गवाइकन्‍ना पेद्‍दा गवाइ नहगा मंता. बारित्‍ते पूरा कियनाहाटीं पेन बाबाल नाकु हीता कबाह्क आनि नना कियना कबाह्क. इवे पेन बाबाल नाकुन लोहतोर इत्‍तादांकु गवाइ मंतां. 37 नाकुन लोहचीता पेन बाबाल कुद्‍दु नावा बारेमते गवाइ वेहतोर. गानि मिमेट बस्केने ओना अल्किर केंजा हिल्‍लिर, बस्केने ओना रूपमतुन हूळा हिल्‍लिर. 38 अचोने आयका ओर लोहतोना पोर्रो मिमेट विस्वासम इर्रुवाहेंका, ओर कराहता पोल्‍लें मीवा मनसुना लोप्पो मना परों. 39 बस्केळ्क पिसना पिसवर दर्मसास्त्रमहेंदाल दोर्कंता इंचि मिमेट अव्टे पह्कट, अदे दर्मसास्त्रम नावा बारेमते गवाइ वेहचंता. 40 अयना, बस्केळ्क पिसना पिसवरहाटीं मिमेट नहगा वायालय हूळिर. 41 नना मनकलोराहेंदाल कदर कोरोन. 42 बारित्‍ते मिमेट बसंटोर आंदिरो नाकु एरपाटे. मीवा लोप्पो पेनदाहाटीं पावरम हिल्‍ले. 43 नना नावा बाबाना पोर्रोल्ते वातन, गानि मिमेट नाकुन स्वीकार किया हिल्‍लिर. गानि बोरन्‍ना वेरेतोर, ओना पोर्रोल्ते ओरे वायानय्ते मिमेट ओन स्वीकार कींतिर. 44 मीवद मिमेटे कदर कीकुनमळ इत्‍ते मीकु वेल्‍लेन इस्‍टम. गानि पेनदाहेंदाल दोर्कना कदरतुन मात्रम बोरे पह्का हूळिर. असोंटस्के मिमेट ना पोर्रो बल्हा विस्वासम किया परांतिर? 45 बाबाना मुन्‍ने नना मी पोर्रो तप्पु दोसतन इंचि इनकुन्‍मट. मिमेट अय्ते मूसाना पोर्रो आसे पडसि मनंतिर, आ मूसाले मीवा पोर्रो तप्पु दोस्संतोर. 46 मिमेट गिंटा मूसान पोर्रो विस्वासम कियानय्ते, नावा पोर्रो इंका विस्वासम कींतिर, बारित्‍ते मूसाल नावा बारेमते रासतोर. 47 मूसाल रासता पोल्‍लेन पोर्रोगुडा मीवा विस्वासम हिल्‍ले अय्ते, नावा पोल्‍लेन मिमेट बल्हा नमकिर?” इंचि येसु इत्‍तोर.