Kuunēētēy :Yēēsu akipō kooyēr
10
1 Nēē mii pērēētuu aka, kung'eetee :Yēēsu yoonēē, kutil ēēmpō Choortan akuwō Kōōroo Chuuteeya. Kuurumchi keey :piich chaa chaang' yi mii :Yēēsu. Kuuneet :Yēēsu piich kilēē yoo kiicham kuunēētēy.2 Kupkoonchi *:Parisaayik walak Yēēsu choo kiimārēy kuutyam, akuteep kilē, “Chāmēy :ng'ātuutichooch kuutyaak :chiich cheepyooseenyiin?” 3 Kuwālchi :Yēēsu nkōō tēēpuut kilē, “Ng'ātuut nee :nyi kiimwoorwook *:Muusa?” 4 Kumwa :pichoochēē kilē, “Kiichāmchi *:Muusa saan kisir kartaasi nyoo tyookēē kooyēr siku-oon cheepyooseenyiin.” 5 Kumwoochi :Yēēsu kilē, “Kiisir *:Muusa ng'ātuutyooni āmu kiiwururiituuy :mukuuliiriikwook. 6 Paani kii-ir :Iriin ng'wēny, ku kii-ir murēn nkōō cheepyooso. 7 Āmu nyoonēē ku mētooy :murēnō apoonyiin nkōō eeyeenyiin, 8 akunam keey nkōō cheepyooseenyiin kilēku ākoong'o. Mēēlē nyuun tāku piich ārēēny, aku kiikulēku ākoong'o. 9 Kiyoo kaakuutuuyō :Iriin nyuun ku mēēpēēsyō :chiich.”
10 Paani keereer kupa kō, kuteepee :kiineetanichiich Yēēsu kumwoochi kiyoo ng'uutuuy :ng'ālyoontoonoonēē. 11 Kumwoochi :Yēēsu kilē, “Chiich nyoo keetyaak cheepyooseenyiin aku-āp cheepyoosee aka, ku kasiir karwa aku-irchi ng'ōōki cheepyoosooni keetyaak. 12 Aku nēē oon keey cheepyooso aku-āp keey nkōō chiich aka, ku kasiir karwa.”
Kuupēēruurēy :Yēēsu laakōōy choo mēnkēēchēēn
13 Kiimii :piich walak choo kiimuti laakōōy Yēēsu kilē kutiing'ēē ēēruunēchiich kuupēēruur. Kukar koong' :kiineetanik pichoochēē. 14 Kii nēē ro :Yēēsu kiyoo kii-irēy :kiineetanik, kinyala, akumwoochi kilē, “Akanya kupka laakōōk wōli āmii, amaakarta āmu piich choo lēē chu :choo pēētii Pāyuunātoo Kaa Iriin. 15 Āmwoorwook man kilē, chiich nyoo mātookēy pāyuunātoo Iriin kilēē wōloo lēē laakwa, ku māchuutēy Kaa Iriin.” 16 Nkōō yoonēē, kuurum :Yēēsu laakōōchoochēē, akutiing'ēē ēēruunēchiich kuupēēruur.
Wōloo /kinyōōruntooy sopoon nyēpō ākōy
17 Kitāsēy taay :Yēēsu nkōō paantanyiin, kuurip :chiich aka akukutung' nkōō taayuunyiin akuteepee kilē, “Koonēētiintooni karaam, a-ir nee soonyōōru *sopoon nyēpō ākōy?” 18 Kuwālchi :Yēēsu kilē, “Āmu nee sēēkuurēēnoon nyaa karaam? Moomii nyaa karaam, kung'ētu Iriin. 19 Inkēt :inyēēn ng'ātuut chēpō Iriin choo mwoorēy kilē, ‘Āmēērumiisyō, āmēēsiir karwa, āmēēchōōrsyō, āmēētoomchi chiich ng'al, āmēēng'oolsyō, ikoonyit apoong'uung' ākōō eeyēēng'uung'.’ ” 20 Kumwa :chiichoonēē kilē, “Koonēētiin, kyaatuup :aneen ng'ātuutēchoochēē tōkōl kung'eetee āchō naran.” 21 Kuuro :Yēēsu chiichoonēē nkōō choomnyoot akumwoochi kilē, “Mii :kir ākoong'o nyoo rartaaraat. Wiyō altee kir aka tōkōl nyoo iting'ēy akiitō mēēy, akiichōōn ituupaan. Inyōōru nyuun mōkōrnoonti nyēpō man nkōō kipsēnkwēt.”
22 Kii nēē teer :chiichoonēē ng'aleechoochēē kiimwoochinii :Yēēsu, kwootyō :mukulērtiinyiin akusung'a :tokoch kurayiit. Kuwēēchi keey nyoo nareekaat āmu kiiting'ēy mōkōrnoonti nyoo māting' /keemwa.
23 Kumararta :Yēēsu komoosik tōkōl akumwoochi kiineetanichiich kilē, “Kōrōōm kitya nkōō piich choo lēē mōkōrō kupa Pāyuunātoo Kaa Iriin.” 24 Kikwōng'yō :kiineetanik nkōō ng'aleechoochēē pō Yēēsu. Kitas taay :Yēēsu kumwoochi kilē, “Piichuuch, kōrōōm keepa Pāyuunātoo Kaa Iriin. 25 Nyumnyum nkōō :tamas kuchuut koong'pō siintaanu kusiir kuchuut :mōkōryoon Pāyuunātoo Kaa Iriin.” 26 Kikwōng'yō :kiineetanik nyēpō kwōng'uut akilē, “Ara ng'oo, nyuun, :nyoo muukēy /kēēsāru?” 27 Kuuro :Yēēsu kiineetanichiich akilē, “Mēēmuukēē nkōō wōloo mii :chiich, aku mā nkōō wōloo mii :Iriin, āmu muukēē :kir aka tōkōl nkōō wōloo mii :Iriin.”
Kir nyoo nyōōruuy :piich choo katuup Yēēsu
28 Kimwoochi :Pēētērō Yēēsu kilē, “Kiikēēmētēēchaan tukun tōkōl akeetuupiin.” 29 Kuwālchi :Yēēsu kilē, “Man āmwoorwook kilē moomii :chiich nyoo kāmētō koonyiin, wēēriing'waang', chēētang'waang', eeyeenyiin, apoonyiin, laakōōchiich ntā ku pareenyiin akipō aneen ākōō lōkōōy choo kāroomēēn, 30 nyoo /mākuu-ōōchinii tukuuchoochēē nkōō pērēētuusyēchu kunyil pōkōl choo ting'ēy, /ku-usēy nkōō kōōrooni aku nyōōruuy nyuun *sopoon nyēpō ākōy nkōō kōōrēē nyoo chōōnēy. 31 Wōloo nyuun chēpō taay kilēkuuy chēpō lēt, ku chēpō lēt kilēkuuy chēpō taay.”
Nyēpō sōmōk kung'āloolēē :Yēēsu meereenyiin ākōō ng'ēētyēēnyiin
32 Kiintoroor :Yēēsu paani kiimii kupēētii Chēērusālēēm ākōō kiineetanichiich. Kikwōng' :kiineetanik akuuwāriisyō :piich walak choo kiimii kutuupēy Yēēsu. Kwoop :Yēēsu kiineetanichiich taman nkōō ārēēny kamas akumwoochi kiyoo kiiwō kii-irēē nkōō wōloo mii inyeentee, 33 kilēēchi, “Ateertee kee! Kumii kēēpēētii ākōy Chēērusālēēm, wōloo kipa /kēēnāmēē *Wēēroo Chiich /ākēētē *tisiik choo ēēchēēn ākōō koonēēt chēpō ng'ātuut choo tilchinii kiirwok /keekeet. /Kinamēy, /ākēētē piich chēpō Rooma, 34 choo muulēy, akung'uti, akupir, akupar. Aku nēē mii pērēētuu nyēpō sōmōk, kung'eetee meerat.”
Nyoo ōōw mu pāyuunātoo Iriin
35 Nēē mii yoonēē, kupēēchi :Chowaana ākōō Chēēmis wēēchiipō Sēpētaayo Yēēsu akilēēchi, “Koonēētiin, kumārēy kēēsoomin i-irweech kir.” 36 Kuteepee :Yēēsu kilē, “Āmārēy a-irwaak nee?” 37 Kuwālchi :wēēchoochēē kilē, “Chāmwēēch kutēpō :akoong'o nkōō achaan ēēruung'uung' pō taay, kutēpō :aka ēēruung'uung' pō lēt pērēētuuni ipāytooy.” 38 Kilēēchi :Yēēsu, “Moonkēt kiyoo āsoomēy. Āmuukēy aree :akwaan kikoompaa nyaril nyoo ārēēy :aneen? Ntā āmuukēy apuntēērō *kaapaatiisana nyēpō ng'woonin nyoo apuntēērēē?” 39 Kuwālchi kilē, “Kiimuukēy.” Kilēēchi :Yēēsu, “Anyōōruukwaan nyāriluut choo ānyōōruuy :aneen, ākoopuntēērēē *kaapaatiisana nyēpō ng'woonin kilēē aneen. 40 Mpō ntā lēē nyoonēē ku mooting'ēy kaamuuka ālēwēn kilē ng'oo nyoo tēpēē ēēruunyuun pō taay ntā ku lēt, wōloo nyuun pō pārooyinoonēē piich choo /kiikēēchēpchi.”
41 Kii nēē teer :kiineetanik chuuchō walak lēē taman kiyoo kiimārēy :Chēēmis ākōō Chowaana, kunyāliisyō akipō akwaaneek.
42 Kukuur :Yēēsu kiineetanik tōkōl akumwoochi kilē, “Ānkēt :akwaan kilē mārēy :pāytooy choo mii kōōrooni kung'uuti keey piich kilē akwaaneek choo pāytooy akuting'ēy kaamuuka kusiir chiich aka tōkōl. 43 Mēērookēē nyuun ālēkuu choochēē. Nyoo mārēy kilēku nyoo ōōw nkōō akwaan kilēku kipāyityoon. 44 Ku nyoo mārēy kilēku nyēpō taay, ku mārēy kilēku ōōtwookiintoo piich tōkōl. 45 Kilēē yi kiimaachō *Wēēroo Chiich /kēēpāyiisyēēchi, aku kiichō kupāyiisyō akuutētō sopoontanyiin sikuutyaayta :piich chaa chaang'.”
Kuusoopēy :Yēēsu Partimaayo mu Chēērikō
46 Nēē mii yoonēē, ku-it :Yēēsu ākōō kiineetanichiich Chēērikō. Paani kiimii kupēērēē yoonēē, kutuup piich chaa chaang'. Kiimii :soomiin nyoo kii kipkoroot aree kamas kusoomsēy. /Kiikikuurēē chiichoonēē Partimaayo wēēroo Timaayo. 47 Paani kateer :chiichoonēē kilē kii Yēēsu nyēpō Naasareet :nyi kiimii kusiirtooy, kukuur nkōō kuut nyoo ōōw kilē, “Yēēsu, *Wēēroo Tāwuti, riireenaan.” 48 Kukar koong' :piich chaa chaang' kusiis. Wōloo nyuun kitas taay kukuur nkōō kuut nyoo ōōw kilē, “*Wēēroo Tāwuti, riireenaan.” 49 Kuuryoong' :Yēēsu akumwoochi piich kilē, “Āmwoochii kuchō yi.” /Kēēkuur chiichoonēē kii koroot /ākēēmwoochi kilē, “Paypayiituu akiiryoong'! Kuuriin :Yēēsu.” 50 Kii nēē teer kilēē nyoonēē, kung'eet kilē weel akuwiirchi siree nyoo kiitukēē keey kamas /ākēērēētō ku-it yoo kiimii :Yēēsu. 51 Kuteepee :Yēēsu kilē, “Imārēy a-iruun nee?” Kuwālchi :chiichoonēē kii koroot kilē, “Koonēētiin, āmārēy amararta.” 52 Kumwoochi :Yēēsu kilē, “Wēēchii keey, kaakuusoopin kaaraneeng'uung'.” Paani kamwa :Yēēsu kilēē nyoonēē, kimararta akutuup Yēēsu.