Kuwāsēy :puuni wōloo pārtooy Yēēsu
Mataayo 26:1-5; Maarkō 14:1-2
22
1 Kiikiikuriiku /kee-am tuum nyoo /kyoomēy makatyaan nyoo maakuutu. /Kikuurēē mpō tuumi *Pasaka. 2 Kiimii kuwāsēy *:tisiik choo ēēchēēn ākōō koonēēt chēpō ng'ātuut wōloo pārtooy Yēēsu aku nyuun kiiwārēy :akwaaneek wōloo muukēy ku-āptō :piich.Ku-āltooy :Chuutaas Yēēsu
Mataayo 26:14-16; Maarkō 14:10-11
3 Kichōōnchi nyuun *:Syeetaani Chuutaas Iskaryōōt nyoo kii ākoong'o nyēpō kiineetanik taman nkōō ārēēny. 4 Kuwō wōloo kiimii *:tisiik choo ēēchēēn ākōō piich walak choo kii ēēchō choo kiiriipēy *Kōpō Iriin kupa kung'alaala wōloo muuktooy kuchoomchi pichoochēē Yēēsu. 5 Kiipāypāychi :pichoochēē Chuutaas akucham kuutē rōōpiyō nēē ir kilēē nyoonēē. 6 Kucham :Chuutaas akutoowu kuwas porooyin nyoo āltēērēē Yēēsu paani moomii :piich.
/Kēēchēpēy āmiisyō nyēpō Pasaka
Mataayo 26:17-19; Maarkō 14:12-16
7 Ku-it :pērēētuu nyēpō tuum pō makatyaan nyoo maakuutu nyoo /kiikuyēēng'ēē mākool choo /kiikyoomēy nkōō pērēētuu *Pasaka.
8 Kumwoochi :Yēēsu Pēētērō nkōō Chowaana kilē, “Apee kee āchēpwēēch āmiisyoo *Pasaka sipakee-ama.” 9 Kuteep :akwaaneek Yēēsu kilē, “Imārēy pākēēchēpēē ānō?” 10 Kuwālchi :Yēēsu kilē, “Apee, nēē a-it Chēērusālēēm, ātuuyēērēē chiich nyoo āpēē pēr kisaapan. Atuup chiichoonēē ākōy koot nyi kachuut. 11 Āmwoochi chiitaa kata kilē, ‘Kālē :koonēētiintēē: Mii ānō kōpō too nyoo ā-āmēē tuum pō *Pasaka ākōō kiineetanichuuch?’ 12 Ng'uutwook :chiichoonēē koot aka nyēpō parak nyoo /kiikēēchēp. Āchēpwēēch āmiisyō nkōō yoonēē.”
13 Kipa :kiineetanichoochēē lēē ārēēny akupa kunyōōru tukun tōkōl kilēē wōloo kāmwoochiintō :Yēēsu, akichēp āmiisyō nyēpō *Pasaka.
Toowunoo āmiisyoo lēt nyēpō Kiptaayaan
14 Paani ka-it :saayitiis choo /kiikyoomēē tuumoonēē pō *Pasaka, kutēpi ng'wēny :kāāyooytooyik ākōō Yēēsu ārii ākoong'o. 15 Kumwoochi :Yēēsu kiineetanichoochēē kilē, “Kiikyaamar :aneen kulōōwiit kilē sikee-ama tōkōl āmiisyō nyēpō *Pasaka kitoomō anyaril. 16 Āmwoorwook kilē moo-āmēy āmiisyō nyēpō *Pasaka nyoo lēē nyi kuureer ākōy nyi siltaaraat mu kaa Iriin.” 17 Kunam nyuun :Yēēsu kikoompa nyoo kiimii *:tiipaay, kii nēē kaakumwoochi Iriin kōōnkēy kilēēchi kiineetanichiich, “Aree tiipaayiichu mii kikoompooni akwaan tōkōl. 18 Ākoomwoorwook man kilē king'eetee aniinee kitas taay moorēēy *tiipaay ākōy pērēētuuni chōōnēy :Pāyuunātoo kaa Iriin.”
Kiiyaat :Yēēsu tuum nyoo rēēl
19 Nēē mii lētuun, kunam :Yēēsu makatyaan, aku nēē mii paani kaakumwoochi Iriin kōōnkēy kupuutil akuutē kiineetanichiich, akilē, “Nyi ku pōōrtanyuun nyoo /kiitētooy akipō akwaan. A-ama saapkaateenaan.” 20 Paani kaakuuwaang' ku-āmiisyēy, kunam :Yēēsu kikoompee nyoo kimii *:tiipaay akilē, “Miis :nyi nyoo rēēl nyoo punuunēē :kērētiichuuch choo /kitārtooy akipō akwaan.”
King'ōōrēy :Yēēsu kilē /ku-āltooy inyeentee
21 Kumwoochi :Yēēsu kiineetanik kilē, “Mii kēē-āmiisyēy nkōō inyeentee nyoo wēētii ku-āltooyoon. 22 Mēērēy *:Wēēroo Chiich kilēē paani /kiikēēchēp. Aku rāyiituuy nyuun kitya nkōō chiich nyoo āltooy.” 23 Kitoowu kuteep keey :kiineetanik kilē, “Ara ng'oo nkōō achaan nyoo āltooy Yēēsu?”
Nyoo ōōw mu pāyuunātoo Iriin
Mataayo 20:25-28; Maarkō 10:42-45
24 Kuureer kutoowu :kiineetanik kumooyō kilē ng'oo nkōō akwaaneek nyoo tōrōōr. 25 Kumwoochi :Yēēsu kilē, “Mārēy :pāytooy chēpō kōōrooni kung'uuti keey piich kilē akwaaneek choo pāytooy piich akukuurō keey, ‘choorwoo chiitōkōl.’ 26 Mēērookēē nyuun ālēkuu choochēē. Nyoo ōōw nkōō akwaan ku-āp keey ng'wēny, ku nyoo mārēy kilēku kāāntōōyiin, kupāyiisyēēchi piich walak. 27 Ng'oo :nyoo ōōw nkōō chiich nyoo āmiisyēy ākōō nyoo mii kupāyiisyēy? Chiich nyoo ōōw nkōō pichoochēē ku chiich nyoo mii ku-āmiisyēy. Nku āmii nkōō akwaan kilēē kipāyityoontēēng'woong'.”
28 Kitas taay :Yēēsu kumwoochi kilē, “Akwaan chu kyootēpi nkōō aneen kung'eetee ānyōōru kootyāmuut. 29 Kulēē paani kiikukōōnān :Paapeenyuun kaamuuka apayta, ā-iraa :mpō kilēē nyoonēē nkōō wōloo āmii :akwaan. 30 Kutēpiisōōt :tōkōl kēē-āmiisyō ākēērēēsyō paani koochōōn apayta kilēē pāytooyiin. Ātēpiisōōt ng'achareen chēpō pāyuunāt ākoorwoochi koorin taman nkōō ārēēny chēpō *Israayeel.”
King'ōōrēy :Yēēsu kilē tāyēy :Pēētērō inyeentee
31 Kukuur :Yēēsu Pēētērō kilē, “Siimnyōn, Siimnyōn! Teertee kee! /Kaakēētē *Syeetaani kaamuuka kuutyamaak kuuro kilē ng'oo :nyoo moolē keey. 32 Aku āsoowuun nyuun Siimnyōn kilē simāpēt :kaaranēēng'uung' tōkōl. Nēē walee ākiichōōn wōloo āmii, icheer choo ātuupchō.” 33 Kumwoochi :Pēētērō Yēēsu kilē, “Kiptaayaan, kaachamta keey, nēē ratwa, /keerateech tōkōl, ku nēē meerat, kēēwoonyō :tōkōl.” 34 Kuwālchi :Yēēsu kilē, “Pēētērō, āmwooruun kilē māchārēy :kipsōōywō pērēētuuni kitoomō itay āsip sōmōk kilē mēēnkētoon.”
Āchēpō keey, mii kuchōōnēy :nyaril
35 Kumwoochi :Yēēsu kiineetanichiich kilē, “Kii nēē āyooytook apeetaatee kimooting'ootēy rōōpiyō, saap ntā ku kwēēr oo, kiirārwook kir aka tōkōl?” Kuwālchi :kiineetanik kilē, “Moomii :kir nyoo kiipēt.” 36 Kumwa :Yēēsu kilē, “Kung'eetee aniinee nyuun, chiich aka tōkōl nyoo ting'ēy rōōpiyeechiich ntā ku saapeenyiin, kunamaata. Ku :chiich aka tōkōl nyoo māting'ēy chōōk, ku-alta sampuunyiin aku-al chōōkeenyiin. 37 Āmwoorwook man kilē :siruutēchu pō Iriin mwoorēy kilē, ‘/Kiikitasta piich choo putēy ng'ātuut,’† ku-irēē nkōō wōloo āmiiyaa kilēē wōli /kiikeesirta.” 38 Kumwoochi Yēēsu :kiineetanik kilē, “Kiptaayaan, āchu chōōkoon ārēēny.” Kilēēchi :Yēēsu, “Kaakuyam!”
Kisooyēy :Yēēsu nkōō Keetseemaani
Mataayo 26:36-46; Maarkō 14:32-42
39 Kii nēē kaakuwēēro :Yēēsu kōyoonēē kutāchi keey Tulwoo *Musēytuun kilēē akan, kutuup kiineetanichiich. 40 Kii nēē it tulwoonoonēē, kilēēchi kiineetanichiich, “Asaa simooputyō nēē /kuutyamaak.”
41 Kuwō :Yēēsu taay nyoo matyaan akukutung' kung'uruukō kusa kilē, 42 “Apoo, nēē ichāmēy, inaayteereenaan nyarili, wōloo nyuun mee-ir kilēē wōloo āmārtooy, ira kilēē wōloo imārtooy.” [ 43 Paani keewaang' :Yēēsu kusa kilēē nyoonēē, kuchōōnchi *:malayiika akicheer inyeentee. 44 Kuureer kusa nkōō ng'woonin ākōy kuuyoot kiiroot choo tērtooy kupēētii ng'wēny choo lēē kērēti.]a
45 Paani kang'eeta :Yēēsu yoonēē kiisooyēē, kuwaraka wōloo mii :kiineetanichiich chu lēē sōmōk, kunyōōru mii rwoon akipō kaa-iimuut choo kiipkootēy. 46 Kuteep :Yēēsu kiineetanik kilē, “Āmu nee sooruuyēē? Āng'ēētyēē akaasaa simooputyō nēē /kuutyamaak.”
/Kēēnāmēy Yēēsu
47 Kutākumii :Yēēsu kung'āloolēy, ku-itu :piich chaa chaang' choo kiintōrōōrchinii :Chuutaas nyoo kii ākoong'o nyēpō kiineetanichiich taman nkōō ārēēny. Kuriichi :Chuutaas Yēēsu sikuutō aasak. 48 Kilēēchi :Yēēsu, “Chuutaas! Imuukēy man i-alta *Wēēroo Chiich nkōō taakwees?”
49 Paani keero :kiineetanik chu kiimii nkōō Yēēsu kiyoo kii-ira, kumwa kilē, “Kiptaayaan! Kuyapaayap nkōō chōōkoon?” 50 Kung'eet :akoong'o akichwan iitpō taay nyēpō kipāyityoontoo *Tisiintēē nyi Ōōw kuchinta. 51 Kumwoochi nyuun :Yēēsu kiineetanichiich kilē, “Kayam nyoonēē!” Kutiing' iitpō chiichoonēē akuusoop.
52 Kumwoochi :Yēēsu *tisiik choo ēēchēēn, piich choo kiiriipēy *Kōpō Iriin, ākōō kāāntōōy kilē, “Āmu nee soo-āpuu chōōkoon nkōō ruunkuus kilēē aneen pāriin? 53 Āmii nkōō akwaan piriiruu *Kōpō Iriin pērēētuu aka tōkōl oo, nku maanamaan? Wōloo nyuun pērēētuung'woong' :nyi nyoo pāyuuy :kaamuukaa tuurin.”
Kitāyēy :Pēētērō kilē mēēnkēt Yēēsu
54 Kunam :pichoochēē Yēēsu akuumut ākōy kaa *Tisiintēē nyi Ōōw. Kutuup :Pēētērō nkōō ripaarip ākōy piriiruu kaayoonēē.
55 Kii nēē it piriiruu kaayoonēē, kuulaar :pichoochēē walak ma piriir kwēēn akutēpi ng'wēny tōkōl kuyu. Kuwō :Pēētērō kuyu mayoonēē nkōō akwaaneek. 56 Kiiro :chēēto aka nyoo kii kipāyityoontoo kaayoonēē Pēētērō āmu kiilēpō yi kiitēpēēy. Paani keekeenta kukaraam kumwa kilē, “Kiimii :chiichi mpō nkōō Yēēsu.” 57 Kitay :Pēētērō akilē, “Chēēpi, moonkēt chiichoonēē.”
58 Nyoo matyaan, kuuro :chiitō aka Pēētērō akimwa kilē, “Inyēēn :akoong'o nyēpō pichu.” Kuwālchi :Pēētērō kilē, “Acha! Ma :aneen.”
59 Paani kāsiirtō :saayit ākoong'o, kuureer kumwa :chiich aka kilē, “Man, kiimii :chiichi nkōō Yēēsu, āmu pō Kalilaaya.” 60 Kitay :Pēētērō akilē, “Wēē, moonkēt kiyoo imwoorēy.” Paanoonēē kutākumii :Pēētērō kung'āloolēy, kuchār :kipsōōywō.
61 Kuwarak keey :Yēēsu akuuro Pēētērō. Kuupkaat nyuun :Pēētērō ng'aleechu kiimwoochinii :Yēēsu kilē, “Kutoomō kuchār :kipsōōywō lang'atuuni itāyēy āsip sōmōk kilē mēēnkētoon.” 62 Kuwō :Pēētērō saang' akuriir nyoo kiing'woonchi.
Kimuulēy :riipiik Yēēsu akupir
Mataayo 26:67-68; Maarkō 14:65
63 Kitoowu :piich choo kimii kuriipootēy Yēēsu kumuul akuunyariilaata. 64 Kirat koonyin akulap akuteep kilē, “Ng'oora kee, ng'oo nyi kalapin?” 65 Kimwoochi mpō :pichoochēē Yēēsu ng'al chaa chaang' chaa raacheen.
Kumii :Yēēsu taayuu kōōkwoo Yāwuutik nyoo ōōw
66 Kii nēē wō kuyyeech :kōōrēē, kuutuuyō :kōōkwō nyoo ōōw nyēpō Yāwuutik, ku-it wōloo mii kāāntōōyik, *tisiik choo ēēchēēn ākōō koonēēt chēpō ng'ātuut. /Keemutu Yēēsu kuchō kōōkwō. 67 Kuteep :pichoochēē Yēēsu kilē, “Mwoorwēēch kee, man inyēēn *:Meesaaya?” Kuwālchi :Yēēsu kilē, “Nēē āmwoorwook, kumoorānēy, 68 ku naateepeenaak :ng'ālyoon, kumoowāluuy. 69 Aku king'eetee aniinee kitas taay, kutēpēē *:Wēēroo Chiich, ēēruu taay nyēpō Iriin nyēpō kaamuuka tōkōl.” 70 Kilē :pichoochēē tōkōl, “Ara :inyēēn Wēēroo Iriin sōō?” Kilēēchi :Yēēsu, “Lēē nyoonēē kaamwaa.”
71 Paani kamwa :Yēēsu kilēē nyoonēē, kilē :pichoochēē, “Kir nee nyoo tākēēmārēy keeteer akipō chiichi akaakeeteer kiyoo kamwaara kuutiinyiin.”