Kōōnunēy choo kiitētō :mōsōk
Maarkō 12:41-44
21
1 Kutākumii :Yēēsu *Kōpō Iriin, kuuro wōloo kiitētooy :piich choo kii mōkōrō kōōnuunēy saapōōy choo /kiikiiruruuchinii rōōpiyō chēpō pāyiisyoo Iriin. 2 Nēē mii yoonēē kuuro cheepyooso nyoo kii mōsōk aku mēēywoon kuutē saapaanoonēē rōōpiyō choo ng'ērin.3 Kumwa :Yēēsu kilē, “Āmwoorwook man kilē, cheepyoosooni lēē mōsōk nyi kākōōnu kōōnuunēy chaa chaang' kusiir chiich aka tōkōl. 4 Kākōōnu :pichu tōkōl kir nyoo mining' nkōō chaa chaang' choo ting'ēy, ku cheepyoosooni, lēē mēēywoon kilēē wōli lēē, ku kākōōnu chaachiich tōkōl mpō choo kāriipēē keey.”
Tukun choo iriisōōt mu pērēētuus chēpō lēt
Mataayo 24:1-14; Maarkō 13:1-13
5 Kitoowu :kiineetanik chēpō Yēēsu walak kung'alaala *Kōpō Iriin, wōloo karaamta ākōō wōloo lēē :koriik chu /kikuteeka ākōō mpō :kōōnuunēy chēpō pāyiisyoo Iriin. Kumwoochi :Yēēsu kiineetanichoochēē kilē, 6 “Mii :pērēētuu nyoo /kusyoorēy tukuuchu tōkōl āmii ārōōtēy. /Kumilēy nyoo moomii :kor mpō ākoong'o nyoo ryoong'ēē aka.”
7 Paani kamwa :Yēēsu kilēē nyoonēē, kuteep :kiineetanik kilē, “Koonēētiin, iriisōōt :ng'aleechu āyu, aku kir nee nyoo ng'uutwēēch kilē paanta ku-iriisyō ng'aleechu?”
8 Kilēēchi :Yēēsu, “Āriip keey! Maakany /kēēmēlmēēlook. Āmu chaang' choo pkoonēy nkōō kaarineenyuun, akumwoorēy kilē ‘Aneen *Meesaaya’ ntā kumwa kilē, ‘Kaakuriiku pērēētuu.’ Nēē aroo pichoochēē, ku maatuup kiyoo mwoorēy. 9 Paani kaateer akipō pooryoot nkōō chēēpkiririi ku moowāriisyō, āmu ākōy ku-iriisyō :tukuuchoochēē kupōk, wōloo nyuun mā-itēy lēt nyēpō ng'wēny.”
10 Kitas taay :Yēēsu kumwa kilē, “Poorsōōt :pōrōr ākōō pōrōryēē aka, kupooryō :kōōrēē aka ākōō aka. 11 Chōōnēy :kiprang'rang' nyoo nyikiis ng'wēny aku nyārilsōōt piich chaa chaang' akurook nkōō kēmēy nyoo ōōw nyoo chōōnēy ākōō kōrōōytiin mu kāmostiin chaa chaang'. Iriisōōt :tukun chēpō kwōng'uut nkōō parak choo irēy piich kuuwāriisyō. 12 Kitoomō ku-iriisyō :tukuuchoochēē tōkōl, /kēēnāmook /ākēē-usook /ākēērwookwook mu sinakōōkiin /akeerataak. /Ku-āpook taayuu pāytooy ākōō kāāntōōy akipō aneen. 13 Pārooyin :nyoonēē nyoo āmwoochiinēē pichoochēē lōkōōy choo kāroomēēn. 14 Kunyuun, moosip a-iim keey kilē āpoomwoorēy nee paani kapa /kēērwookook. 15 Ākōōnook ng'ōrōōmnyō ākōō ng'al choo āpoomwoorēy nyoo moomii :chiich nyoo sāsook nyoo muukēy kuwālu ng'ālyoon.
16 Āltook :sikiikwook ākōō choo ātuupchō, ku-altaak tilyayiikwook nkōō choorwayiikwook aku-ir walak nkōō akwaan /keekeet. 17 Sāsook :piich tōkōl akipō aneen. 18 Mpō ntā sasaak piich, ku mēēlē ruutyēērēēnook :Iriin mpō kiitēēn. 19 Amurtee ng'aleechoochēē āmu nēē a-ir kilēē nyoonēē, ānyōōruuy sopoon nyēpō man.”
Wōloo /kung'āmtooy Chēērusālēēm
Mataayo 24:15-24; Maarkō 13:14-20
20 Kitas taay :Yēēsu kimwa kilē, “Nēē aroo kuukwēēnkwēēn :puuni Chēērusālēēm, āsōwu kilē kaakuriiku :pērēētuu nyoo /king'āmēē :Chēērusālēēm. 21 Nēē aroo kilēē nyoonēē, ku kaykay kumwēr :piich choo mii Chuuteeya ākōy lakamōōs. Ku :piich choo mii Chēērusālēēm ku kaykay kupēēchi keey. Ku piich choo kānyōōrchi :ng'aleechu kumii saang', ku kaykay kumwēr amāwārākiisyō Chēērusālēēm. 22 Āmu pērēētuusyēchu choo irēy :Iriin kung'woonchi piich choo kiiku-ir ng'ōōki kilēē wōloo mwoortooy :siruut. 23 Kōrōōmituuy pērēētuusyēchoochēē nkōō chēēpyōōsōōy choo ting'ēy tuum ākōō choo rēērinii laakōōy! Chōōnēy :ng'woonin nyoo ōōw ng'wēny aku irēy :Iriin kung'woonchi pichu mātuupēy ng'aleechiich. 24 /Kupārēy walak, /akeenam walak kipa kilēku kipāyitiin nkōō kōōrootin tōkōl. Māng'ēy :piich choo mā Yāwuutik Chēērusālēēm ākōy kurook :pērēētuusyēkwaak.”
Tukun choo ng'uutuuy paani wārākēē :Yēēsu
Mataayo 24:29-31; Maarkō 13:24-27
25 Kitas taay :Yēēsu kumwa kilē, “Kung'uutuunēē :tukuuchu wōloo tēptooy :asiis, araawa ākōō kookeel. Tēpiisōōt :piich mu ng'wēny nkōō koowāriisyō akukwōng'yō piich akipō wōloo chērtooy pēr nkōō araaray akuwasta keey pēr kwōng'uut. 26 Wāriisyēy :piich chaa chaang' ākōy kumistō akipō kir nyoo wēētii ku-irēē mu ng'wēny. Āmu /kuutimtiimēy tukun tōkōl choo mii im.
27 Nēē ira kilēē nyoonēē, kuuro :piich *Wēēroo Chiich kuchōōnēy nkōō poolta nkōō kaamuuka ākōō lēpooyin nyēpō Iriin. 28 Nēē aroo kutoowu keey :tukuuchoochēē tōkōl, āpāypāyiitu akipō kiyoo wēētii ku-irēē āmu, ng'utuuy tukuuchoochēē kilē sārwook :Iriin kilēēkit.”
Pērēētuu nyoo wārākēē :Yēēsu
Mataayo 24:32-36; Maarkō 13:28-32
29 Kitas taay :Yēēsu kumwochi kārkēēyin kilē, “Aroo kee *mookāng'wō nkōō keetiichu tōkōl. 30 Nēē aroo kurārākēy sāki āsōwu kilē kiikuriiku :kēmēy. 31 Ku lēē nyoonēē mpō, nēē aroo ku-iriisōōt :tukuuchoochēē, āsōwu kilē kaakuriiku kutoowu :Pāyuunātoo Iriin.
32 Āmwoorwook man kilē mpō ntā mii :tukuuchu tōkōl ku-iriisōōt, ku māpētsōōt :piichuuch choo kyoolēwēn. 33 Pētēy :parak ākōō ng'wēny, aku mēēlē nyuun pētēy :ng'ālyoontēēnyuun.”
Āchēpō keey
Mataayo 24:37-44; Maarkō 13:33-37
34 Kitas taay :Yēēsu kumwoochi kiineetanichiich kilē, “Āriip keey! Maakany ānyōōrwook āpkootēy akipō tukun chēpō ng'wēny, tuumwēy ākōō rēēsyō. Maakany mpō kuupootook :kaapkootuut chēpō mōkōrnoonti. Nēē a-ir kilēē nyoonēē, ku nyōōrwook :pērēētuunoonēē ku moochēpootēēn. 35 Tukuuchu iriisōōt kuchōōnchinii chiich aka tōkōl nyoo mii ng'wēny. 36 Āriip keey pērēētuu aka tōkōl ākoosooyēy si nēē ng'at ānyōōru kaamuuka achirilee ng'aleechoochēē iriisōōt akaasaa mpō kilē taapee āryoonchēērēē taayuu *Wēēroo Chiich ātiliilō.”