/Kēētookēy Yēēsu nkōō Chēērusālēēm kilēē pāytooyiin
11
1 Kii nēē riichi :Yēēsu ākōō kiineetanichiich Chēērusālēēm, yoo kilēēkitēē Peetpaake ākōō Peetaaniya, yoo lēēkitēē Tulwoo *Musēytuun, kuuyooytō kiineetanichiich ārēēny, 2 akilēēchi, “Apee ākōy kēēstoonichu ātoopēnēy. Āmii āchuutēy, ānyōōruuy moorpō sikiryō kurataat akutoomō kukasan chiich pērēētuu aka. Atyaak sikiryoonoonēē ākoorēēwu. 3 Nēē teepaak :chiich kilē, ‘Āmu nee saa-ira kilēē nyi?’ āmwoochi kilē, ‘Mārēy Kiptaayaan akuu-ōōkuuy yēēnyi kilē weel.’ ”4 Kipa :kiineetanichoochēē akupa kunyōōru mooroonēē pō sikiryō kākirāti kurkat saang', akuutyaak. 5 Kumii kuutyookēy, kuteepee :piich walak choo kiimii yoonēē kiineetanichoochēē kilē, “Kālē nee saatyaaka moortaa sikiryō?” 6 Kuwālchi :kiineetanichoochēē kilēē paani kimwoochinii :Yēēsu. Kuchāmchi :pichoochēē ku-āp mooroonēē. 7 Kuurēētō ākōy yi kiimii :Yēēsu, akuukārkoorchi sirooy pataruu sikiryēē. Kutēpēērō :Yēēsu sikiryēē. 8 Kuukārkoorchi :piich chaa chaang' sirōōkwaak aree, kuukārkoorchi :walak sāk choo kiiyāpēē paraatin. 9 Kituumchinootō :piich choo kiimii taayuunyiin nkōō choo kituupēy lēt kilē,
“Ōōsaana!a
Pēēruuroot :chiich nyoo chōōnēy nkōō kaarinaa Iriin.
10 Pēēruuroot pāyuunātoo paapēēnyoon Tāwuti nyi mii kuchōōnēy.
Ōōsana mu kipsēnkwēt!”†
11 Ku-it :Yēēsu Chēērusālēēm akuwō kuchuut piriiruu *Kōpō Iriin. Kuuro wōloo kiilēē :kir aka tōkōl. Āmu kiikiikutuuriit :kōōrēē kuwō :Yēēsu nkōō kiineetanichiich taman nkōō ārēēny Peetannya.
Keet nyoo maayi lokor
12 Pērēētuu nyi kiituupēy, kupēērēē :Yēēsu ākōō kiineetanichiich Peetannya, ku-am :piri Yēēsu. 13 Nēē tākumii kupēētii, kuurōōti :Yēēsu *mookāng'wō wōloo lōōw nyoo kiituk sāk. Kuwō :Yēēsu kuuro nēē muukēy kunyōōrchi lokoryoon aka tōkōl. Nēē it mookāng'wēē, kunyōōru kilē sāk kipaat, āmu kiimā pērēētuus choochēē choo kiiyēēy :maakany lokor.b 14 Kumwoochi mookāng'woonoonēē kilē, “Kima-ameeniin :chiich lokor ākōy.” Kiteer :kiineetanichiich ng'aleechoochēē.
Kuutiliilēy :Yēēsu Kōpō Iriin
15 Kii nēē it :Yēēsu ākōō kiineetanichiich Chēērusālēēm, kuchuut :Yēēsu piriiruu *Kōpō Iriin akutoowu ku-oon piich choo kyooltooy ākōō choo kyooliisyēy, akumilta meeseen chēpō piich choo kiiwāltooy rōōpiyō ākōō ng'achareen chēpō piich choo kyooltooy chēēptuukēēn. 16 Kiimaachāmchi :Yēēsu chiich aka tōkōl nyoo kiiting'ootēy kir aka tōkōl nyoo kyooltooy kupuntoorō piriiruu *Kōpō Iriin. 17 Kuuneet :Yēēsu pichoochēē kilē, “Masiraat kilē, ‘/Kukuurēē koonyuun kōpō saayeet nyēpō piich chēpō kōōrootin tōkōl’?† Nku kyaa-ir :akwaan kilēku ‘kēpēnoo chōōr.’† ”
18 Paani kateer *:tisiik choo ēēchēēn ākōō koonēēt chēpō ng'ātuut kiyoo kii-ir :Yēēsu, kutuurchi :moo akutoowu kuwas wōloo pārtooy Yēēsu. Kiiwārēy :pichu Yēēsu āmu kiikwōng'yō :piich tōkōl nkōō wōloo kiinēētitooy.
19 Kii nēē tuuriit :kōōrēē, kuureer :Yēēsu ākōō kiineetanichiich Peetannya.
Kaarana ākōō nyooyeetaa kaat
20 Paani kāwo kuyyeech :kōōrēē, kuureer :Yēēsu ākōō kiineetanichiich Chēērusālēēm. Kumii kupēētii, kuurō mookāng'wooni kiipānēy :Yēēsu kiiyaam. 21 Kuupkaat :Pēētērō akilēēchi Yēēsu, “Koonēētiin, roo kee! Kiiyaam :mookāng'wēē nyi kēēpānēy.” 22 Kuwālchi :Yēēsu kiineetanichiich kilē, “Arana Iriin. 23 Āmwoorwook man kilē chiich aka tōkōl nyoo mwoochinii tulwooni kilē, ‘Ng'eeta akiiwēēwiirchi keey araaray,’ akuuran nkōō moonyiin kilē irēē kiyoo kamwa, ku-irēē kilēē nyoonēē. 24 Āmwoorwook nyuun kilē kir aka tōkōl nyoo koosoom nkōō soowuut, aran kilē koonyōōru, kukōōnook nyuun :Iriin. 25 Nēē āsooyēy Iriin, akimii :kiyoo ra nyoo kiiku-irwaak :chiich aka, ānyōōchi kaat kupōk sikunyōōwook kaat mpō :Paapēēng'woong' Iriin nyoo mii kipsēnkwēt. [ 26 Nēē moonyōōchi piich walak kaat, kumānyōōwook kaat :Paapēēng'woong' nyoo mii :kipsēnkwēt ng'ōōkiikwook.]”c
Kitēēpēy :kāāntōōy wōloo chōōnēē :kaamuukaa Yēēsu
27 Kuureer kuwaraka :Yēēsu nkōō kiineetanichiich Chēērusālēēm. Paani mii kumānēē piriiruu *Kōpō Iriin kupka *tisiik choo ēēchēēn nkōō koonēēt chēpō ng'ātuut nkōō kāāntōōy, 28 akuteepee kilē, “Iting'ēē kaamuuka nee i-ir ng'aleechu? Ntā ng'oo nyi kiikōōnin kaamuuka nyoo i-irēy ng'aleechoochēē?” 29 Kuwālchi :Yēēsu pichoochēē kilē, “Ātēēpēēnook tēēpuut aku nēē āwālwoon, āmwoorwook nyoo kiikōōnān kaamuuka a-ir ng'aleechu. 30 Āmwoorwoon! Kiichōōnēē :kaamuukaa Chowaana kuupootiisāniisyēy wōloo mii :Iriin, ntā wōloo mii :piich?” 31 Kuteepee keey pichoochēē kilē, “Nēē kumwaa kilē, ‘Kiichōōnēē wōloo mii :Iriin,’ kuteepeeneech kilē, ‘Āmu nee nyuun simaaran inyeentee?’ 32 Ku nēē kimwaa kilē, ‘Kiichōōnēē wōloo mii :piich.’ ” (Kiiwar piich āmu kii rānēy :piich tōkōl kilē kii *ōōrkooyoontoo Iriin :Chowaana.) 33 Kuwālchi nyuun :pichoochēē Yēēsu kilē, “Mākuunkēt.” Kilēēchi :Yēēsu pichoochēē, “Moomwoorwook nyuun mpō nyoo kiikōōnān kaamuuka a-ir ng'aleechu.”