Lōkōōy choo kāroomēēn kilēē wōloo kiisirta
:MAARKŌ
Kichēpchinii :Chowaana Yēēsu aree
1
1 Lōkōōy :chu choo kāroomēēn chēpō Wēēroo Iriin, Yēēsu *Kiriistō. 2 /Kiikusir nkōō kiitapuu *ōōrkooyoontoo Iriin *Isaayaa kilē,“Āyooytooy chiinyuun kuuntoroor
kusātuun aree.”†
3 Siraat mpō kilē,
“Mii :chiich nyoo kuursyēy nkōō suur kwēēn kilē,
‘Āchēpō keey,
ākoochuulchi Kiptaayaan aree.’† ”
4 Kiichō Chowaana Koopootiisāniin Kwoomtooy mu suur kwēēn kilē kuwāliisyō :piich nkōō ng'ōōkiikwaak, /akeepaatiisan sikunyōōchi :Iriin kaat. 5 Kipeera :piich chaa chaang' Chēērusālēēm ākōō kāmōōs tōkōl chēpō Kōōroo Chuuteeya akupa kuteer ng'alēēpō Chowaana. Kung'aang'ta :piich ng'ōōkiikwaak akuupaatiisan :Chowaana nkōō ēēmpō Choortan. 6 Kiilookēy :Chowaana sira nyoo /kikiileeta puut chēpō tamas, akirata keey ang'wa suwa, akii-āmēy taalim ākōō kuumoot. 7 Kyoomchinii piich kilē, “Paani kaawaang' koonēētiisyeenyuun, kuchōōnēy :chiich nyoo ōōw kusiir aneen. Māyāmēy mpō ālēku kipāyityoonteenyiin. 8 Kaapaatiisaneenaak pēr, wōloo nyuun pootiisānēēnook inyeentee Toomirmiir nyoo Tiliil.”
/Kēēpootiisānēy Yēēsu
9 Nēē mii pērēētuu aka, kung'eetee :Yēēsu Naasareet nyoo mii Kōōroo Kalilaaya akuwō kuupaatiisan :Chowaana, mu ēēmpō Choortan. 10 Paani kāng'ēētuunō :Yēēsu pēr, kuuro kuyaata parak, akurēku :Toomirmiir nyoo Tiliil nyoo karkeey nkōō chēēptuukō akunam inyeentee. 11 Kung'alaal kuut nkōō im kilē, “Inyēēn Wēēriinyuun nyoo āchāmēy ākoopāypāychinii.”
/Kēētyāmēy Yēēsu mu suur kwēēn
12 Paanoonēē, kuumut :Toomirmiir nyoo Tiliil Yēēsu ākōy suur kwēēn. 13 Kiitēpō :Yēēsu pērēētuus artam kuutyāmēy *:Syeetaani akiimii nkōō tyoong'iipō kērti, aku kiimii *malaykeen kupāyiisyēēchinii inyeentee.
Kiitoowunō :Yēēsu pāyiisyeenyiin Kalilaaya
14 Kii nēē /kaakeerat Chowaana, kuwō :Yēēsu kōōroo Kalilaaya ku-amtaata lōkōōy choo kāroomēēn choo kiipkoonēē wōloo mii :Iriin. 15 Kyoomtooy kilē, “Kaaku-it :pērēētuu! Kaaku-itu :Pāyuunātoo Iriin. Āwāliisyēē nkōō ng'ōōkiikwook akaaran lōkōōy choo kāroomēēn.”
Kiineetanipō Yēēsu chēpō taay
16 Nēē mii pērēētuu aka, kimii kumānēē :Yēēsu tapan nyēpō araaray pō Kalilaaya, kuuro Siimnyōn ākōō wēēriing'waang' Antereeya kuwiirchinii neetiisyakwaak araaray kunamēy kaaraak. 17 Kukuur :Yēēsu pichoochēē akilēēchi, “Apkaana atuupaan saaneetaak wōloo ānāmtooy piich.” 18 Paanoonēē, kumētō neetiisyakwaak akutuup Yēēsu. 19 Kuwō :Yēēsu taay nyoo matyaan, kuuro wēēchiipō Sēpētaayo Chēēmis ākōō Chowaana choo kiimii kuu-uunēy aku-irtooy neetiisyakwaak. 20 Paani keero :Yēēsu pichoochēē, kukuur. Kumēti wēēchoochēē apoong'waang' Sēpētaayo ākōō kipāyitiin mēēlii, akutuup Yēēsu.
Kuusoopēy :Yēēsu chiich nyoo ting'ēy toomirmiir nyaa ra
21 Kiiwō :Yēēsu ākōō kiineetanichiich Kaaparnaam. Nēē mii pērēētuu *Sapaato, kupa :tōkōl *sinakōōki, akitoowu kuuneet :Yēēsu piich lōkōōy choo kāroomēēn chēpō Iriin. 22 Kiikwōng'yō :piich nkōō wōloo kiinēētitooy :Yēēsu. Kiimēēnēētēy kilēē wōloo kiinēētitooy :koonēētik chēpō ng'ātuut, aku kiinēētiisyēy kiting'ēy kaamuuka.
23 Kiimii sinakōōkiinoonēē :chiich nyoo kii-iimēy *:toomirmiir nyaa ra. 24 Kuunchō :chiichoonēē kilē, “Yēēsu nyēpō Naasareet, imārēēnēēch nee? Kēēchōōn ipareech? Ānkētiin! Inyēēn Chiich nyoo Tiliil nyoo kiichōōnēē wōloo mii :Iriin.” 25 Kuupkoong' :Yēēsu toomirmiiryoonoonēē akilēēchi, “Siisa, ākiichōōnēē chiichoonēē.” 26 Paani kamwa kilēē nyoonēē, kuutimtiim :toomirmiiryoonoonēē chiichoonēē. Kuunchō nkōō kuut nyoo ōōw akichōōnēē chiichoonēē. 27 Kiikwōng'yō :piich tōkōl akutoowu kuteepee keey kilē, “Ng'al nee :chu? Koonēētuut :nyi nyoo rēēl? Nku nēē pkoong' :chiichi *toomirmiirēy chaa raacheen nkōō kaamuuka kupeeree piich, kuukoonyitēy :toomirmiirōōchoochēē.”
28 /Kiikyaamtaata ng'aleechiich kuyāmu Kōōroo Kalilaaya tōkōl.
Kuusoopēy :Yēēsu piich chaa chaang'
29 Paani kang'eetee :Yēēsu *sinakōōki, kupa ākōō Siimnyōn kipootō Chēēmis ākōō Chowaana ākōō Antereeya kaa Siimnyōn. 30 Kiimnyaanaat :pookēr pō Siimnyōn akiimii kurwēēy. Paani ka-it :Yēēsu, kēēmwoochi inyeentee akipō cheepyoosoonoonēē. 31 Kuwō :Yēēsu akunam ēēr, akuutoorēt kuuryoong'. Kusop :cheepyoosoonoonēē akupay akwaaneek.
32 Nēē mii pērēētuunoonēē ku kaakurēytō asiis, /kēēmuti Yēēsu piich tōkōl choo kimnyoonsōōt ākōō choo kii-iimēy *:toomirmiirēy chaa raacheen. 33 Kipka :piich chaa chaang' akuurumchi keey kurkat saang' kōyoonēē kiimii :Yēēsu. 34 Kiisoop :Yēēsu piich chaa chaang' choo kiiting'ēy kōrōōytiin aku-oon *toomirmiirēy chaa raacheen chaa chaang'. Kikar koong' :Yēēsu toomirmiirōōchoochēē kimamwa kir āmu kiinkēt :akwaaneek kilē ng'oo :Yēēsu.
Kwoomtooy :Yēēsu lōkōōy choo kāroomēēn mu Kalilaaya
35 Nēē mii paani kēērir :kōōrēē, kung'eet :Yēēsu akuwēēchi keey wōloo kiimālēēkitēē :chiich, akuwō kisa. 36 Kii nēē sōwu :mpō Siimnyōn kilē moomii :Yēēsu, kiwasaata wōloo kāwō. 37 Kii nēē nyōōru, kilēēchi, “Mii kuwāsiin :piich tōkōl.” 38 Kumwoochi :Yēēsu akwaaneek kilē, “Kaykay keepee kāmōōs walak soowō a-amta lōkōōy chēpō Iriin, āmu choochēē chu kyoopkoon.”
39 Kyaamtaateeree :Yēēsu sinakōōkiin chēpō Kalilaaya, aku-ōōnēy *toomirmiirēy chaa raacheen kupeeree piich.
Kuusoopēy :Yēēsu chiich nyoo kyaam :kōōnchōryoontō
40 Kiimii :chiich nyoo kyaam :kōōnchōryoontō. Kichō :chiichoonēē wōloo mii :Yēēsu, kukutunchi akumwoochi kilē, “Nēē ichāmēy, isoopoon akiitiliiloon.” 41 Kii nēē mwa kilēē nyoonēē, kuriiree :Yēēsu. Kuukoortō ēēruunyiin kutiing' chiichoonēē akilēēchi, “Āchāmēy, sopō.” 42 Kii nēē kaakumwa kilēē nyoonēē, kusop :chiichoonēē kilē weel. 43 Kukir :Yēēsu akilēēchi, 44 “Āmēēmwoochi chiich aka tōkōl ng'aleechu. Wiyō akiiwēēng'uuti keey tisiin siitookuu kilē kaa-itililiitu akii-āp tukun choo /ki-irēē kōrōs kilēē paani kiimwoorēy *:Muusa nkōō ng'ātuut.” 45 Wōloo nyuun kuwō :chiichoonēē akutoowu ku-amtaata lōkōōyichoochēē nyoo maawung'. Ki-ir :lōkōōyichoochēē kuti ārii aka tōkōl yoo kāwō :Yēēsu, kuurumchinii keey :piich, kumārēy kēēsoop. Ki-ir :ng'aleechoochēē Yēēsu kuti maakuwēētii ārii aka tōkōl kuurōōtēy :piich. Ku-ir Yēēsu kutēpchi keey tapan wōloo mēēnkēt :chiich. Mpō paani kiitēpō :Yēēsu tapan wōloo mēēnkēt :chiich, kitākupkoonchinii :piich nkōō kāmōōs tōkōl.