Luuka 4

/Kēētyāmēy Yēēsu mu suur kwēēn

Mataayo 4:1-11; Maarkō 1:12-13

1 Kii nēē warakeera :Yēēsu ēēmpō Choortan, ku /kiikiinyir Toomirmiir nyoo Tiliil. Kunam :Toomirmiiryoonoonēē, 2 akuumut ākōy suur kwēēn. Kitēpō wōloonēē pērēētuus artam nyoo moomēy kir. Paani karook :pērēētuusyēchoochēē, ku-am :piri.

Kutākumii :Yēēsu wōloonēē pō suur kwēēn, kuchōōnchi *:Syeetaani kumārēy kuutyam. 3 Kimwoochi *:Syeetaani kilē, “Nēē inyēēn Wēēroo Iriin, imwoochi kee kori kilēku āmiisyō.” 4 Kiwālchi :Yēēsu kilē, “Mwoorēy :siruut kilē, ‘Māsopēē :chiich āmiisyō kipaat.’ ”

5 Kuumut *:Syeetaani Yēēsu wōloo tōrōōr akung'uuti nkōō saayit nyaa nwaak kōōrootin tōkōl chēpō ng'wēny, 6-7 akumwoochi kilē, “Nēē kutung'woon, ākōōniin kaamuuka aka tōkōl ipayta kōōrootinēēchu tōkōl nkōō mōkōrnoontiini. Āmwooruun kilēē nyoonēē, āmu aneen nyoo āting'ēy kaamuuka ātō chiich aka tōkōl nyoo kaacham kilē kootō.” 8 Kuwālchi :Yēēsu kilē, “Siraat kilē, ‘Kutung'chii Iriin Kiptaayaanteeng'uung' akiipāyiisyēēchi inyeentee keey.’ ”

9 Kuumut *:Syeetaani Yēēsu ākōy Chēērusālēēm akukany kuuryoong'ō yoo tōrōōr nkōō tēēnkēē nyi kiiwaantiriir *Kōpō Iriin, akumwoochi kilē, “Nēē inyēēn Wēēroo Iriin, isōkōrtoorēē kee yēēnyi iwō ng'wēny, 10 āmu siraat kilē, ‘Yookuuy :Iriin malaykeenichiich kuriipin. 11 Tookiin malaykeenichoochēē simāturin :kor keel.’ ” 12 Kuwālchi :Yēēsu kilē, “/Kiikimwa kilē, ‘Meetyam Iriin Kiptaayaanteeng'uung'.’ ”

13 Paani kaakuuwaang' *:Syeetaani kuutyāmēy Yēēsu, kumētō akuwēēchi keey ākōy kinyōōru porooyin pērēētuu aka.

Kiitoowunō :Yēēsu pāyiisyeenyiin Kalilaaya

Mataayo 4:12-17; Maarkō 1:14-15

14 Kuwaraka :Yēēsu kōōroo Kalilaaya, ku kiinyir Toomirmiir nyoo Tiliil. Nyoo matyaan, kuyāmu :ng'aleechu ki-ir kōōroonoonēē tōkōl. 15 Kiinēētiisyō mu sinakōōkiin akuuloosu :chiich aka tōkōl.

Kitāyēy :piich chēpō Naasareet Yēēsu

16 Nēē mii lētuun, kuwaraka :Yēēsu Naasareet wōli kiinara. Nēē mii pērēētuu *Sapaato, kuwō *sinakōōki kilēē akan. Paani mii *sinakōōki, kung'eet kusooman siruut chēpō Iriin. 17 /Kēēkoorchi kiitapu nyoo kiisir *:ōōrkooyoontoo Iriin *Isaaya. Kunam, kuyaat yi kiimārēy akusooman yoo kiimwoorēy kilē,

18 “Āting'ēy Toomirmiir nyoo Tiliil,

āmu kiiku-iran :Iriin

ā-āmchinootō mēēy

lōkōōy choo kāroomēēn.

Kiiyookwoon :Iriin āchoomwoochi piich

kilē /kiityooytooy choo rātootēēn

nkōō ng'ōōkiikwaak.

Ku choo kōryootēēn,

/kēēyootēy koonyiikwaak kuumararta.

Ku piich walak choo rātootēēn nkōō ēēruunēpō piich walak,

/kēētyooytooy kupayta keey.

19 Kiiyookwoon :Iriin āchoomwoochi piich kilē

pērēētuus chu choo sāruunēē :Iriin piichiich.”

20 Paani keewaang' :Yēēsu kusōōmanēy, kuu-ōōchi siruutēchoochēē chiich nyoo kiiryoonchinii saayeet nkōō kōyoonēē, akutēpō ng'wēny. Kuuro :piich tōkōl Yēēsu choo kiimii sinakōōkiinoonēē. 21 Kutoowu :Yēēsu kumwoochi pichoochēē kilē, “Kaakuusilta pērēētuuni kiyi mwoorēy :siruutēchu kilēē paani kaateer :akwaan.” 22 Kii pāypāchi :piich tōkōl choo kiimii yoonēē Yēēsu akukwōng'yō nkōō wōloo kiing'ālooltooy, āmu kii kāroomō :ng'aleechiich. Kilē :piich walak, “Mā wēēroo Chōōsēp :nyi?” 23 Kumwoochi :Yēēsu kilē, “Ānkēt aneen kilē āmuukēy āmwoorwoon ng'ālyoontooni kiimwoorēy :pooyoon nyēpō kēny kilē, ‘Soopō keey :cheepsaakityaan kupōk.’ Āmuukēēkwaan mpō amwaa kilē a-ir :aneen ng'al chēpō kwōng'uut nkōō yēēnyi kilēē paani kyoo-iraa nkōō Kaaparnaam.” 24 Kitas taay :Yēēsu kumwoochi kilē, “Āmwoorwook man kilē moomii *ōōrkooyoontō nyoo kuchāmēy nkōō kōōrēēnyiin.”

25 Kutāsi :Yēēsu kumwoochi kilē, “Ateeraan kee! Man kilē kiimii :mōsōōk chaa chaang' kōōroo *Israayeel nkōō pērēētuus chēpō *Eliicha, *ōōrkooyoontoo Iriin paani kiipētēy :roop kēnyiis sōmōk nkōō āroo lo sikuchō :piri nyēpō kwōng'uut. 26 Aku /kiikiiyooytō *ōōrkooyoontoo Iriin *Eliicha kuwō Sareepta nkōō kōōroo Siitōn wōloo kiimāng'ēy :cheepyoosee aka nyoo lēē mōsōk. Kiimii naas :chēēpyōōsōōk walak chaa chaang' chēpō *Israayeel amēēlē /kiikiiyooytō *Eliicha kuwō wōloo kiimii :chēēpyōōsōōchoochēē. 27 Aroo kee mpō paani kiisoopēy *:ōōrkooyoontoo Iriin Eliisya chiitō aka nyēpō kōōroo Siirya nyoo /kiikikuurēē Naaman nyoo kyaam kōōnchēryoontō. Nku kiisoop :Eeliisya chiichoonēē akiimā Yāwuutyoon akiimii :piich chaa chaang' chēpō *Israayeel choo kiinam kōōnchērtiinā aku māāsoop.”

28 Paani kateer :pichoochēē kiimii sinakōōkiinoonēē ng'aleechoochēē kunyāliisyō. 29 Kung'ēētyō :pichoochēē, kunam Yēēsu akuurēētō kuwēēro māng'ātoonoonēē. Kuumut ākōy yoo lēē looman yoo kiilēēkitēē yoonēē kumārēy kilē kipa kutoorta. 30 Kuchuut :Yēēsu piich kwēēn akuwēēchi keey.

Kuusoopēy :Yēēsu chiich nyoo ting'ēy toomirmiir nyaa ra

Maarkō 1:21-28

31 Nēē mii lētuun, kuwō :Yēēsu Kaaparnaam nyoo mii kōōroo Kalilaaya. Paani mii wōliinēē ku kiinēētēy :Yēēsu piich ng'ālyoontoo Iriin nkōō pērēētuu *Sapaato. 32 Kiikwōng'yō :piich nkōō wōloo kiinēētitooy :Yēēsu, āmu kiing'āloolēy nkōō kaamuuka.

33 Kiimii :chiich sinakōōkiinoonēē nyoo kii-iimēy *:toomirmiir nyaa ra. Kuunchō :chiichoonēē nkōō kuut nyoo ōōw kilē, 34 “Yēēsu nyēpō Naasareet, imārēēnēēch nee? Kēēchōōn ipareech? Ānkētiin. Inyēēn Chiich nyoo Tiliil nyoo kiichōōnēē wōloo mii :Iriin.” 35 Kuupkoong' :Yēēsu toomirmiiryoonoonēē akilēēchi, “Siisa, ākiichōōnēē chiichoonēē.” Paani kamwa :Yēēsu kilēē nyoonēē, kuwiirchi :toomirmiiryoonoonēē chiichoonēē ng'wēny kuurōōtēy :piich tōkōl choo kiimii kōyoonēē, akichōōnēē chiichoonēē nyoo maa-irchi kir aka tōkōl nyaa ra. 36 Kiikwōng' :piich tōkōl akuteepee keey kilē, “Ng'al nee :chu? Nku nēē pkoong' :chiichi *toomirmiirēy chaa raacheen nkōō kaamuuka kupeeree piich, kutēērēy.”

37 Kiyāmu :ng'aleechiich kōōroonoonēē tōkōl.

Kuusoopēy :Yēēsu piich chaa chaang'

Mataayo 8:14-17; Maarkō 1:29-34

38 Paani kāwēērēē :Yēēsu *sinakōōki, kuwō ākōy kaa Siimnyōn. Kiimnyoonēy :pookēr pō Siimnyōn akiimii kurwēēy. /Kēēsoom Yēēsu kuusoop. 39 Kuwō :Yēēsu kuuryoong'ēē yoo kiimii :cheepyoosoonoonēē akuupkoontō kōrōōyoonēē. Kusop :cheepyoosoonoonēē kilē weel akung'eet kupay akwaaneek.

40 Kii nēē kaakurēytō :asiis pērēētuunoonēē, kuumuti :piich tōkōl Yēēsu tilyayikwaak choo kiimnyoonchootēēn. Kitiing'ō :Yēēsu pichoochēē ēēruunēchiich, akuusoop. 41 Kii-oono mpō :Yēēsu *toomirmiirēy chaa raacheen piich chaa chaang'. Paani pkoonēē :toomirmiirōōchoochēē raacheen piich, ku kiinchōōsōōt nkōō kuut nyoo ōōw kumwoochinii Yēēsu kilē, “Inyēēn Wēēroo Iriin!” Kikar koong' :Yēēsu toomirmiirōōchoochēē kimamwa kir, kimaamwa kir āmu kiinkēt kilē Yēēsu ku *Meesaaya.

Kwoomtootēy :Yēēsu lōkōōy choo kāroomēēn mu Kalilaaya

Mataayo 4:23-25; Maarkō 1:35-39

42 Paani kayyeech kōōrēē, kuwēēchi keey :Yēēsu wōloo kiimālēēkitēē :chiich. Kiiwasaata :piich Yēēsu wōltō aka tōkōl. Paani /kāpākēēnyōōru, /keesaarsaar kilē kutēpō Kaaparnaam. 43 Kumwoochi nyuun :Yēēsu akwaaneek kilē, “Mārēy mpō āwō kōōrootin walak a-amtaata lōkōōy choo kāroomēēn chēpō Pāyuunātoo Iriin, āmu nyoonēē nyi kii-ir /kēēyookwoon āchō ng'wēny.”

44 Kitas taay nyuun :Yēēsu ku-āmchinootō piich mu sinakōōkiin choo kiimii kōōroonoonēē.