Eroŋay ya Emitay êkimmi
4
Moo, non ma Kristu âlaamum di humuumahu hatawool, moomu poop kaŋ ma mbi jibandoor be hûlaamahu non oo. Mata anaw âlaamum di humuumahu hatawool, kûrangoore ban di kûbajumiñaku. 2 Momakiimom, di etaŋa'uye yaŋañonuwuum, aatuba jêemi di kânongikooraku ka bukanaku kammi di etaama'uye kemmi di ko, be mbi ya jiga non ma Emitay êkimmi. 3 Malhegen noo napiyaanu, ya jigawem wahaw wa bukanaku kâmirutum Emitay kugawem, waamom non: kâmooraaku, kânongikooraku kata wahaw wajakutaaw, bajakenabu, di maŋaamamu, di êkalaay, di poop wah waawu wâgiipunenim, waamom keenaayaku kata di ûkiinaw. 4 Be jaat bukanaku kâmirutum Emitay, ya kujaahali mata ma jêemiyoriitum di buko di wahaw wajakutaaw wa kugawem, momakiimom ma kûgelumewuum. 5 Be mbi kujuum kajom kayooŋ di Emitay yagawem batalenabu bukanaku karoŋaaku di kaaku kakeem, ma kulob wahaw wa kugam. 6 Mata mo ma elobay yâsuumaay eñaaŋenumim poop bukanaku kakeem, ma mbi keeli kugawi batalenabu di siniilasu satayiil non ma an peh mbi agawi, be di Buynum bata Emitay, mbi kuroŋ non ma yoo erommi.Jisoh jak mâseeliyaamu ma Buynum Bunapaabu buwulem
7 Moo, mata ma hukahu huhuutum kâriiŋ ha wahaw peh mbi ûbuyi, jake ma jiga bukanaku kalhegenumaayaku, ban di jiga to ûyegetaw watawuul di kalhawaku kata Emitay. 8 Be wahaw wa mbi jihaŋ ma ga, jîkinoor noon, mata jîkinoor jaa, mbi jeeli jibonket an peh abaam kûbajumiñaku di miwuul. 9 Mbi ya jiwalenoor di siluupasu satawuul bâŋuŋunoorut. 10 Di jiga poop bugorooraabu kasohem jak ugorooraw wâbutiyoorum wa Buynum Bunapaabu buwulem, ma ânoowan acookoor atiyool di bugoroorabu ba Emitay ewuloom. 11 Moo, anaw añaaŋenem elobay yata Emitay, naloo'yo non ma eboñoom. Aahu a ewuum bugoroorabu bata jacookooraju jata kutiyool, nacookooriil di sembaasu sa ewuloom, ma Emitay mbi esali mata Jesus Kristu, aamom akiim êriibiinaay, di sembaasu be nanoonan. Amiin!
Mbi ûlaamaal mata Kristu
12 Kutiyaay, miwuul ja iboolaatum, aatuba jijaahali poopii di jînongikoor mata hûlaamahu hâhaahum ume noon ha jemmi ho. 13 Moo, jîririgen, mata jêemiye di hûlaamahu hata Kristu, ma mbi majaaŋaamu mata kâyyaku katawool mûyisi, di sûumuul noon ma jimaayoor. 14 Be ga jaa non mata kañaaŋaku kata Kristu jîgelumim, kama jibaje hûpiira, mata Buynumabu bata Emitay, bagam bata majaaŋaamu bobu di miwuul. 15 Moo, aatuba an ata di miwuul alesi mata ma aŋaalem bukan, be mante ma âkuutem, be mante ma agawem kôji, be mante ma alowem di silobasu sata bukanaku. 16 Be anaw âlaam jaa mata ma agam akristoŋaw, aatuba apuño mata hûlaama'uhu, be nasal Emitay mata kañaaŋa'uku ka kuwuloom.
17 Mata tîriiŋe ban ma Emitay êcuk ma ega batalenabu di êsukay yata yo. Moo, êcukumul jaa d'ulaal, bu mbi ega bukanaku kalatum elobay yâsuumaay yata yo? 18 Moo, gîiti jaa ma bukanaku kacolum kupak, ña ûtey ta bukanaku kalatum Emitay, kaamom kagawem kûbajumiñaku kukayem be? 19 Momakiimom bukanaku kammi ma kûlaamem mata ma kemmi ma kugawem non ma Emitay êkimmi, kenken ma kuga mo, mata koku ma kuwalemmi sâaroorasu satayiil di uŋenaw wata Âwwenaaw âynenaayaw, aamom agawem wah peh jak.