Yîinaay koo di kupañooriil
3
Miwuul poop yaaraay, mbi ya jijam di kupañooruul, ma ga jaa kupañooruul kûynent elobay yata Emitay, mbi kujuk bagawerabu batawuul di kunebej di buruŋabu, miwuul balobutiil makeel. 2 Mata mbi kujuk bagawerabu batawuul ma bucolum, di kujuk poop maama jîkoliyem Emitay. 3 Aatuba jîseekum bûgaalumabu bata tîyaŋ di siniilasu, ma ya jiriiro walaw wabalhaaw, di jâgaalaju jata wahaw wata ûuru, di poop jalhiimaaju jata wañaw waseeraaw. 4 Be bûgaalumabu batawuul, mbi jiga bo dâada di sîsigirasu satawuul, bagam bûgaalumabu bâkaañuworiitum, bagawem ajamaat ahep bûyeget, ban naluy, baamom ba Emitay êkinem. 5 Mata noo napiyaanu, yaaraay yaayu kagam ûyegetaw watayiil di Emitay, ma kûseekum yo, mo ma ya kûgaalunom, ma ya kujam di kupañooriil. 6 Non ma Saara ya ajammi di apañoorool Abrawoŋ, poopii ya aanool: “Annahaanaw ûmbaam.” Moo, mbi jiga kuñool Saara, miwuul bagawer jak, ban jeetubi jîkoli makeel.7 Miwuul poop yîinaay, mbi ya jibooroor kupañooruul, mata buko bukanaku kahammi mañemb, ban miwuul jîwoolim di manor di buko be bata eroŋay ya Emitay ewuum bukanaku. Moo, jiga mo ma makeel metuba muminden kalhawaku ka jilhawem Emitay.
Jimunten di hûlaamahu
8 Moo, ma îwuñen, neenuul miwuul peh mbi ya jinong hunongoor hanor, di jiga ûyegetaw watawuul tanor, di jîkinoor non batiyaay, di jiñankiitoor, ban poop di jiga bukanaku kahepum. 9 Aatuba mbi bukan kugawuul kôji, di jigalen, aatuba mbi bukan poop kugeluul, di jigeliil. Be mbi ya jiñaaniil ma kubaj hûpiira, mata miwuul poop mo ma Emitay êwoolumuluum, ma mbi ewuluul hûpiiraahu. 10 Mata dôdu ma ŋiicim kaan:
“Anaw âkimmi eroŋay, ban nâkin poop ma mbi ajuk kukaku kâsuumaaku,
mbi asoh butumabu batawool, ma atukalob wah wâkojiye,
aatuba alob elob yata mûcal;
11 nawaa'bo poop wahaw wajakutaaw, ma aga wahaw wajakaaw;
napaam kâsuumaayaku, ban nasoolhen ko.
12 Mata Ata Emit ya aga kûkilaku katawool di bukanaku kagawem jak;
ya aga poop ûjaŋayaw watawool di buko ma atallhen kalhawaku katayiil.
Be ya âŋiiken di bukanaku kagawem kôji.”
13 Kama jîkin jaa ma ya jiga jak, ay aalim agawuul kôji? 14 Mata palimo miwuul jigawe jak, be bukanaku di kûlaamenuul, jîmir kaan jibaje hûpiira. Be aatuba jîkoliyiil buko bâlhuseruul, aatuba ûyegetaw watawuul poop ûguulhoor matayiil. 15 Moo, jisoh Kristu di sîsigirasu satawuul, ma jigawool Ata Emit atawuul. Ban di jibandoor ma mbi jeeli jilaañen ânoowan arinkuum mata wahaw wa jîseekummi wa jikooben di wo. 16 Moo, jiga mo di ûyeget wahepe, di bûkolaabu, di poop banonger bajake, ma mbi bukanaku kalobem kôji mata buruŋabu bata Kristu kujuk bagawerabu batawuul, di kupuño. 17 Mata haŋ majak ma jîlaam, Emitay yoo bâkiner hûlaama'uhu, di maama mbi jîlaam mata ma jigam wahaw wajakutaaw.
18 Mata moomu poop ma Kristu âlaamum ma aket hanor mata kûbajumiñaku kata ejamaatay; oo anaw acolum, be naket mata bukanaku kacolutum, ma mbi aali aŋallolaal be baabu di Emitay. Malhegen di humuumahu nakeem, be ban nalhaalenumuli di kuketaaku di Buynum Bunapaabu. 19 Di Buynum Bunapaabu poop nakayum ki añaaŋen elobay yata Emitay sâaroorasu sata bukanaku sammi ma sikullhim, 20 kaamom kalatum kâynen na Emitay ya êlaamum di buko ma ya ekobiil nownu na Nowe ya acookoorum ebaarukay. Be bukanaku keemo hutok di êhaaji keb kulakonom di ebaarukay, ma Emitay emelhenumiil mumelamu. 21 Moo, mumela'umu, moo mugam êmanjumay yata kâbatismaku ka jîbatisumim jaat di ko ma jipak. Koo ntuwa jakulhen jata masemaamu mammi di eniilay, be koo kugam kasohooraku katoolaal di Emitay, kâcalhom di bûyeget basete. Kasohoora'uku ya kupaken an mata Jesus Kristu alhaalowulom di kuketaaku, 22 ban nakay be hatiya di emitay âriiŋ dô, Emitay di egawool di kaŋen kûrir kata yo, ma egawool annahaanaw ata kumalaakaku, di yahaan peh, di poop wah peh wata sembaasu wândom hatiya di emitay.