Huwaaliisahu haroŋaahu
2
Moo, jilat wahaw poowo wajakutaaw, di jabunten an, di jâhoolooraju, di jâsiibuwikooraju, di poop jâlobikooraju. 2 Jilhumo miilhamu masetaamu magam elobay yata Emitay, non ma balaabu bakitem di bubaji kulhumuwem miilhamu, ma mbi jeeli jikooben di buruŋabu bata Emitay, di jipak; 3 mata jilasuwe, jîmire kaan, Ata Emit nâsuunsum an. 4 Moo, jîhug ahikulaaw agam huwaaliisahu haroŋaahu,a a ejamaatay kulatum, be Emitay di ejot ho, mata ma hûtiynenim. 5 Miwuul poop, miwumu ma jigam non kuwaaliisaku karoŋaaku kateepumim eluupay yanapaay, ma mbi jiga bumaaŋenaabu bata Emitay kanapaaku, ka mbi ya kuwul opherta yanapaay ya yoo êkimmi mata Jesus Kristu. 6 Momakiimom ma ŋiicumim di Baŋiicerabu Bâñoyyaabu kaan:“Mbi iga hûwaaliisahu Siyoŋ ha ijotum hâtiynenim,
hagam kâjajaku kasoom eluupay;
anaw âynenhom, aatubi apuñuwerurer kaŋ kuur.
7 Huwaaliisa'uhu hûtiyneniye be bata miwuul jâynemmi;
be, be bata bukanaku kâynentum, huwaaliisahu ha
buteepaabu bulatum, hohalammi huga huwaaliisahu hagam kâjajaku kasoom eluupay.”
8 Di ŋiici poop kaan:
“Huwaaliisa'uhu hoo hugawem an âpungulho,
di huga poop hurimbiliŋahu hagawem an alo.”
Bukana'uku ya kûpungulho, mata ma kulatum kâynen elobay yata Emitay. Mata mo magawim be batayiil.
9 Be miwuul êbajoorumay yajotim kagam bumaaŋenaabu bata âyyaw, di jiga êsukay yanapaay, di jiga poop bukanaku ka kâwojulim be bata Emitay, ma mbi jiñaaŋen mata bugoroorabu bata yo yâwolluum di emuucenay, ma eŋalluul be di majaaŋaamu mata yo majakaamu. 10 Mata kâtiyaar jigawent êsukay yata yo, jîmirent poop kañankiitaku kata yo, be jaat jigawe ban êsukay yata yo, ban poop jiyabe ban kañankiitaku kata yo.
Bagawerabu bata anaw âynemmi Emitay
11 Moo, kutiyaay, neenuul non ma jigam emaasooraay yata ube di etaama'uye, nilhawuul ma aatuba jisoollhen mâsuumikooramu mata siniilasu satawuul, mammi ma mutiikem di sâaroorasu satawuul. 12 Be mbi ya jiga jak ta bukanaku kâmirutum Emitay kemmi; ma palimo buko kusoosenuul, be mbi kujuk wahaw wajakaaw wa jigawem, ña na mbi hukahu hûriiŋ ha Emitay mbi eyuugenolaal, di kusal yo.
13 Moo, hurim Ata Emit, mbi ya jijam di yahaan peh, di jijam di kîyyaku mata buko kugam yahaanay yâmakaay kata êsukay. 14 Di jijam poop di yahaan yaayu kata êsukay, ka kuboñem ma nki ya kusoh bukanaku kagawem kôji ma kulesiil, di kusal poop bukaaku kagawem jak. 15 Mata Emitay êkine ma jiga jak, ma mbi jeeli jikumb utumaw wata bukanaku kânuutuwaaku kâmirutum makeel. 16 Moo, jîwaayen di buruŋabu ba jemmi di bo, be aatuba jiŋar hûwaayenahu ha jeekum, jîmetenum wahaw wajakutaaw wa jigawem. Be mbi ya jiga non bugorooraabu bata Emitay. 17 Mbi ya jijam di an peh, di jîkin bukanaku peh ka jibomum kâynen, di jîkoli Emitay, di jîsuum poop kûlob be bata kîyyaku.
Jimunten di hûlaamahu non Jesus
18 Moo, miwuul jagam emiikeelay, mbi ya jijam di bukanaku kakiluum ma jiga bukanaku kâsummi kûlob be batayiil. Be ntuwa mbi jiga bukanaku kâsummi kûlob keb be bata bukanaku kakiluum kajakum ûyeget, be mbi jiga bukanaku kâsummi kûlob poop be bata bukaaku kakiluum kajakutum ûyeget. 19 Mata jake noon ma anaw amunten di hûlaamahu di bakooŋerabu batawool, mata ma agam bûyegetabu batawool di Emitay. 20 Kama jiga jaa kôji ma kûnaguluul, di jimunten di kûnagula'uku, kasal bu mbi jibaa'to? Be jiga jaa jak, ban di kûnaguluul, di jimunten di kûnagula'uku, di jîmir kaan wahaw uwu wo wa Emitay êkinem. 21 Malhegen wahaw uwu wo wa Kristu âwoolumuluum, mata oo poop namuntemuntemmi di hûlaamahu be batawuul, ma agawuul êmanjumay ya mbi ya jisoollhen. 22 Mata oo abajut kûbajumiñ, ban poop aloburerut nakeel mûcal, 23 be na kugeloom agalent, di kulesool, alobut makeel mâkojiye; be nâseekum anaw agawem batalenabu bacolum. 24 Ban oo aŋaam kûbajumiñaku katoolaal apeeno di humuumahu hatawool di êkrusay, ma ooliyaal uketaal di karebaku kata kûbajumiñaku, ma uroŋaal non ma Emitay êkimmi. Mata, mata kucokaaku katawool, kokakiimom ma jibuunenumim. 25 Malhegen miwuul jireesereesemmi non sîgaraniina sanepe, be jaat miwumu ban di kaŋenaku kata Âtekenaaw aamom aakum sâaroorasu satawuul.