KAYTAKU KÛTIYAARAKU KA
PEDRU
AŊIICUM
Pedru nasaap bûynenaabu
1
Înje Pedru jagam amakaaw ata Jesus Kristu, înje iŋiiculuum kayta'uke be bata miwuul jaamom ja Emitay ejotum, jammi ma jiwaasoorum di bâsukabu bata Pontu, di bata Galaasiya, di bata Kapadoosiya, di bata Aasiya, di poop bata Bitiiniya. 2 Miwuul Emitay yaamom Ampawolaal ejotuum non ma êkimmi, ma egawuul jiga êsukay yata yo hurim Buynumabu bata yo, ma mbi jeeli jiga bukanaku kanapum ka mbi kujam di Jesus Kristu, ma hûsimahu hatawool mbi hukulhenuul. Moo, Emitay ewuluul kañankiitaku, di kâsuumaayaku kayejum noon.Kañankiitaku kata Emitay
3 Moo, usalaal Emitay yagam Ampaw Ata Emit, aamom Jesus Kristu, mata hurim kañankiitaku kata yo kahahum noon, di egawolaal ma ubanjulankenaali ma mbi uroŋaal non ma aloom, mata jalhaalaaju jata Jesus Kristu di kuketaaku. 4 Momakiimom nubajumaal hûpiiraahu ma mbi uyabaal wahaw wa Emitay emmi mbi ewul, wa egam hatiya di emitay be batawuul, waatumbi ukuuñurer, weeliit ukaañowurer, weeliit poop ubolenurer.
5 Mata, mata kâynenaku katawuul, mo ma Emitay epooyumuum mata sembaasu sata yo, ma ewuluul kapakaku ka yoo êbandooraalim ma mbi êyis ko di kukaku kûbanumaku.
6 Moo, jake ma jîririgen, palimo ma ûyegetaw watawuul ûsuumutum mata ma jemmi di hûlaamahu ha mbi hubawo di kuka'uke. 7 Mata hûlaama'uhu, hûlowumuul ma kâynenaku katawuul mbi keeli kulasuwi, ma mbi jeeli jisali, di jibaj poop êriibiinaay di hukahu na mbi Jesus Kristu âkayil. Di îyis poop kaan, kâynenaku katawuul, kuhaŋe ûuru yakaañuwem, be ban ya elasuwi di sambunasu. 8 Malhegen palimo ma jijukutum Jesus, be di jîkinool, palimo poop ma jileem di jijukool mowme, be di jîynenool. Momakiimom ma jîririgenummi hûririgenahu haaliitum huliiki. 9 Moo, mbi jiyab wahaw wa kâynenaku katawuul kuwuluum, waamom kapakaku kata sâaroorasu satawuul.
10-11 Mata buñaaŋenaabu bata kûboñaku kata Emitay, ka ya kaloom mata kapaka'uku ka Emitay yemmi mbi ewuluul, kurinkurinkum, ban ya kupaam di sembe ma mbi kuga ma kûmir mata ko. Malhegen buñaaŋenaa'ubu bata kûboñaku kata Emitay, kupaampammi ma kûmir niŋanu na mbi kapaka'uku kujuki, di poop maama mbi kûriiŋul dêeni. Be Buynumabu bata Kristu, bobalakom di buko ma bugawiil kûmir maama mbi Kristu âlaam, di poop maama mbi êriibiinaay yata Emitay êrebooruu'doo. 12 Be Emitay di êyisiil kaan wahaw wa kulobem di wo, ntuwa be batayiil, be be bata miwuul. Moo, bukanaku kañaaŋenuum elobay yâsuumaay, koo kuñaŋenuum wahaw uwu mata sembaasu sata Buynum Bunapaabu bawalowulom hatiya di emitay. Wahaw uwu, kumalaakaku poop kûkineene ma kunamulen mata wo.
Eroŋay yanapaay
13 Moo, jibandoor ûyegetaw watawuul be bata wahaw peh wa mbi jiga. Di jijaamo, di jiga poop kâynenaku katawuul di kañankiitaku ka Jesus Kristu mbi añankiituul na mbi âkayil. 14 Non ma jigam kuŋilaku kajamem di Emitay, aatuba jiwaa'bo ûyegetaw watawuul ma ugenki di kânongikooraku kalakuwemmi di miwuul noo miwuul bâmirorut makeel. 15 Moo, non ma Emitay yâwooluum egam anaw anapum, miwuul poop mbi jiga bukanaku kanapaaku di wahaw peh wa mbi jiga. 16 Mata Baŋiicerabu Bâñoyyaabu beene: “Jiga bukanaku kanapaaku, mata înje anaw anapaaw.”
17 Non ma jilhawem Emitay di jîwoo'yo Ampawolaal, âgaworiitum ejamaatay ejuu'di buul, be ya aga batalenabu ânoowan wahaw wa agam. Moo, jîrees jak ube di etaamay ba jigam emaasooraay. 18 Mata miwuul jîmire kaan, ntuwa praata be mante ûuru yakaañuwem, jincaamumim ma jihikuli di jâgawikooraju ja jiyaam di simpawuul sihaan. 19 Be jihikulumi hûsimahu haseerum noon hata Kristu, haamom hagam non hata êgaraniina yaakutum hutamb hata maseme, ban êyijut tiŋ takeel. 20 Mata oo ajotim bala etaamay êwweni, ban di eŋallool maame di kuka'uke kûbanumaku mata ma êkinuum. 21 Mata, matawool momakiimom ma jîynenummi Emitay, yaamom yalhaalelloom di kuketaaku, ban di ewulool êriibiinaay yata yo, ma kâynenaku katawuul mbi keeli kulako di Emitay.
22 Moo, ma jigam bukanaku kajaaŋum mata ma jisoom malhegenumaayamu, ban ma jâkinooraju jata batiyaayabu balhegenumaayabu jemmi di miwuul, momakiimom ma mbi jênkenum ma jîkinoor di ûyeget wasete. 23 Mata, hurim elobay yata Emitay yâbuyuworiitum, Momakiimom ma jibajulankenumim, be ntuwa di ajamaat aketem, be di Emitay yâketoriitum. 24 Mata Baŋiicerabu Bâñoyyaabu mo ma buloom kaan:
“An peh omu ma agam non mahos;
majakamu matawool, momu ma mugam non bûrumpen.
Mata mahos ya alhaalh, bûrumpenabu bata mo, di bûlowul.
25 Be elobay yata Ata Emit, mbi elako to be nanoonan.”
Moo, ûde elobay yâsuumaay ya jiñaaŋenim.