Pedru nalob mata yahaanay yata grîsiya
5
Moo, mowme ma ilob di presbiteruyi kammi ta jemmi, nîkine eenuul înje jagam poop presbiteru non buko, înje anaw âmiim mata hûlaamahu hata Kristu, ban mbi êemi di jâyyenaju jatawool ja mbi jîyisi. 2 Nilhawuul ma jîteken jak hûtekenahu hata Emitay ha egam di uŋenaw watawuul, di ûyeget wajake non ma yoo êkimmi. Be ntuwa mata sembe, ntuwa poop mata hubaj, be jîteken ho di ûyeget wajake. 3 Ntuwa poop ma mbi ya jigawiil non ma jîkimmi, mata ma jigam yahaanay yatayiil, be jicookooriil ma mbi jiga sîmanjumasu be batayiil. 4 Moo, jiga mo jaa, na mbi âtekenaaw âmakaaw âriiŋul, mbi jiyab sînkuuhaasu sata bûgaalabu sata di majaaŋaamu saatumbi sikaañowurer.5 Moo, miwuul poop jagam ejaajuway, di ûjuraw, nilhawuul ma mbi ya jijam di bukanaku kagam yahaanay, ban mbi ya jiga anoowan najam di apaalool, mata Emitay êkinoriit bukanaku kagawooruwem, be ya êyis kañankiitaku kata yo be bata bukanaku kâgaworuworiitum. 6 Moo, jiwalenooro kayooŋ sembaasu sata Emitay ma mbi tîriiŋ yoo di eralhuul. 7 Di jiwalen hunongoor peh ha jeekum di kaŋenaku kata Emitay, mata yoo mbi yenenuul.
8 Be jiga to ûyegetaw watawuul ma aatuba jînanno, mata âsuumutaaw atawuul aamom diyaabu, omu ma ayuuŋoorem non êŋaŋ yâlundem ma ya epaam wah wa mbi ebuj ma etokoñ. 9 Moo, jijuum tir di kâynenaku katawuul be bata yo, mata moomu poop kaŋ ma kutiyuul kammi di âmbasuk peh kemmi ma kûlaamem di mo.
Hurimahu hûwuñenumahu
10 Be na mbi jiga jîlaame umu deh, Emitay yakiim kañankiit peh, yaamom yâwolluum mata Kristu ma jêemi di majaaŋaamu mata yo maatumbi mubawurer, mbi egawuul ma jiga bukanaku kârirum, kajummi tir, kabaam sembe, ban di egawuul poop ma jijuum jak di buruŋabu bata yo. 11 Mata yoo ekiim sembaasu be nanoonan. Amiin!
12 Moo, kayta'uke înje iŋiiculokom, be Silvanu agam atiyolaal agam anaw âynenaayaw a înje ijuum, oo ma aanenommi ma îŋiicuu'ko ma îyisuul, nusallhenuul poop kaan kañankiitaku kata Emitay, koo kañankiitaku kalhegenumaayaku. Moo, jisoo'ko lit. 13 Grîsiya yata êsukay yata Babilooniya, yaamom ya Emitay ejotum non ma ejotuum, esaapuluul, di poop Markus aamom añoolom. 14 Moo, jisaapoor di jâpoonooraju jata batiyaayabu. Kâsuumaayaku kulako di miwuul peh jaamom jata Kristu!