Bagawerabu ba Emitay êkinem
4
Kutiyaay, ûli nulhikitelhikitenuum maama mbi ya jiga ma Emitay êririgen di miwuul. Malhegen miwumu jagawem di mo. Moo, nûkine ukaawooruul ma ulhawuul di kañaaŋaku ka Ata Emit aamom Jesus, ma jihaŋ manken ma ya jiga mo.2 Mata jîmire wahaw wa ulhikitenuum di kañaaŋaku kata Jesus Kristu. 3 Mata wahaw wa Emitay êkimmi matawuul, êkine ma jiga bukanaku kanapum ma jiwaa'bo kâmooraaku. 4 Moo, ânoowan ata di miwuul, jake ma asoh eniilay yatawool ma ya aga wahaw wacolum, di waawu an peh mbi ajuk nasal, 5 ma aatuba jiŋar siniilasu satawuul ma jiga so di kâgawikooraku non ma bukanaku kâmirutum Emitay kugawem. 6 Moo, di wahaw uwe an ata di miwuul, aatuba abunten atiyool, an poop aatuba âgawikoor atiyool. Mata Ata Emit sûumoriitool wahaw uwu, non ma ubiim ulobuul, ma ugawuul jinamulen jak, mata oo ya ales bukanaku kagawem umu. 7 Mata Emitay êwoolutolaal be kâgawikooraku, be êwoololaal be bata wahaw wanapaaw. 8 Moo, anaw alatum eloba'uye, ntuwa elobay yata ajamaat natatum, be yata Emitay yawuluum Buynum Bunapaabu.
9 Moo, mata jâkin ajamaat, joonut ma iŋiicuul mata jo, mata Emitay elhikitenuu'ban maama mbi ya jîkinoor. 10 Mata malhegen mo ma jemmi ma jiboolaatum kutiyuul peh kammi Masedoniya. Moo, kutiyaay, nilhawuul ma jenken ma jihaŋ maga mo. 11 Di jipaam kâsuumaayaku ma kulako di miwuul. Aatuba jinebej di wah wajileem di wo, di jenken poop ma jigoroor di uŋenaw watawuul non ma ubiim bi ulobuul. 12 Mata jiga jaa umu, bukanaku kâynentum Jesus, mbi kusohuul jak, ban poop mbi jeeli jibaj wah peh wa jîkimmi.
Hukahu na mbi Jesus Kristu âlaañul
13 Kutiyaay, nûkine oonuul aatuba jiga non bukanaku kâmirutum mata bukanaku kakeem ban, ma aatuba jiga ñânkiiteni non bukan kaakutum wah wakeel wa kukobem di wo. 14 Mata nûynenaale kaan Jesus nakeekeem di êkrusay, ban nâlhaalowul di kuketaaku; moomu poop kaŋ ma ûynenaam kaan, bukanaku kakeem koo ma kûynemmi Jesus, Emitay mbi elhaalelliil di manor d'oo.
15 Moo, wahaw wa ulobem di miwuul malhegen, mata non ma Ata Emit aloom naane, ulaal jammi ma uroŋaam, na mbi Ata Emit âlaañul, ntuwa ulaal mbi ukaayaal kâtiyaar, ban nkit bukanaku kakeem. 16 Mata Ata Emit mbi alob di annahaanaw ata kumalaakaku, ma alob ma ujamaal hurimahu hatawool, nujamaal poop bawelerabu bata kârimaku kata Emitay, ña Ata Emit mbi âwalowul hatiya di emitay. Ña bukanaku kakeem koo ma kûynemmi di Kristu, koo mbi kûlhaalowul di kuketaaku kâtiyaar; 17 ban ulaal jammi ma uroŋaam, mbi uŋarooraali di manor di buko di uwiiñaw, ma nki upamaal di Ata Emit hatiya, ma nki ulakuwaal dô d'oo be nanoonan. 18 Moo, mbi ya jînikenoor di eloba'uye.