Jibandoor be bata hukahu hata Ata Emit
5
Moo, kutiyaay, joonut ma iŋiiculuul mata etaŋay, di kukaku na mbi wahaw uwu uga; 2 mata miwuul jîmire jak kaan Hukahu hata Ata Emit, mbi huga non hukahu ha âkuutaaw akayem ki âkuut busonna. 3 Mata na mbi bukanaku kêenul kâsuumaayaku kubaje, êsukay koku to jak, ña no na mbi buhiiraabu bûwubiil ma bûlowumiil ma wahaw ukaaño; non ma hukahu hata anñaakan aleem tîikoorool hugawem. Moo, mumulet bi kumellh no. 4 Be miwuul kutiyom, jilee'di emuucenay; moo, Huka'uhu hata Ata Emit, heetubi hûhubuul non ma âkuuta âwubem an. 5 Mata miwuul peh, bukanaku kata di majaaŋaamu, kagam kata tutulay; moo, ugawutaal bukanaku kata busonnaaru, ugawutaal poop bukan kata di emuucenay. 6 Moo, aatuba uŋotaal non bukan kaaku, be utonkuwaal, aatuba ûkaliyaal. 7 Mata busonnaaru no na bukanaku kuŋotem, busonnaaru poop no na bukanaku kûkaliyem. 8 Moo, ulaal ma ugawaam bukanaku kata tutulay, mbi ugawaal bukanaku kalhegenumaayaku, ma ugawaal kâynenaku katoolaal, di jâkinaju ma jiga ebangalay yata êsigiray, nugawaa'poop kapakaku ka ukobaalem di ko, ma kuga ênkuuhaay yata muhaañaayamu. 9 Mata Emitay ejotutolaal bi eles, be ejotolaal ma mbi ooliyaal upakaal, mata Ata Emit atoolaal, aamom Jesus Kristu, 10 oo akeem matoolaal, ma palimo ulaal uroŋaale, be mante nuketaal, mbi uroŋaal di manor d'oo. 11 Moo, jenkunenoor ma jeenenoor non ma jemmi ma jigawem di mo.Hurimahu hûwuñenumahu
12 Moo, kutiyaay, nulhawuul ma jijam di yahaanay kammi ma kugoroorem di tutaru tatawuul, kalhikitenewuum ma keenenuul ma jisoh buruŋabu bata Ata Emit; 13 di jisohiil jak ma jîboorooriil mata bugoroorabu ba kugawem di bo, ban di jiga poop ma kâsuumaayaku kulako di tutaru tatawuul.
14 Kutiyaay, nulhawuul poop ma jîlhus lhînŋa buhelekenaabu, di jenkunen bukanaku kâkoliyem, di jeenen poop bukanaku ka kâynenaku katayiil kubajutum sembe, ban di jiga bukanaku kamuntenem di an peh. 15 Di jijaamo ma an aatuba agalen di an agawoom kôji, be mbi ya jigawoor jak, di jiga poop jak be bata an peh.
16 Ban mbi ya jîririgen nanoonan, 17 di jilhaw poop Emitay nanoonan. 18 Di jeen yo jêrejep di wahaw peh, mata mo ma êkimmi ma jiga eroŋay yatawuul di Kristu Jesus.
19 Aatuba jihok sambunasu sata Buynum Bunapaabu; 20 aatuba jirembeel poop kûboñaku kata Emitay ka anaw aŋalluum. 21 Be mbi ya jilaso ko peh jak, ban di jisoh kaaku kajakum; 22 di jijaamuwoor poop wahaw peh wajakutaaw.
23 Moo, Emitay yawulewolaam kâsuumaayaku, mbi egawuul ma jiga bukanaku kanapum di wahaw peh; mbi epooy siniilasu satawuul, di uynumaw watawuul, di sâaroorasu satawuul, di poop kumuumaku katawuul. Ma jilako to baakut batila, be na mbi Ata Emit atoolaal, aamom Jesus Kristu âkayil. 24 Mata anaw âwolluum, oo anaw âynenaayaw, moo, mbi aga non ma aloom.
25 Moo kutiyaay, mbi ya jilhaw Emitay be bâtooli, 26 di jisaap poop kutiyolaal peh, di jasaapaju jata batiyaayabu.
27 Moo, di kañaaŋaku kata Ata Emit, nilhawuul ma kayta'uke mbi kupiseni ta kutiyolaal peh kemmi.
28 Moo, kañankiitaku kata Ata Emit atoolaal, aamom Jesus Kristu, di kulako di miwuul.