3
Momakiimom ma ôoliitummi umunten bajamut matawuul, ña nôonul ulako dîyoonoli di êsukay yata Ateenas, 2 ma ûboñul Timootiw be baabu di miwuul, aamom âtiyoli agam agorooraaw ata Emitay a ugoroorem be bata jañaaŋenaju jata elobay yata yo, ma nki âtikenuul, ma mbi kâynenaku katawuul keeli kujuum tir, 3 ma aatuba mbi an akeel âlandeel mata hûlaama'uhe, mata miwuul jîmire jak kaan, mata wahaw uwe wo wa Emitay êwoolumuum. 4 Mata na ulakotom di miwuul, nuñaaŋeñaaŋeñuum kaan, bukanaku mbi kûlaamenolaal mata buruŋabu bata Emitay. Moo, wahaw wa jîmiim wa ulobuum, woowu wagam. 5 Momakiimom ma êeliitummi imunten bajamut matawuul, mo ma iboñumulom Timootiw ma nki âmir mata kâynenaku katawuul. Mata înje omu ma îkolim ma êenul, mante Esatanaay di ehaatuul, ma bugoroorabu ba ûli ugoroorum, beetuba bugoroori ebeebel.6 Be na Timootiw alallom kayuugenaku katawuul, nâñaaŋenoli sûum mata kâynenaku katawuul, di poop jâkinaju ja jîkimmi bukanaku; nâñaaŋenoli poop kaan, miwuul ya jîwolhuwoli nanoonan, ban jîkine poop jîjukoli, non ma ûli poop ûkimmi ujukuul. 7 Moo, kutiyaay, palimo mata bûgayabu, di poop hûlaamahu ha ûlaamum peh, be na ujammi mata kâynenaku katawuul, ña nûnik. 8 Mowme ûli omu ma ûwaayemmi mata ma ujammi kaan, miwumu ma jijummi tir di buruŋabu bata Ata Emit. 9 Moo, ûli ûmirut maama mbi usal Emitay mata hûririgenahu ha ookum matawuul. 10 Momakiimom ma ulhawumem di Emitay di kañakat tutulay, di busonna, ma yeeli êwuloli buruŋ ma mbi ujukooraal, mbi ooli ubaŋenuul wahaw waŋañunom be bata kâynenaku katawuul. 11 Moo, Emitay yagam Ampawolaal, di Ata Emit atoolaal aamom Jesus, mbi kûwuloli buruŋ ma mbi ûkayil bi ujukooraal. 12 Nîkine poop ma Ata Emit aga ma jâkinooraju ja jîkinoorum, di poop ja jîkimmi an peh, jihaŋ to, ma jâkinoora'uju jire di jaaja ûli ûkinuum. 13 Nîkine poop ma Emitay yagam Ampawool, ega di sîsigirasu satawuul, ma jiga bukanaku kanapum, kaakutum batila di yo, na mbi Ata Emit atoolaal, aamom Jesus âkayil di bukanaku peh kanapaaku katawool. Amiin.