Bugoroorabu ba Pawlu agam Tesaloonika
2
Moo, kutiyaay, miwuul jîmire di kaan, jayuugenaju ja ukaylom bi uyuugenuul jigawut ebeebel. 2 Jîmire bu kûlesolim, di poop maama kûgelolim di êsukay yata Philipus. Be nurumen ma ûynen di Emitay yatoolaal, ma ûkayil bi uñaaŋenuul elobay yâsuumaay di hûlaamahu. 3 Moo, elobay ya uñaaŋenuum, egawut elob yata mûcal, egawut elob yata hunongoor hajakut, egawut poop yata kabunten an. 4 Be ya ulob non ma Emitay êkimmi, mata yoo yemmi aawo ma êwuloli bugoroorabu bata jañaaŋenaju jata elobay yâsuumaay yata yo. Moo, ûkinut uga ejamaatay ma kûririgen d'ûli, be ya ûkin uga Emitay êririgen, yaamom yalasuwem hunongoorahu hâtooli. 5 Malhegen miwuul jîmire jak kaan, ûli ûloboriit elob yata jâbebehen an, ntuwa poop yata ma mbi ûbajum to wah. Moo, Emitay êmire. 6 Ûpaamoriit poop ma an âsaloli, palimo miwuul, palimo an akeel. 7 Mata palimo ma ujoonum ma ulhaweenuul wah mata ma ugam kumakaaku kata Kristu, be nûboorooruul non ma anñaakan âbooroorem añoolool. 8 Malhegen mata ma ûkinuum noon, momakiimom ma ûwaayenummi ma uñaaŋenuul elobay yâsuumaay yata Emitay, ban ntuwa yoo keb, be nuwuluu'poop kumuumaku kâtooli, mata ma uboolaatuum noon. 9 Moo, kutiyaay, nîmire kaan miwuul jiwolhuwe jak na ûli ya uñaaŋemmi Elobay Yâsuumaay, maama ya ûlaamum ma ugoroor tutulay di busonna ma ubaj wahaw wata huriyahu, ma aatuba mbi ugawuul jînaaten mâtooli.10 Malhegen miwuul jagam bûynenaabu, di poop Emitay, miwuul jigam bujuumaabu batooli kâmiim na ulakom tutaru tatawuul, maama bagawerabu bâtooli busetum, di bucol, ban bûguulhoorut. 11 Moo, jîmire maama ûli ucookoorum ânoowan ata di miwuul, ma ugawuul non ma ampawaay acookoorem kuñoolool, 12 ma ya ulob di muwuul sûum, nûnikenuul, ban ya ucecenuul maama mbi jeeli jiga wahaw wa Emitay êkimmi, yaamom yâwooluum ma mbi jêemi di majaaŋaamu mata di kâyyaku kata yo.
Kâynenaku kata bûynenaabu bata Tesaloonika
13 Momakiimom ma ûli ôonumem Emitay jêrejep nanoonan. Mata na uñaaŋenuum elobay yata yo, di jijam yo, ban jisohut yo non elob yata ajamaat, be di jisoo'yo non elobay yalhegenumaayay yata Emitay, yaamom yagoroorem di miwuul jâyneyom. 14 Moo, kutiyaay, wahaw wagam di miwuul, woowu poop kaŋ wanoraw wagam di sîgrisiyaasu sata Emitay sammi jûdeya, sagam sata Kristu Jesus, mata non ma bukanuul kûlaamenuum, moomu poop kaŋ ma jûdewwi kûlaamemmi sîgrisiyaasu sata bo, 15 kaamom kabuum Ata Emit, aamom Jesus Kristu, di buñaaŋenaabu bata kûboñaku kata Emitay, ban poop di kûlaamenoli. Moo, buko kûgaworiit Emitay êririgen, ban poop di kuga bûsuumutaabu bata an peh. 16 Mata ya kûkin ma kûmindenoli ma aatuba mbi uñaaŋen elobay yata kapakaku be bata bukanaku kagawutum jûdew. Moo, wahaw uwu peh wa kugawem, ugawe ma kûbajumiñaku katayiil kûriiŋ ta Emitay eliikum. Momakiimom ma hubirikahu hata yo hûlowumiim.
17 Moo, kutiyaay, malhegen di kuka'uke ulaal ma ûrangooraam ma ujukoorutaam, be sîsigirasu satoolaal sosu tanor. Mata ûli manongoorem noon matawuul, moo, nûkine ujukuul. 18 Momakiimom ma ûkinummi ûkayil bi iyuugenuul. Mata înje Pawlu, ntuwa hanor keb nîkinemmi îkayeenul bi iyuugenuul, be esatanaay ewulutom buruŋ. 19 Kama na mbi Ata Emit atoolaal aamom Jesus Kristu âlaañul, ntuwa miwuul mbi jikii'mo ûli nuyab wahaw wa ukobem di wo, nûririgen, nuyab poop sînkuuhaasu sata bûgaalabu? 20 Malhegen miwuul mbi jîgawoli ubaj êriibiinaay, di jîgawoli poop ûririgen.