KAYTAKU KÛTIYAARAKU KA PAWLU AŊIICUM BE BATA GRÎSIYA YATA
TESALOONIKA
Pawlu nasaap grîsiya yata Tesaloonika
1
Înje Pawlu, di Siilas, di Timootiw, ûli uŋiiculom kayta'uke be bata êgrisiyaay yammi Tesaloonika, yaamom yata Emitay yagam Ampawolaal, di Ata Emit aamom Jesus Kristu. Moo, nîkine ma Emitay eñankiituul ma ewuluul kâsuumaayaku.Kâynenaku kata bukanaku kata Tesaloonika
2 Malhegen ya oon Emitay jêrejep matawuul peh, ban ya ûwool uñaaŋaw watawuul ma ulhaw yo hukoohuk be batawuul. 3 Mata ûli nuwolhuwe jak kayooŋ di Emitay yagam Ampawolaal, mata ma kâynenaku katawuul kugawuum ma ya jiga wahaw wajakaaw; di poop ma bâkinerabu ba jîkimmi, bugawuum ma jigoroor lhînŋa be bata Ata Emit aamom Jesus Kristu, mata ma kâynenaku katawuul d'oo kûlhiŋum. 4 Moo, kutiyaay ka Emitay êkimmi, ûli nûynene kaan Emitay ejotuum. 5 Mata na uŋalluum elobay yâsuumaay, uŋalloot yo di elob lob keb, be, be di sembaasu sata Buynum Bunapaabu, di poop malhegenumaayamu; ban poop jîmire maama ûli ya ugam too di miwuul, majak be batawuul.
6 Momakiimom di jisoollhen bagawerabu bâtooli, di bata Ata Emit. Mata palimo ma jîlaamum noon, be di jiyab elobay yata Emitay di êsuumaay yaamom ya Buynum Bunapaabu buwuluum. 7 Momakiimom ma jîgawummi êmanjumay be bata bûynenaabu bata Masedoniya, di bata Akaya, 8 mata elobay yata Ata Emit, di miwuul êcaalhummi ma ewaasoor di êsukay yata Masedoniya, di yata Akaya, di poop bâsuk baabu. Moo, kajamaaku kata kâynenaku katawuul di Emitay, kujamuwe di bâsukabu peh, poopii ña ûli ubajut joon maama mbi ulob; 9 mata buko peh ya kulob mata jacookooraju ja jîcookoorolim na ukaylom bi uyuugenuul, di poop maama jibeem ûkiinaw, ma jisoh Emitay yaroŋaay yagam yalhegenumaayay, 10 di poop jakobaju ja jikooben di jo Añool yo, a mbi âcaalhumul hatiya di emitay, aamom Jesus Kristu, a Emitay elhaalellom di kuketaaku a mbi amellhenolaal di hubirikahu hata yo hâreesewuum.