Opherta yawulim be bata bûsukateenaabu bata Jûdeya
8
Kutiyaay, nûkine uñaaŋenuul mata kañankiitaku ka Emitay ewuum grîsiya yata Masedoniya. 2 Mata palimo ma kulakom di hûlaamahu harem noon di wahaw lhay, ban poop di hûsukateenahu ha kulakom di ho, be di kûririgen noon ma kuwul opherta yahahum noon. 3 Moo, ma irejuum di kaan, buko kuwule opherta yahahum noon yahammi yaayu ya keeliyemmi kuwuleen. Mata an bagawutiil di sembe, 4 di kûwaasiyenooroli ma kêenoli uwalhii'bo ma kuwul opherta be bata bûynenaabu bata Jerusaleŋ. 5 Moo, opherta ya kuwuum, ehaŋe maama ûli unongemmi. Mata kâtiyaar, di kuwalen siniilasu satayiil be bata Ata Emit, ban di kuwalen so poop be bâtooli non ma Emitay êkimmi. 6 Momakiimom ma ûlhawummi Tiitu âcukum bugoroora'ube bata jayabaju jata opherta, ma âkayil bi âwuñen bo di miwuul. 7 Moo, jîyise di kaan miwuul jisaanumuwe di wahaw peh: di kâynenaku, di baloberabu, di kanamulenaku, di jagawaju jata wajawaj be bata jaanenaju jata bukanaku, di poop maama jîkinolim. Ban poop di jiga di sembe ma ya jihaŋ mawul opherta.8 Moo, ilee'nigawuul di sembe, be nîkine ilobuul maama bukan kaaku kugam ûyegetaw watayiil di jawulaju jata opherta, ma mbi ilaso mante jâkinaju jatawuul jalhegenumaayaju. 9 Mata miwuul jîmire mata kañankiitaku kata Ata Emit atoolaal aamom Jesus Kristu, mata palimo ma asaanumom, be hurim jâkinaju ja âkinuum, nalaañ agawooro âsukateenaw ma aali agawuul jisaanumo.
10 Moo, di hunongahu hûmbaam, jenken ma jiga bugoroora'ubu, mata miwuul jigam bukanaku kâtiyaaraku kanongum mata bo sunken, ban di jîcuk bo. 11 Moo, non ma ûyegetaw watawuul ulakom di bugoroora'ube na jîcukubom, jenken ma jiga wo di bo be na mbi jîwuñen bo, ma jiwul wahaw wa jibaam. 12 Mata anaw âkin jaa awul Emitay opherta ya abaam, mbi eyaa'yo, be eetubi elhaw anaw umu wahaw wa abajutum.
13 Moo, ntuwa neene ma iga bukan kaaku ma kuyiiliyen, ma miwuul jînaaten, be nîkineene ma miwuul peh jirewen. 14 Mata mowme jibaje wahaw lhay, moo jeeliye jiwul opherta bukan kaaku kabajutum. Moo, na mbi miwuul poop jibajut, ma buko kubaj, di kuwuluul. Ña miwuul peh di jirewen, 15 ma ga non ma Baŋiicerabu Bâñoyyaabu buloom kaan: “Anaw nabaj wahaw lhay, be aŋañent wah, aahu abajut, be wah poop umankiitool.”
16 Moo, nusale Emitay noon mata ma egam hunongahu hanorahu di êsigiray yata Tiitu, non ma ûli unongoorem di mo matawuul. 17 Mata oo ntuwa wahaw wa ulhawoom keb nagam, be di hunongoorahu hatawool an bañuusutool, nâanul âkayil be baabu di miwuul. 18 Moo, mbi ubollool ma kûreboorul koo di atiyolaal aahu a bukanaku peh kata grîsiya kusalem mata bugoroorabu ba agawem bata jañaaŋenaju jata elobay yâsuumaay. 19 Ban poop ntuwa wahaw uwe keb, be oo sîgrisiyaasu sijotum poop ma areboor d'ûli di bugoroorabu bata jaŋaraju jata opherta, ma yîs maama ûli ûkimmi oonen, ma Ata Emit mbi asali.
20 Moo, nûkine ujaamo di bugoroora'ube bata jaŋaraju jata opherta'uye yarem noon, ka mbi êsukay êcecenoli. 21 Mata di hunongahu hâtooli, nûkine ma uga wahaw acolum di Ata Emit, di poop ejamaatay.
22 Mbi ûboñul poop atiyolaal aahu a mbi âreboorul di buko, a ûli ulasom uyaas wameeŋe nûmir kaan oo anaw aakum bûyegetabu bata jaanenaju. Moo, maame nahaŋ mabaj bûyegetabu bata jaanenaju mata kâynenaku karem noon ka âynenuum. 23 Moo, Tiitu oo apaalom ata di bugoroorabu bata jaanenaju jatawuul. Kutiyolaal bukaaku ka mbi kûreboorul d'oo, buko grîsiya ebolliim. Moo, ûdu peh ma Kristu asali. 24 Moo, jake ma jicookooriil, ma mbi grîsiya saasu sîmii'mo, di sêenul kama ma usaluum malhegen.