7
Moo, kutiyom ka iboolaatum, magam Emitay yeene mbi ega wahaw wa elobolaam, ña ubetaal wahaw peh wasemenem siniilasu satoolaal, di poop sâaroorasu, ma ûkoliyaal Emitay ma ugawaal jak be bata yo.
Pawlu nâririgen
2 Moo, jinong jak di sîsigirasu satawuul mâtooli, mata ugawut an akeel kôji, ugawut an buhiira, ubuntent poop an akeel ma ubot wahaw watawool. 3 Be ma ilobuum ume, ntuwa neene ma iwuluul kûbajumiñ. Mata niñaaŋeneenuu'ban kaan, miwuul ûli umu ma usohuum jak di sîsigirasu sâtooli, palimo ma uketaal tanor, be mante ma uroŋaal. 4 Mata malhegen nîynenuul meeŋ, momakiimom ya isalooro matawuul; ban poop ya îwaayen ma îririgen noon, palimo ûli ulakuwe di buhiirawoohiira.
5 Moomu poop kaŋ na ûrimmi Masedoniya ubajut kahepulen, ma kûlaamenoli di kumuumaku kâtooli di wah peh, di kûgawoli poop ma bûkolaabu bulako di ûyegetaw wâtooli. 6 Be Emitay yâtikenem anaw abeñom, di êgawoli ûtik na Tiitu ârillom. 7 Be ntuwa mata ma ârillom keb, be mata ma âñaaŋenolim kaan miwuul jîtikellom, ban poop nâanoli miwumu ma jigam ñânkiiteni mata ma jîkimmi jijukom, di poop maama jemmi ma jinongoorem mûmbaam. Momakiimom ma îhaŋummi mâririgenum.
8 Palimo ma kaytaku ka iŋiiculuum kugawuum jilako ñânkiiteni, be iwatatenoorowut mata ma iŋiiculokom. Malhegen niwatatenooruweene na îmiim kaan kayta'uku kugawuugawuum kuk kaaku jilako ñânkiiteni. 9 Be mowme nîririgene, ntuwa mata ma igawuum jilako ñânkiiteni, be mata ma jâñankiiteniya'uju jigawuum jiwatatenooro. Moo, Emitay eŋaam kâñankiiteniya'uku êgoroorum be batawuul, momakiimom wahaw wa uŋiiculuum ugawutuul kôji. 10 Mata jâñankiiteniyaju jâcaalhumulom di Emitay, ya jiga an ma awatatenooro ma abaj kapakaku, kaamom kâgaworiitum an abuj ekomben. Be jâñankiiteniyaju jâcaalhumulom di etaama'uye, ya jîŋarul eketay. 11 Moo, mowme Emitay egawe ma jâñankiiteniya'uju jigawuul jiga bukanaku kasohem wah di malhegen, di jeenenooro di buhiira; di kugawuul ma jibirik, di jîkoli poop. Di kugawuul poop ma jiga bukanaku kanongoorem mata bukan, poopii di jîkin ma jiles anaw agam kôji; moo, di wahaw we peh, jibajut batila.
12 Be ntuwa înje iŋiiculuum kayta'uke be baabu di miwuul mata anaw agam kôji, ntuwa poop mata anaw a anaw umu âlaamemmi, be iŋiiculuu'ko ma eeli igawuul ma jîmir kaan, Emitay êmire maama jinongoorem mâtooli. 13 Momakiimom ma ûli ûtikummi. Ban ntuwa jâtikaju nûtikum keb, be na Tiitu ârillom, nâgawoli ma uhaŋ mâririgen, mata ma jeenenoom ma âwaayen. 14 Momakiimom ma înje isalooruwem matawuul, mata jipuñentom. Mata wahaw wa ulobewuum, wahaw walhegenumaayaw, momakiimom nusalumuul kayooŋ Tiitu, ma îyis poop kaan wahaw wa ulobem matawuul malhegen. 15 Moo, na mbi awolho maama miwuul peh ya jijammi d'oo, di poop maama jiyaañuwoom di bûkolaabu dilo, poopii ya jiboboken, ña bâkinerabu ba âkinuum di buhaŋ mabaj sembe hukoohuk. 16 Momakiimom ma îririgenummi noon, mata nîynenuul di wah peh.