6
Moo, ûli jammi ma ubomum bugoroorabu di Emitay, nulhawuul ma aatuba jirembeel kañankiitaku ka yoo ewuluum. 2 Mata moo eloom yêenul:“Na hukahu hûrimmi,
niñankiituul ma ijamuul.
Nata hukahu hata kapakaku, nihikuluul.”
Moo, hukahu hata kañankiitaku hûriiŋe; jaat hukahu hata kapakaku.
3 Momakiimom ma ûli ûkintummi ma ûlaamen an, ma aatuba mbi bugoroorabu bâtooli bûyij. 4 Be di wah peh, ya uga ma bukanaku mbi kûmir kaan ûli bugorooraabu bata Emitay. Momakiimom ya umunten di hûlaamahu, numunten poop ûli babajut wah. 5 Di kûnoguloli, di kûkullholi, di kûsikumoli; nugoroor lhînŋa, kuk kaaku nulako to baŋotut, naanu bariit. 6 Ban ma ûyegetaw wâtooli usetum di bugoroorabu, ya ubaj kanamulenaku, di humuntenahu, di mâsuumamu, di jaboolaat bukan di malhegen, mata Buynum Bunapaabu. 7 Moo, mata sembaasu sata Emitay, di poop maama uñaaŋenem elobay yalhegenumaayay; wahaw uwu peh ûyisum kaan ûli bugorooraabu bata Emitay. Mata ûli umu ma usoom siniilasu sâtooli ma seeli siga non wañ wa mbi ûtiikum, di poop waawu wa mbi ûmelhoorum. 8 Moo, elob peh ya elo d'ûli; mata kaaku ya kûsoholi jak, kaaku di kûsoholi kôji; kaaku ya kûsaloli, kaaku di kûlobikooroli. Ya kûsoholi non bukan kabuntenem bukan, be ya ulob malhegen. 9 Bukanaku kâmirolim, di kûgawoli non kûmirutoli; di kûgawoli poop non bukan kakeem, ban ulumu ma urommi; ya kûlesoli, be uketut. 10 Kuk kaaku ya kûgawoli uga ñânkiiteni, be nanoonan ya ûririgen; nûsukateeno, be ya uga bukan kameeŋe ma kusaanumo. Nuga poop non bukanaku kaakutum makeel, be di malhegen ûli umu ma ubaam wah peh.
11 Moo, kutiyom jata Kôrintu, ûli nulobuulobuum salh; ûñooroorutuul wah wakeel di sîsigirasu sâtooli. 12 Mata ntuwa ûli ûkintum ma jîmir wahaw wammi di sîsigirasu sâtooli, be miwuul jîkintum ma ûmir waawu wammi di satawuul. 13 Mata înje malobem di miwuul non ma ampawaay alobem di añoolool. Moo, jake ma jiga ma ûli ooli ûmir wahaw wammi di sîsigirasu satawuul.
Jijaamo majakutaamu
14 Aatuba jisohoor di bukanaku kâynentum Emitay. Mata bu wahaw wacolaaw weelim ujamoor di waawu wacolutum? Bu majaaŋaamu meelim mujamoor di emuucenay? 15 Bu Kristu keelim kujamoor di Esatanaay? Bu anaw âynemmi Emitay aalim kujamoor di aahu âynentuyom? 16 Bu eluupay yata Emitay yeelim sijamoor di yata bâkiinabu? Mata ulaal ugawaam Eluupay yata Emitay yaroŋaay; non ma Emitay eloom yêenul:
“Înje mbi ikin tanor di buko;
mbi irees di tutaru tatayiil.
Mbi iga Emitay yatayiil,
buko di kuga bukanaku kûmbaam.”
17 Momakiimom Ata Emit nâanul:
“Jîcaalh di tutaru tata bukanaku kâmirutum Emitay; jiwaasoor di buko.
Aatuba jigor miñ makeel maseme,
ma mbi eeli yabuul;
18 di jiga kuñoolom
kîinaaku, di kaaku
kaaraaku. Mo ma Ata Emit Akiim Sembe Peh aloom.”