Hukinahu hatoolaal hatiya di emitay
5
Mata ulaal nûmiraale kaan, na mbi eluupay yatoolaal yata ube di etaamay, yaamom eniilay yagam bukapabu ewapi, Emitay mbi ewulolaal eluup yaayu hatiya yateepumutim di kaŋen kata ajamaat, yaatumbi ekaañowurer. 2 Momakiimom ma siniila'use sa ookaam semmi ma sîlaamumem, mata ma ûkinaam ma sisoleni siniil saasu sa mbi siga hukinahu hatoolaal hatiya di emitay. 3 Moo, na mbi sisoleni, ootubi ulakuwaa'to way. 4 Malhegen, ma uroŋaam di bûngunga'ubu bata di etaamay, bagam siniilasu satoolaal, ulaamaal di hûlaamahu; ntuwa mata ma ûkinaam ma siniilasu sata ube di etaama'uye sitiinoori, be mata ma ûkinaam ma uyabaal saasu sata hatiya di emitay, ma saasu saroŋaasu mbi simer saasu saketem. 5 Moo, Emitay yoo ebandoorolaamom ma mbi etiinoorolaal, mata mo ma ewulumolaam Buynumabu bata yo, ma yîs kaan mbi ega non ma eloom.6 Momakiimom ma ûli ûnikumem nanoonan, mata nûmire kaan ma oomaam para ma ukinaam di siniila'use, ootubi ulakuwaal tanor di Ata Emit; 7 mata ulaal di kâynenaku nuroŋumaam, be ntuwa mata wahaw wa ujukaalem. 8 Momakiimom ma ûli ûnikummi poopii nûkin ubet siniila'use, ma ukay ki ulako tanor di Ata Emit. 9 Mata wahaw wa ûli uhaŋ mâkin, ma ugawool âririgen d'ûli di siniila'use, palimo poop ûli balee'di so. 10 Mata ulaal peh mbi ujuumenaali di kâyyaku kata batalenabu bata Kristu, ma anoowan mbi ancaami wahaw wa agam di eniilay yatawool, ga jaa oo agam jak, be mante naga kôji.
Kajamooraku katoolaal di Emitay
11 Moo, non ma ûli ûmiim mata kâkoli ata Ata Emit, momakiimom ma ulobumem di bukanaku poopii nuhaatiil. Malhegen Emitay êmire hunongahu hâtooli peh; moo, nûynene kaan, di ûyegetaw watawuul poop jîmiroli. 12 Moo, ntuwa ûli usalooruwem joon matawuul, be ma ugawuul ma jeeli jisalooro mâtooli, ma mbi jeeli jibaj maama mbi jilob bukanaku kasalem keb bukan mata haanaahu hatayiil, balasowut maama sîsigirasu satayiil seenom. 13 Moo, ga jaa non kûkuwaku kâtooli kûsuumut, ña kama jake be bata Emitay. Be ga jaa poop non kûkuwaku kâtooli koku to ma kujakum, ña di jak be batawuul. 14 Malhegen jâkinaju jata Kristu joju d'ûli noon, mata ûli nûmire kaan, anaw anor akeem be bata ejamaatay peh, ma bukanaku poop peh kêemi di eketay yatawool. 15 Malhegen oo akeem be bata an peh, ma bukanaku karommi, keetubi kuroŋ joon be batayiil, be di kuroŋ be bata anaw umu akeem matayiil, ban nâroŋul.
16 Momakiimom, hukahu hata jaat be kayooŋ, ûjikeroriit ban bukanaku non ma ejamaatay kata di etaama'uye kujikereyiim; mata ya ujikereen Kristu non ma bukanaku kata di etaama'uye kujikerewoom, be jaat ûjikeroriitoo'mo. 17 Mata anaw ammi di Kristu, naga anaw unkulaw; wahaw wahaanaw di ubawo, ma eroŋay yatawool ega yunkulay. 18 Wahaw uwe peh Emitay egawewom, yâgawolim ma ujamoor di yo mata Kristu, ban di êwuloli bugoroorabu bata jagawaju jata bukanaku ma kujamoor di yo. 19 Moo, nûkine ulobuul oonuul, Emitay êkine ma ega kâsuumaay di bukanaku peh kata di etaamay, ma ebet wahaw peh wajakutaaw wa kugam. Momakiimom ma êboñumolim ma uñaaŋen bukanaku elobay yata yo ma keeli kujamoor di yo.
20 Momakiimom ma ukaayumulom non bujuumaabu bata Kristu, ma Emitay êlobumul di utumaw wâtooli be batawuul. Moo, nulhawuul di kañaaŋaku kata Kristu, ma jiga kâsuumaay di Emitay. 21 Mata Kristu abajut kûbajumiñ, be Emitay di egawool non anaw abaakom matoolaal. Moo, mata kasohooraku katoolaal d'oo, ko ka Emitay egawumolaam ma ugawaal bukanaku kacolum di yo.