Husaanumahu hammi di elompay yata bukapabu
4
Mata Emitay di kañankiitaku kata yo, mo ma êwulumolim bugoroora'ube; moo, ootubi ubeño. 2 Momakiimom ma ûlatummi wahaw peh wâpuñunenim, wa ejamaatay kûñooruwem ma kuga. Ugawut bukan kagugujoorem, ûlaworiit poop elobay yata Emitay. Be ya ûkin ma bukanaku peh kunamulen di ûyeget wasete, ma kûmir malhegenumaayamu mammi d'ûli kayooŋ di Emitay. 3 Moo, ga jaa non elobay yâsuumaay ya ûli uñaaŋenem mata yo yoyu ma êhipenim, ña kama di bukanaku ka mbi kunep yemmi ma êhipenim. 4 Mata Esatanaay yagam emitay yata etaama'uye, yoyu ma egam hunongahu hata bukanaku kâynentum ma humuucen, ma keetubi kujuk majaaŋaamu mata elobay yâsuumaay yâyisem sembaasu sata Kristu, aakum haanaahu hata Emitay. 5 Mata ûli ûñaaŋenoorit mâtooli, be ya uñaaŋen mata Kristu Jesus, aamom Ata Emit; ûli nuga bugorooraabu batawuul mata Jesus. 6 Mata Emitay yammi majaaŋaamu muhikiten di emuucenay, yooyu poop kaŋ yagam sîsigirasu sâtooli ma sijaaŋ, ma mbi unamulen mata majaaŋaamu mata yo, mammi di buulabu bata Jesus Kristu.7 Moo, husaanuma'uhe hata Emitay, hohu d'ûli jagam poop non silompasu sata bukapabu, ma mbi mîri di malhegen di kaan, sembaasu sammi d'ûli ntuwa sâtooli, be Emitay ekiisom. 8 Mata kuk kameeŋe ya ubaj hûlaamahu, be hûhaateriitoli; nûlandeel, be ûbeñuworiit; 9 nubaj bukan kameeŋe kâsuumutolim, be Emitay êwalhoriitoli dîyoonoli; di kûcokoli, be ûketoriit. 10 Tiŋ peh ta ukaayum, ya uŋarnen eketay yata Jesus di siniilasu sâtooli, ma mbi eroŋay yatawool yeeli ejuki di siniilasu sâtooli. 11 Mata palimo ma ûli ommi ma urommi, be ulumu ma uñuurim be eketay mata Jesus, ma eroŋay yatawool mbi ejuki di kumuumaku kâtooli kaketem. 12 Ña eketay di yêemi d'ûli, ma eroŋay yêemi di miwuul.
13 Mata Baŋiicerabu Bâñoyyaabu beene: “Înje nîynene, momakiimom nîlobum.” Moo, ûli poop di buynumabu banorabu bata kâynenaku, ûli nûynene, momakiimom ma ûlobummi. 14 Mata ûli nûmire di kaan, Emitay yalhaalellom Ata Emit aamom Jesus di kuketaaku, yoo mbi êlhaalelloli poop di kuketaaku ma êŋaroli di manor di miwuul be baabu di yo. 15 Moo, wahaw uwe peh, uga mata bâkinerabu ba Emitay êkinuum, ma kañaŋkiitaku kata yo mbi kuhaŋ mâriiŋ di bukan kameeŋe, ma bukan kameeŋe poop mbi keen yo jêrejep mata mâsuumamu mata yo.
16 Momakiimom ma ûbeñowumoriitum. Mata palimo ma siniilasu sâtooli semmi ma sibawem, be dâada d'ûli, dôdu ma di cookoorlankeneyim hukoohuk. 17 Malhegen hûlaamahu hinŋeta'uhe haatumbi hupiyo ha ûli ommi di ho, mbi hûŋalloli êriibiinaay yâamak yaatumbi ebawurer, yahahum noon. 18 Mata ûli ûjikeroriit di wahaw wajukeyim, be ya ujiker di waawu wâjukoriitim, mata waawu wajukeyim ya ubawo, be waawu wâjukoriitim, ya ulako to be nanoonan.