3
Moo, kama ûli uloo'jaa ume, ña ûli usalooruwem joon? Be mante mbi uwuluul uytaw waloom mâtooli, be mante poop miwuul di jîwuloli watawuul, non bukan kaaku? 2 Miwuul jigam kaytaku kâtooli kaŋiicim di sîsigirasu sâtooli, ka an peh aalim âmir, naali poop apisen. 3 Malhegen miwuul jigam kaytaku ka Kristu aŋiicum mata bugoroorabu bâtooli. Moo, kugawut kayit kaŋiicumim êtintaay, be kuŋiicumi Buynumabu bata Emitay yaroŋaay. Ntuwa poop di kataguwa kata huwaaliis, be di sîsigirasu sata ejamaatay.4 Ûli uloom ume mata kâynenaku ka ubaam di Emitay, mata Kristu. 5 Moo, wah wakeel ulet d'ûli waalim ûgawoli ma ôonul nooliye uga wah wakeel; mata sembaasu sa ubaam, ya sîkayumul di Emitay. 6 Mata yoo êgawolim ma ooli uñaaŋen bukanaku mata yaŋaayay yunkulay, yagawutum kûboñaku kaŋiicim, be kata buynumabu bata Emitay. Mata kûboñaku kata Emitay kaŋiicim, ya kubuj, be Buynumabu bata Emitay, ya bûwul eroŋay.
7 Mata palimo ma kûboñaku kata Emitay kaŋiicim di baleeterabu di utaaguwaaw wata kuwaaliisaku kuŋallom eketay, be majaaŋaamu mata Emitay, mukaylokaylom nownu na kûboña'uku kuwulim. Momakiimom ma buulabu bata Moyses bûjaaŋummi poopii êsukay yata Israyel kubajut kujikerool. Moo, kûboña'uku kûkayil jaa di majaaŋaamu mahahum umu, 8 bu mbi bugoroorabu bata Buynumabu Bunapaabu, betumbi buhaŋ mabaj majaaŋa? 9 Malhegen kûboñaku kata Emitay kabujem, kûŋaruu'jaa majaaŋaamu; benkiteemo majaaŋaamu mata Buynumabu bata Emitay bagawem an acol! 10 Mata majaaŋaamu mapiyaamu mugawengawemmi nownu majaaŋaamu magam jaŋaŋaŋ, be jaat meeliit muliiki di mata maame, mata, mata meeme, muhaŋ mo. 11 Moo, majaaŋaamu mâpiyuworiitum muga jaa jaŋaŋaŋ, benkiteemo maama mbi mulako to be nanoonan.
12 Momakiimom ma ûli ûlobumem bâkoliit mata ma ûynemmi di wahaw wa ukobem di wo. 13 Ûli ugawut non Moyses aŋaam bew âhipemmi buulabu batawool, ma bukanaku kata Israyel keetubi kujuk non ma majaaŋaamu ya munepum di buulabu. 14 Mata ûyegetaw watayiil wowu ma ûhipenim. Momakiimom be jaat, na mbi kaytaku kata yaŋaayay yapiyaay kupiseni, bew ya êhipen ûyegetaw watayiil. Moo, bew uyu, ya êcaalh keb na mbi anaw kusohoor di Kristu. 15 Moomu poop kaŋ be jaat, na mbi kaytaku kata Moyses kupiseni, ña bew uyu di êhipen ûyegetaw watayiil ma keetubi kunamulen. 16 Be na mbi anaw anebej di buruŋabu bata Ata Emit, ña bew uyu di êcaalheni. 17 Moo, Ata Emit oo Buynum Bunapaabu. Mata ta Buynumabu bata Ata Emit bemmi, an peh ya âwaayen. 18 Be ulaal peh ma wuulaw watoolaal ûhipulim, wowu ma ugam jaŋaŋaŋ majaaŋaamu mata Ata Emit. Moo, Ata Emit aamom Buynum Bunapaabu, mbi ya atiinoorolaal ma majaaŋaamu ya muhaŋ to, poopii nutookaal haanaahu hatawool.