9
Moo, joonut ma iŋiiculuul kaytaku mata opherta yawulim be bata bûynenaabu bata Jerusaleŋ. 2 Mata nîmire kaan miwuul ûyegetaw watawuul wowu to di jaanenaju. Momakiimom ma isalumuum kayooŋ bukanaku kata Masedoniya, ma eeniil miwuul jata Akaya, ûyegetaw watawuul wêemaaliye di jawulaju jata opherta kata kaŋ sunken. Moo, hunongahu hatawuul hutonke bukan kameeŋe. 3 Moo, ma ibolluul kutiyolaal buke, ma non ma uloom matawuul mata jawulaju jata opherta jeetuba jiga elob ebeebel. Moo, nîkine ma mbi jibandoor, ma mbi jiga non ma ilobiim matawuul. 4 Mata bukanaku kata Masedoniya kûrebooru jaa d'înje, kûriiŋul kujukutuul ma jibandoorum, ûdu ñipuñaañu ñâamak be bâtooli jâynenuum. Ban miwuul poop mbi jipuño. 5 Momakiimom nêenul mbi ilhaw kutiyolaal buke, ma kuyabulom kayooŋ, ma nki kubandoor opherta ya jemmi mbi jiwul, ma ebandoori bala îkayil. Moo, ebandoori jaa peh, di yîs kaan jiwule opherta di ûyeget wahepe an bagawutuul di sembe.
6 Jiwolho kaan anaw agiitemmi jinŋet, mbi abaj poop jinŋet. Anaw agiitemmi lhînŋa, mbi abaj poop lhînŋa. 7 Moo, ânoowan nawul opherta maama anongum di êsigiray yatawool, bagawut ñânkiiteni; ban ntuwa poop di sembe, mata Emitay êkinkin bukanaku kawulem wah koo ma kûririgemmi. 8 Mata Emitay yeeliye ewuluul hûpiiraahu hâamak, ma jibaj wahaw peh; di jibaj poop wah peh wa jîkimmi be jaanenaju jata bukan kaaku. 9 Non ma Baŋiicerabu Bâñoyyaabu buloom kaan:
“Yoo ewuum wahaw lhay be bata kûsukateenaku, mata mâsuumamu mata yo, be nanoonan.”
10 Mata Emitay, yoo ewulem esepeyay bukanaku ma kugiiten, di wahaw wata huriyahu, yoo poop egawem esepeyay yagiitenim ma ekooben, di ewolh noon ma jibaj wahaw lhay, mata mâsuumamu matawuul. 11 Moo, Emitay mbi ya ewuluul wahaw wayejum wa mbi jeeli jêenenum bukan kaaku, wa mbi ugawiil keen Emitay jêrejep mata opherta ya kuyaam di uŋenaw wâtooli. 12 Mata bugoroora'ube, ntuwa keb be bata jaanenaju jata bukanaku kata Emitay kâsukateenom, be poop mbi bugawiil ma mbi ya kusal Emitay uyaas wameeŋe. 13 Mata bugoroora'ube ya bûyis kaan, di malhegen ya jisoh elobay yâsuumaay yata Kristu ya jîynemmi. Momakiimom ma kusalumem Emitay, di kusal yo poop mata opherta uyu ya yahahum noon ya jibollom be batayiil, di poop an peh. 14 Moo, mbi kulhaw Emitay be batawuul mata jâkinaju ja kûkinuum, di poop mata kañankiitaku ka Emitay eñankiituum. 15 Moo, usalaal Emitay mata ma egawolaam wahaw wâamak wa ooliitaam upinaal.