Pawlu nalob mata bugoroorabu batawool
10
Moo, înje Pawlu ja keenem na mbi îkayil ba jemmi, niga anaw ahepum, be na mbi ilako râagi, niga anaw âhaahum. Be mata mâsuumamu, di kañankiitaku kata Kristu, nilhawuul 2 ma aatuba jigawom ma mbi îkayuu'bo niga anaw âhaahum. Mata neeliye ilob hâah di bukanaku kaanem wahaw wa ûli ugawem, ya uga wo di hunong ajamaat ata kûbajumiñ. 3 Malhegen ûli ejamaatay, be hunongahu hammi d'ûli, ntuwa hata ajamaat ata kûbajumiñ. 4 Mata ûbawaw wa ûli utiikumem ntuwa wata ejamaat ata kûbajumiñ, be woo ûbawaw wata Emitay wabaam sembe, waalim uwaas wah peh wata sembaasu; ma ukajen hunong peh hagawutum malhegen, 5 di poop hunongahu hata jagawooruwaaju, hagawem an ma âatukamir Emitay. Ma usoh hunongoohunong ugenk, ma uga ho hujam di Kristu. 6 Moo, na mbi jijam di Emitay, ma jiga wahaw peh wa ulobuum, ûli poop nooli uwaŋ bukanaku peh kalatum kajam di elobay yata Emitay.7 Miwuul jîlasuworiit wah jak ma jîmir maama weenom. Mata an di miwuul âynen jaa kaan oo anaw ata Kristu, jake ma anongoor jak, mata non ma oo agam anaw ata Kristu, ûli poop mo ma ugam bukanaku katawool. 8 Mata palimo înje igawooruwe mata sembaasu sa Ata Emit awulommi etukapuño, mata ntuwa ma ikajenuul, be ma eenenuul ma kâynenaku katawuul kukooben. 9 Be îkint ma ga noon înje îkoliyenem di miwuul di uytaw uwe wa iŋiiculom. 10 Mata bukan kaaku ya kêenul, baloberabu bûmbaam di uytaw ya bûhaah, ban di bûkoliyeni, be na mbi ijooŋoor di miwuul ma ilob, nilob beheheh. 11 Moo, jake ma bukana'uku kûmir di kaan, baloberabu bâtooli banorabu. Mata baloberabu bammi di uytaw wa uŋiiculuum ûli râagi, di baabu ba ulobem na ûkayewuubom, banorabu.
12 Mata ûli ûkinoriit uliikoor di bukanaku kagawooruwem. Mata bukana'uku kujaalhowut; mata ya kugawooro non buko kuhammi an peh, ban ya kuliikooro di tiŋatu ta kugam kûkuwaku katayiil. 13 Be ûli ootubi ugawooro ma uhulh tiŋatu ta Emitay êgawolim ure. Mata yoo êliikolim taata mbi ure; momakiimom ma êgawumolim ma ûriiŋul ta jemmi. 14 Moo, miwuul poop ma jemmi tiŋa'utu taliikim, momakiimom ma ûli ûhulhutummi tiŋa'utu na uŋalluum elobay yâsuumaay yata Kristu. 15 Momakiimom poop, ma ôoliitummi usalooro mata bugoroorabu ba bukan kaaku kugam, baleem ta Emitay êliikolim ma ugoroor. Moo, nûkine ma kâynenaku katawuul kuhaŋ mabaj sembe, ma mbi ûli ooli uga ta jemmi bugoroorabu bahammi, be bahulhut ta Emitay êliikolim. 16 Ban mbi ukay ki uñaaŋen elobay yâsuumaay di sîsukasu sahammi mâraagi, be ntuwa dâ bukan kaaku kuñaaŋenyom ban; ma aatuba mbi usalooro di bugoroorabu ba bukan kaaku kugam.