Pawlu nalob joon matawool
11
Momakiimom nîkine jiñankiit ma jimunten d'înje jinŋet di bûnuutaabu bûmbaam. 2 Mata jâkinaju ja îkinuum, jâkinaju jâcaalhumulom di Emitay, mata înje ma ibandooruum non bâjur bâmirorutum ânniine, bakayem ki bûsoño di ânniinaaw atawool, aamom Kristu. 3 Moo, înje nîkoliye ka mbi ûyegetaw watawuul ûguulhoor ma jibet jâkinaju jalhegenumaayaju ja jeekum di Kristu, ma jiga non Eva, a elunay ebuntemmi di kâhoolooraku kata yo. 4 Mata miwuul ya jiga na mbi bukan kaaku kûkayil jaa ma kuñaaŋenuul mata Jesus aahu âbutim di aahu a ûli uñaaŋenuum matawool, be mante di jiyab buynum baabu bâbutim di baabu ba jiyaam ban, be mante di kuñaaŋenuul elob yaayu yâsuumaay yâbutim di yaayu ya ûli uñaaŋenuum ban, ya jimuntem ma jiyaañuwiil di hûririgenahu.5 Moo, înje nijuke kaan, kumakaa'uku kata Kristu kâmakaaku katawuul, akeel ahaŋutom. 6 Mata înje neeli iga anaw aaliitum elob, be ntuwa ibajut kanamulen, mata di bagawer bameeŋe, nûyiisuul wahaw we.
7 Kama nibaje pîya hûbajumiñ ma igawoorowutum na iñaaŋenuum elobay yâsuumaay ma igawuul jilhaalo, barinkut bancaam? 8 Malhegen na ya igoroorum baabu di miwuul, sîgrisiyaasu saasu ya siwulommi bancaamabu, be di gawom poop non înje mabotem di wahaw watayiil ma igoroor be batawuul. 9 Ban na mbi ibajut wah, îlhaworiit an ma aanenom. Be haahu înje boo baabu di miwuul, babajut no wah, kutiyolaal kata Masedoniya di keenenom. Mata îkint no igawuul bûpeeno, ban poop îkint igawuu'bo nakeel. 10 Mata ma malhegenumaayamu mata Kristu memmi d'înje, momakiimom an akeel ammi di Bantaabu bata Akaya, aaliit âcaalhen kasalaku ka eekum. 11 Moo, mante jînonge pîya kaan ma iloom ume, îkintuul? Be Emitay êmire kaan, nîkinuul.
12 Momakiimom ma înje enkenumem ma iga wahaw wa igawem, ma aatuba mbi bukanaku kasalooruwem, kubaj buruŋ ma kêenul bugoroorabu batayiil burewe di bâtooli. 13 Mata bukana'uku kumakaaku kagawutum kalhegenumaayaku, kabuntenem bukanaku ma ya kuga non buko kumakaaku kata Kristu. 14 Moo, aatuba jijaahali, mata palimo Esatanaay ya êhooloor ma ega non amalaakaw ata majaaŋaamu. 15 Momakiimom aatuba jijaahali ma bugorooraabu bata yo kûhooloorem ma kuga non bugorooraabu balhegenumaayabu. Be hûbanumahu hatayiil, mbi huga non ma kugoroorum.
Hûlaamahu hata Pawlu
16 Moo, ma ilancenuu'mo joon eenuul: aatuba jinong kaan înje nînuutuwe. Be jinong mo jaa, ña kama di jiyaañuwom non an ânuutuwe, ma mbi eeli isalooro. 17 Malhegen ma isalooruwem, ilobut non ma Ata Emit âkimmi, be nilobe non an ânuutuwe. 18 Mata bukan kaaku kameeŋe ya kusalooro mata sembaasu satayiil, moo înje poop mbi isalooro. 19 Moo, ma jigam bukanaku kajaalhom, nîynene di kaan, ya jiyaaño bukanaku kânuutuwaaku. 20 Mata palimo anaw agawuum bugoroorabu di sembe, be mante nariyuul wah, be mante naholuul di wah wakeel, be mante narembeeluul, be mante namabuul umiñaw di uraabaw, be di jimunten d'oo. 21 Moo, înje nipuñuwe kâanul ûli ubajut sembe kaga wahaw uwu! Be di wahaw wa bukan kaaku kugawem di kusalooro, neeliye ilob non an ânuutuwe ma êenul, înje poop neeliye iga wo.
22 Moo, ga jaa non buko êbrew kugam? Înje poop êbrew nigam. Kuga jaa bukanaku kata Israyel? Înje poop anaw ata bo. Kuga jaa poop bukanaku kata êbajoorumay yata Abrawoŋ? Înje poop oo nigam. 23 Be mante kuga jaa bugorooraabu bata Kristu, ña mbi ilob non an asohut matawool ma êenul, înje nihaŋiil meeŋ kagoroor be bata Kristu, nihaŋiil mânaguli matawool, nihaŋiil poop makullhi matawool, ban poopii kuk kameeŋe nibujeeni. 24 Mata uyaasaw weemo hutok, na jûdewwi kuwuutumommi kukaruwaasaku ñeemo anabawo di kunŋen di hutok di kubakiir. 25 Uyaasaw ûhaaji, di kûnagulumom kuyaajaku,a haahu di kumabom kuwaaliisaku;b nîyuwo di kasamaaku ñeemo ñâhaaji, haahu niban hututulaayahu, di busonnaaru di kasamaaku. 26 Malhegen di ereesay ya ireesum, nilolom di buhiiraabu: Di waalaw, kasamaaku, di bûkuutaabu, di bukanaku kagam jûdew, di kaaku kagawutum jûdew, di kata prasaay, di kata bujalabu, di poop kutiyolaal kaaku kâhooloorem. 27 Ban kuk kameeŋe ya igoroor di hûlaamahu, haahu îŋotoriit, haahu nilako to bariit, basibent. Kuk kameeŋe ya iga bawoorabu, haahu nilako to di ñonkañu mata ma eekutum wañ.
28 Ban ntuwa wahaw uwe keb, be poop baje waawu wa ya ipeenonom hukoohuk, waamom hunongoorahu hata sîgrisiyaasu peh. 29 Mata kâynenaku kata anaw kubajut jaa sembe, di gawom poop non înje oo; anaw agawi jaa poop ma alo di kûbajumiñ, êsigiray yûmbaam poop, di êhaah.
30 Momakiimom ga jaa non ma isalooro, ña kama nisalooro di wahaw wâyisem ma ibajutum sembe. 31 Be Emitay yagam Ampaw Ata Emit atoolaal aamom Jesus, ya mbi esali be nanoonan, êmire kaan ilee'ma icalem. 32 Mata na înje ilakom di prasaay yata Damaasku, âynaaw a âyyaw aaneyim Aretas, agam ma aga annahaanaw ata dô, nagagam bupooyaabu di sîtingaasu sata êsukay ma mbi kusohom. 33 Be di kûjupenom di kasaawaku ma kuwalellom di eyinumay yata hukalahu, ña nimelh di uŋenaw watawool.