Wahaw wa Pawlu âbaahulim
12
Moo, palimo ma jakutum ma an asalooro, be mbi isalooro, mata ma iñaaŋenuul wahaw wa Ata Emit âbaahulommi ma îmir. 2 Nîmire âynaaw ata Kristu, agam ban ujaañaw kunŋen di ubakiir na ahiiwulim ma aŋari be tiŋatu tahammi mâraagui hatiyatiya di emitay. Moo, îmirut maama aŋarim dêeni be dô, mante di humuumahu, be mante ntuwa di humuumahu; Emitay keb êmiim. 3 Malhegen âynaaw umu, îmirut maama aŋarim dêeni be dô, mante, di humuumahu, be mante ntuwa di humuumahu, Emitay êmiim. 4 Mata oo ahiiwulim be hatiya di emitay, ba ajamumulom elobay ya ajamaat aaliitum añaaŋen. 5 Moo, mbi isalooro mata âynaaw umu, be eetubi isalooro mata înje humuumom; mante isalooro mata wahaw wâyisem di kaan, înje ntuwa an ata sembe. 6 Be îkinen jaa ma isalooruwem, leetubi gaween poop non bûnuuto, mata înje malobem di malhegen. Be eetubi isalooro, mata nîkine ma maama bukanaku kunongem mata înje, mbi mucoohen di maama kujukem ma igawem, di poop maama kujamem ma alobem.7 Moo, ma aatuba mbi igawooro noon, mata wahaw wâmakaaw wa Emitay êbaahulommi, momakiimom ma kâjuutaku kêemummi d'înje, kagam poop non kandiiŋ di eniilay yûmbaam, ka Esatanaay ebolloom bi ya ewulumom kamiñaku ma aatuba mbi eeli igawooro. 8 Be nilhawlhawum Ata Emit ñeemo ñâhaaji ma âcaalhenom ko. 9 Be naanom: “Hûpiiraahu ha iwulim huyeji. Mata sembaasu sûmbaam ya sihaŋ malako d'aw, aw bajut sembe.” Moo, sûumom non, ma isaloorowumem mata ma ibajutum sembe, ma sembaasu sata Kristu mbi sihaŋ malako d'înje. 10 Momakiimom ma îririgenumem mata ma eekutum sembe, mata ma kugelewommi, mata ma îbajoriitum wah, mata ma kuŋomorewommi, di poop ma ilhooŋooruwem mata ma îkimmi Kristu. Mata na mbi ibajut sembe, ña no na ihaŋem mabaa'so.
Pawlu nanongoor mata grîsiya yata Kôrintu
11 Moo, înje magawem non an ânuutuwe, be miwuul jigawommi ma iga mo. Mata miwuul mbi jisaleenom, mata palimo ma igawutum an, be buke kuhaŋutom di makeel, ka jeenem buko kumakaaku kâmakaaku kata Jesus. 12 Mata humuntenahu ha imuntemmi, di sîmanjumasu, di miñamu mata sembaasu sata Emitay, di miñamu mâjaahalinenim ma igam di tutaru tatawuul, mûyisum kaan înje amakaaw ata Jesus. 13 Kama bu nigawuum kôji haŋ sîgrisiyaasu saasu? Mante pîya ma êenoriituum jeenenom di wah wata huri? Ña jiñankiitom, mata nîtilimbenikoore.
14 Jijaa, nibandoore ban ma mbi ikay hûhaajutahu ki iyuugenuul. Be eetubi eenuul jeenenom di wah. Mata înje miwuul nîkimmi, be ntuwa wahaw watawuul. Mata simpawayasu sipaamenen bancaamabu kuwalen be bata kuñooliil, be ntuwa kuŋilaku mbi kupaamen bo kuwalen be bata simpayiil. 15 Mata sûumom non ma îcaalhen wahaw wûmbaam peh, palimo ma iwul humuumahu hûmbaam ma eenenuul. Moo, mante ma îkinuum noon, mo ma jîkinumommi deh?
16 Malhegen îlaamentuul mata wahaw wata huri. Moo, an aahu naaliye âanul înje nîjaalhiye ma ikoliŋenuum. 17 Be pîya nitenkumuul di bukanaku ka îboñewuum? 18 Mata Tiitu nilhawum ma âkayil bi ayuugenuul; ma kûkayil koo di kutiyolaal kaaku. Moo, Tiitu natenkuul di wah wakeel? Kama ûyegetaw wâtooli ntuwa wanoraw? Ntuwa wahaw wanoraw nugawem?
19 Mante miwuul jeene nownu peh, ûli ûkimmi umellhoor. Be ûli ya ulob kayooŋ Emitay non ma Kristu âboñolim ma ulob. Moo, kutiyaay, ûli wahaw peh wa ugawem, ya uga wo ma ooli oonenuul. 20 Moo, nîkoliye ka mbi îriiŋul nitookuul ma jigam non ma îkintum. Miwuul poop jeetukajukom, niga non ma jîkintum. Mata nîkoliye ka mbi bacec bubaj di tutaru tatawuul, di jâsiibuwikooraju, di hubirikahu, di bûñoosoorabu, di bûtemoorabu, di jâlobikooraju, di jagawooruwaaju, di poop kâguulhooraku. 21 Nîkoliye poop ka mbi îriiŋuu'bo, di jigawom ipuño kayooŋ di Emitay, poopii nikaaw mata bukanaku kammi di kûbajumiñaku kata kaŋ niŋanu, ban di kulat kawatatenooro mata jânongikooraju, di jâgawikooraju, di poop kâmooraaku ka kukayem.