Aatuba uŋar atiyi be batalen
6
Kama anaw abaa'jaa elobay di atiyool agam âynenaaw, mata wa ma mbi âŋarumool ki kuga batalenabu baabu di anaw agawem batalenabu agawutum âynena, ma aatuba akay di yo be di bukanaku kata Emitay? 2 Kama jîmirut kaan bukanaku kata Emitay, mbi kuga batalenabu bukanaku kâmirutuyom? Moo, magam miwuul mbi jiga batalenabu bukanaku kâmirutum Emitay, mata wa ma jêelitummi jiga batalen baabu bata wahaw wagam winŋet? 3 Kama jîmirut kaan, ulaal mbi ugawaal batalenabu kumalaku, di kumalaakaku? Benkiteemo wahaw wata ube di etaamay? 4 Be miwuul ya jiga, anaw abaa'jaa elobay di atiyool, yagam yata ube di etaamay, di jikay di yo be baabu bukanaku kabajutum makeel di grîsiya? 5 Ilobuul ume, ma mbi jipuño. Kama an alet di miwuul ajaalhom, aalim agawuul batalenabu non batiyaay? 6 Be miwuul ya jiga anaw agam atiyi, nukay d'oo be baabu bukanaku kagawem batalenabu kagawutum bûynena.7 Moo, malhegen ga jaa non siloba'usu sosu di tutaru tatawuul sa gawuum ma jikay be tiŋatu tata batalenabu, di jîmir kaan heekuu'ban. Kama haŋut majak ma jimunten an bagaweruul wah wâsuumut? Kama atiyuul agawuu'jaa wah wakeel wajakutum, jeeliit jimunten? 8 Inja miwuul poop ya jiga wahaw wâsuumutum. Mata nakeel di jiga wahaw wajakutum poop kutiyuul.
9 Kama jîmirut kaan bukanaku kagawem wahaw wajakutaaw, keetubi kêemi di kâyyaku kata Emitay? Moo, aatuba jibuntenooro, mata bukanaku kâgawikoorem, di kaaku kakayem keenaayaku, di kaaku kakayem kâmooraaku, di kaaku kakumenem di kupaaliil yîinaay, 10 di bûkuutaabu, di bungooŋutenaabu, di bûkaliyaabu, di kaaku kasoosenem kupaaliil, di kaaku kabotem wahaw wata bukanaku, keetubi kêemiyerurer di kâyyaku kata Emitay. 11 Mata bukan kaaku kata di miwuul, mo ma keenuwemmi. Be Emitay di ekullhen kûbajumiñaku katayiil, ma egawiil kuga bukanaku kanapum, ma kulaañ kuga bukanaku kacolum di kañaaŋaku kata Ata Emit, aamom Jesus Kristu, di poop Buynumabu bata Emitay yatoolaal.
Siniilasu satoolaal, Emitay ekiisom
12 Moo, neeliye êenul, neeliye iga wahaw poowo wa îkimmi. Be ntuwa woo poowo ujakum kaga. Malhegen neeliye iga wahaw poowo wa îkimmi, be eetubi iwaa'bo ma ugenkom. 13 Neeliye poop êenul, wahaw wariyeyim, woo be bata eyongay, eyongay poop, be bata wahaw wariyeyim. Ûdu malhegen, be woo poowo, Emitay mbi êbuy wo. Mata eniilay, ntuwa be bata kâgawikooraku; be, be bata Ata Emit; Ata Emit poop, be bata eniilay. 14 Mata Emitay elhaalellolhaalellom Ata Emit di kuketaaku, ulaal poop mbi elhaalellolaal di kuketaaku di sembaasu sata yo.
15 Kama jîmirut kaan siniilasu satawuul, ujimaw wata eniilay yata Kristu? Moo, mbi iŋar ujimaw wata eniilay yata Kristu, ma iga wo uga wata anñaakanaw agam êkusumay? Iyiy, mumulet bi iga mo. 16 Kama jîmirut poop kaan, ânniinaaw kubom jaa siniilasu satayiil di anñaakanaw agam êkusumay, kugawe eniilay yanor? Mata baŋiicerabu beene: “Buko egabaay, di kuga eniilay yanoray.” 17 Be anaw a kubomum eniilay di Kristu, di kuga anaw anoraw d'oo di buynumabu.
18 Moo, jitey kâgawikooraku. Mata kûbajumiñ peh ka anaw agam, naga ko tîyaŋ di eniitay yatawool; be anaw akayum kâmooraaku, nagawe kûbajumiñaku aya di eniilay yatawool. 19 Kama jîmirut kaan, siniilasu satawuul eluupay yata Buynum Bunapaabu bammi di miwuul, ba Emitay ewuluum? Mata mowme jikiloorowut, be Emitay ekiluum. 20 Mata di êpriyaay yajakum enoomumolaam. Moo, mbi jisoh siniilasu satawuul, ma mbi Emitay esali di so.