Masemaamu mata grîsiya yata Kôrintu
5
Mowme elobay yoyu ma ewaasoorum di kaan, masemaamu mâamak momu di tutaru tatawuul, palimo bukanaku kâmirutum Emitay, kûgaworiit mo, mata an aahu ata di miwuul koku ma kutalem tiŋ tanor di apañoor ampawool! 2 Be ban miwumu ma jigawooruwem, bagawut poop ñânkiiteni. Moo, jake ma jîcaalhen anaw ammi ma agawem di wahaw uwu di tutaru tatawuul. 3 Mata palimo ma înje di humuumahu hûmbaam ileem tanor di miwuul, be di bûyegetabu bûmbaam, înje umu to di miwuul. Moo, nitalene ban anaw umu agam wahaw uwu, non înje umu to di miwuul.4 Moo, jîmeboor di kañaaŋaku kata Ata Emit, aamom Jesus, înje mbi êemi to di bûyegetabu bûmbaam; di sembaasu sata Ata Emit, aamom Jesus Kristu, 5 di jiwul Esatanaay anaw umu, ma eles humuumahu hatawool, ma mbi yâarooray yatawool yeeli epak di hukahu hata Ata Emit.
6 Malhegen ma jemmi ma jigawooruwem, jakut. Kama jîmirut kaan phermentu yinŋet ya elaawem êphariñay pooyo? 7 Moo, jibet tîyaŋ phermentu yahalhenaay yata kûbajumiñaku, ma mbi jeeli jiset, ma jiga êphariñay yunkulay yaakutum phermentu non ma jeenom di malhegen. Mata Kristu agam Êgaraniinaay yatoolaal yata Paaskuwa, nagawumi ban heenaayahu be batoolaal. 8 Moo, mbi ya ugawaal kâlundaayaku ma uwolhuwaal Paaskuwa, ntuwa di phermentu yahalhenaay yata kûbajumiñaku, di poop kâgawikooraku, be di kûmburuwaaku kaakutum phermentu, kagam kûmburuwaaku kaakum masetaamu, di poop malhegenumaayamu.
9 Di kayit kaaku ka iŋiiculuum, moo nilobuum eenuul, aatuba jibom di bukanaku kâgawikoorem. 10 Eenutuul, jiwaasoor di bukanaku peh kammi di etaama'uye kâgawikoorem, di kaaku kâwulaatim, di bukaaku kâkuutem, di poop kaaku kawaasenem. Mata ga mo jaa, ña kama yoo yeemom jîcaalh di etaama'uye. 11 Moo, mowme ma iŋiicuul eenuul; aatuba mbi jibom di bukanaku kaanem buko kutiyuul kata di kâynenaku, be ban ya kûgawikoor, di kûwulaati, ya kuwaasen, ya kulob kôji be bata bukanaku, ya kûkali, ya kûkuut; bukana'uku aatuba jiri di buko poop.