Bukanaku ka Emitay ejotum
4
Moo, jake ma bukanaku kusoholaal non ulaal bugorooraabu bata Kristu, jakilaam mata huhaanaahu hata Emitay. 2 Mowme mbi oonaal bukanaku kakiim mata bugoroorabu, jake ma ânoowan aga anaw âynenaayaw. 3 Moo, non miwuul mbi jigawom batalenabu, mante di kâyyaku kata batalenabu mbi kugawom bo, be înje laañutom bo makeel; ban înje poop eetubi italenooro. 4 Mata di bûyegetabu bûmbaam, lhibutom poop makeel di kaan nibaje batila, be palimo moo, ntuwa mo ma mbi êenumul eekut batila di Emitay, mata yoo mbi egawom batalenabu. 5 Moo, aatuba jiga bukanaku batalenabu hukahu bâriiŋorut. Jikob be na mbi Ata Emit âriiŋul, oo mbi ahikiten wahaw peh wammi di emuucenay. Oo poop mbi âyisolaal kunongooraku kâñoorom dâada di bukanaku. Ban Emitay di esal ânoowan non ma ajommi.Kûboñaku kata kurebooraaku kata Jesus
6 Moo, Kutiyaay, mata ma îkimmi igawuul ma jinamulen mata wahaw uwe, momakiimom ma ilobumuum mata ûli di Apolu, ma mbi jeeli jinamulen elobay yammi: “Aatuba jibaŋen jihaŋ maamu mammi ma muŋiicim,” ka mbi jiga aahu anaw âamak, di jirembeel aahu. 7 Ay agawim ma uhaŋ kupaali? Wa nubaam, wa Emitay ewulutim? Non malhegen yoo ewuliwom, ña mata wa ma ugawooruwem non an awuluti wo?
8 Mowme jibaje ban wahaw peh! Jisaanumuwe ban poop! Malhegen jigawe ban kîyyaku, ûli bâlee'do! Moo, jake ma jiga kîyyaku kalhegenumaayaku, ma mbi ûli poop ooli ugawiil di manor di miwuul! 9 Mata gawom non Emitay egam ma ûli jagam kumakaaku kata Jesus ûyooli. Moo, ûli umu ma ugawim non bukanaku kalom di kûbajumiñaku ka mbi kubuji; mata ûli ma ugam poop non bûkanikoor kayooŋ di êsukay peh, di kayooŋ kumalaakaku, di poop ejamaatay. 10 Mata ûli omu ma ûnuutom hurim Kristu, miwuul di jijaalho matawool; ûli poop ubajut sembe, be miwuul di jibaa'so. Di kûrembeeloli, be miwuul di kusohuul jak. 11 Ban be kaŋ jaat, ûli omu di hûlaamahu, di bacaarabu, di basibentabu, di butujenabu, di kûnagulaku, di babajutabu poop bata tiŋatu târiratu ta mbi ukin. 12 Nugoroor di uŋenaw wâtooli, di hûlaamahu. Ban na mbi kûlobikooroli, nulobiil sûum; na mbi kûŋomooroli, numunten. 13 Na mbi kûgeloli, ûli nulob di buko sûum; ban be kaŋ jaat, koku ma kûsoholim non hubet, ta êsukay peh kubetem wahaw wajakutaaw.
14 Moo, ma iŋiiculuum, ntuwa ma ipuñenuul; be iŋiiculuul ma eeli inamulenuul non ma an anamulenem kuñoolool ka âkimmi. 15 Be palimo miwuul jibaje bulhikitenaabu katoom sînjunnaasu kata di Kristu, be jibajut simpawaay sayeje. Mata înje igam ampawuul ata di Kristu Jesus, mata înje iñaaŋenuum elobay yâsuumaay. 16 Momakiimom ma ikaawoorumem di miwuul, ma eenuul mbi ya jiga non înje. 17 Moo, înje mâboñewuum Timootiw, agam añoolom a îkimmi noon, agam anaw âynenaayaw ata Ata Emit, oo mbi awolhenuul maama ilhikitenuum mata buruŋabu bata Kristu Jesus, baamom ba ilhikitenem mata bo di sîgrisiyaasu sammi tiŋ peh.
18 Be bukan kaaku koku ma kugawooruwem, mata gawiil non, înje eetunki îlaañurerul be baabu di miwuul; 19 be Ata Emit âkin jaa, leetubi piyo, nîkayil ma ki iyuugenuul, ma mbi îmir mata baloberabu bata bukana'uku kammi ma kugawooruwem, nîmir poop mante sembaasu satayiil sîkayumul di Emitay. 20 Mata kâyyaku kata Emitay, untuwa wah wata elobay keb, be di sembaasu poop. 21 Ña wa jîkimmi? Mante îkayil be baabu di miwuul di hukarasuwaahu, be mante di bûyegetabu bata jâkinaju, di poop baabu bahepum?