Grîsiya di êgiitoor
3
Kutiyaay, malhegen eeliit ilobeen di miwuul non bukanaku kaakum Buynumabu bata Emitay, be mbi ilob di miwuul non bukanaku kâmirutum Emitay, non bukan poop kagam balaabu di buruŋabu bata Kristu. 2 Moo, mbi iwuluul miilhamu jiraah; mumulet bi iwuluul siŋaaŋ sanke, mata jeetukayetoor di so. Malhegen mumulet bi jimunten di so, 3 mata miwuul mareesem non bukanaku kâmirutum Emitay, mata jiroŋ di jâsiibuwooraju, di poop bacecabu. Moo, jiga jaa umu, jilee'di jiga non ma bukanaku kâmirutum Emitay kugawem? 4 Mata anaw âanuu'jaa oo ata Pawlu, aahu nâanul, oo ata Apolu, ña jigawut non ma bukanaku kâmirutum Emitay kugawem?5 Kama Apolu oo aymoom? Pawlu poop oo aymoom? Jijaa, ûli uga keb kugorooraaku kata Emitay, kagawuum ma jinebej di buruŋabu bata yo; be Ata Emit awuum ânoowan bugoroorabu non ma âkimmi awulool. 6 Moo, înje igiitemmi, Apolu napaasen, be Emitay egawem wah ukooben. 7 Jijaa, anaw agiitemmi, di aahu apaasemmi, bugoroorabu batayiil bubajut makeel, mata Emitay egawem wah ukooben. 8 Mata anaw agiitemmi, di poop aahu apaasemmi, buko peh bukanaku kanoraku, mata Emitay mbi encaam ânoowan bugoroorabu ba agam. 9 Ûli bukanaku kanoraku di bugoroorabu bata Emitay, miwuul di jiga kalhaakaku kata yo, di jiga poop eluupay yata yo.
10 Be mata kañankiitaku ka Emitay ewulommi, ya igoroor non ateepaaw ajaalhom. Mata ya iga hutandahu hata eluupay, an aahu nâriiŋul najuumen hukalahu ma ateep dô. Be, ânoowan oo mbi ajiker maama mbi ateep dô dêeni. 11 Mata an aaliit joon nki aga hutad haahu hâbutim di haahu hagawim ban, haamom hagam Jesus Kristu. 12 Moo, an aŋaa'jaa ûuru, be mante praata, be mante kuwaaliisaku kaseeraaku, be mante utaaguwaaw, be mante mugitamu, be mante mahosamu, ateepum eluupay di hutanda'uhu, 13 be bugoroorabu batawool mbi bujuki nata Hukahu hata Batalenabu. Mata di huka'uhu, sambunasu mbi sîyis maama ugoroora'uwu weenom; mbi sîyis poop maama bugoroorabu bata anoowan beenom. 14 Be ga jaa non bugoroorabu bata anaw bagawim di hutanda'uhu hata eluupay bureemut, non mbi ayab bugalabu batawool. 15 Be anaw a bugoroorabu batawool buremmi di sambunasu, aatubi ayab bugal, be mbi apak, be oo bayabee'ban di sambunasu.
16 Kama miwuul jîmirut kaan miwuul eluupay yata Emitay jigam, dâ Buynumabu bata yo bemmi ma bûkimmi? 17 Moo, anaw akajen jaa eluupay yata Emitay, Emitay poop mbi ekajenool. Mata eluupa'uyu, eluupay yanapum; moo, miwuul jigam eluupay yata Emitay.
18 Moo, an akeel ata di miwuul, Aatuba abuntenooro, mata anong jaa kaan oo omu ma aakum majaalhaamu mata di etaama'uye, haŋ majak ma agawooro non anaw ânuutom, ma mbi ahaŋ majaalho di malhegen. 19 Mata majaalhaamu mata ube di etaama'uye, bûnuutaabu kayooŋ di Emitay, non ma demmi ma ŋiicim kaan: “Emitay ya esoh bukanaku kajaalhuwaaku di mâseeliyaamu matayiil.” 20 Di bêenul poop: “Ata Emit nâmire kaan hunongahu hata bukanaku kajaalhuwaaku hujakut makeel.” 21 Moo, an akeel ata di miwuul, aatuba asalooro mata apaalool ajamaat, mata buko peh katawuul. 22 Mata Pawlu, di Apolu, di Sephas, di etaama'uye, di eroŋay, di eketay, di etaŋa'uye, di poop yaayu yâreesewuum, dôo peh datawuul. 23 Moo, miwuul jata Kristu, Kristu poop ata Emitay.