Maama Pawlu añaaŋemmi elobay yata Emitay Kôrintu
2
Kutiyaay, na ikaylom be baabu di miwuul ki iñaaŋenuul malhegenumaayamu mata Emitay, ilobut balober bânaate, palimo poop balober bata majaalho mata ajamaat. 2 Mata na ikaylobom, inongut ma îmir makeel matawuul, be nilob keb mata Jesus Kristu non ma ariiŋim di êkrusay. 3 Mata na ilakobom, înje babajut no sembe, poopii ya iboboken mata bûkolaabu. 4 Momakiimom ma baloberabu bûmbaam, di poop balhikitenerabu bûmbaam, bûgawutunom non bata majaalho ba an âbehehenumem apaalool, be di buga bata Sembaasu sata Buynumabu bata Emitay, 5 ma kâynenaku katawuul, keetubi mbi kukagoor di majaalhaamu mata ajamaat, be di kukagoor di Sembaasu sata Emitay.Majaalhaamu mata Emitay
6 Malhegen ûli ya ulob baloberabu bata majaalhaamu be bata bukanaku ka kâynenaku katayiil kankum. Be ntuwa baloberabu bata majaalhaamu mata bukanaku kata maame, ntuwa poop bata bukanaku kagam yahaanay yata etaŋa'uye, ka sembaasu satayiil semmi ma silowem hukoohuk. 7 Be majaalhaamu ma ulobem mata mo, mata Emitay, mammi ma mûñoorim ejamaatay; maamom ma yoo êbandooraalim niŋanu bala etaamay êwweni, ma mbi egawolaal ubajaal êriibiinaay. 8 Mata majaalhaa'umu, an akeel agawe annahaan ata etaŋa'uye âmirorut mo. Mata kûmiremmom, keetubi kuriiŋeen Ata Emit di êkrusay akiim êriibiinaay. 9 Non ma Baŋiicerabu Bâñoyyaabu buloom kaan:
“Wahaw wa kûkil ajamaat ajukutum,
di waawu wa êsigir ajamaat anongutum,
di poop waawu wa kâjaŋay ajamaat ajamutum,
wo wa Emitay ebandoorum be bata bukanaku kâkinyom.”
10 Moo, ulaa'umu ja Emitay êyisum wahaw uwu hurim Buynum Bunapaabu. Mata Buynum Bunapaabu, ya bûhikul wah peh, palimo poop hunongoorahu hâñoorim dâada di Emitay. 11 Mata buynumabu bata ajamaataw keb beelim buga an anamulen wahaw wa ajamaat anongem. Moomu poop kaŋ ma wahaw wata Emitay ugam, Buynumabu bata yo keb bûmiim wahaw wa yoo enongem. 12 Mata Buynumabu ba uyabaam, ntuwa bata di etaama'uye, be baaba uyabaam, ba Emitay ebollom, ba mbi bugawolaal unamulenaal wahaw peh wa ewulolaam bancaamut.
13 Momakiimom na mbi ûli ulako nulob, ûloboriit baloberabu bata majaalhaamu ma ejamaatay kulhikitenem, be ya ulob baabu ba Buynumabu bata Emitay bulhikitenem an. Moo, ya ulhikiten bukanaku wahaw wa Buynum Bunapaabu buwulem, bukanaku kaakubom. 14 Mata anaw aakutum Buynumabu bata Emitay, aaliit anamulen wahaw wata bo. Mata di hunongoorahu hatawool, mbi gawool non wah wata bûnuuto. Wahaw uwu, mumulet bi anamulen wo, mata Buynumabu bata Emitay keb beelim bugawool anamulen wo. 15 Mata anaw aakum Buynum Bunapaabu, ya aali anamulen mata wah peh, be oo an âaliyoriit anamulen matawool. 16 Non ma Baŋiicerabu Bâñoyyaabu buloom kaan: “Ay aalim âmir hunongoorahu hata Ata Emit, ma alhikitenool?” Be ulaal ya unongooraal, hunongoorahu hata Kristu.