KAYTAKU KÛTIYAARAKU KA PAWLU AŊIICUM BE BATA GRÎSIYA YATA
KÔRINTU
Pawlu nasaap bûynenaabu bata Kôrintu
1
Înje Pawlu jaamom ja Emitay êwoom non ma êkimmi ma iga amakaaw ata Jesus Kristu, înje iŋiiculuum kayta'uke, ûli di atiyom Soostenis, 2 be bata grîsiya yata Emitay yammi di êsukay yata Kôrintu, yata kunapaaku, yâwoolim ma egawi ma enap mata Jesus Kristu; di poop kaaku kammi kareb kaaku kâwoolem kañaaŋaku kata Ata Emit, aamom Jesus Kristu, agam Ata Emit atayiil, naga poop Ata Emit atoolaal. 3 Moo, Emitay yagam Ampawolaal, di Ata Emit, aamom Jesus Kristu, kuwuluul kañankiitaku di kâsuumaayaku katayiil.4 Malhegen înje nanoonan ya een Emitay jêrejep matawuul, mata ma ewuluum kañankiitaku kata yo mata Jesus Kristu. 5 Mata, hurim kasohooraku katawuul d'oo, kokagawuum ma jisaanumo di wahaw peh, di elobay, di poop kanamulenaku. 6 Mata wahaw walobim mata Kristu, ujuki ban di miwuul. 7 Moo, ma jemmi ma jikobem di Ata Emit atoolaal aamom Jesus Kristu na mbi âriiŋul, wah wakeel ulee'ban wa Emitay ewulem wa ewulutuum. 8 Mata oo mbi aanenuul ma jisoh tir be di hûbanumahu, ma mbi jiga bukanaku kaatumbi kuwaŋureri di wah wakeel, nata hukahu ha Ata Emit aamom Jesus Kristu atoolaal mbi âlaañul. 9 Mata Emitay yâwolluum ma jisohoor di Añool yo aamom Jesus Kristu agam Ata Emit atoolaal, yoo anaw âynenaayaw.
Pawlu nalob mata kasohooraku
10 Moo, kutiyaay, înje malhawem di miwuul di kañaaŋaku kata Ata Emit atoolaal, aamom Jesus Kristu, ma jilob peh wah wanor, aatuba jiga waasaaw, be mbi jiga ûyegetaw watawuul tiŋ tanor, di jibaa'poop hunongoor hanor. 11 Mata kutiyolaal kata yaŋ Klowe, kuñaaŋenom kaan jilee'ma jijamoorum. 12 Moo, nîkine ilobuul maama kaaku kata di miwuul kulobem di mo. Mata ya kêenul: “Înje jata Pawlu.” Kaaku di kêenul: “Înje jata Apolu.” Kaaku di kêenul: “Înje jata Sephas.” Kaaku di kêenul: “Înje jata Kristu.” 13 Moo, kama Kristu omu ma âgiitoorum? Be mante Pawlu ariiŋim di êkrusay matawuul? Be mante di kañaaŋaku kata Pawlu jîbatisumim?
14 Moo, nêenul Emitay jêrejep, mata ma îbatiisutuum, ma îbatiis keb Krispu, koo di Gaayu. 15 Momakiimom an akeel ata di miwuul, aaliit âanul oo di kañaaŋaku kûmbaam nâbatisumim. 16 Be niwolhuwe kaan, nîbatisubatisum poop Estephanas, di poop bukanaku kata yanŋool. Moo, iwolhowut ban mante an akeel omu to di miwuul a îbatiisum joon. 17 Mata Kristu aboñutom ma îbatiis bukanaku, be aboñom ma iñaaŋen bukanaku elobay yâsuumaay, be iñaaŋendiit yo di majaalhaamu mata ejamaatay ka mbi irembeel eketay yata Kristu di êkrusay.
Kristu agam majaalhaamu di sembaasu sata Emitay
18 Malhegen elobay yata mata eketay yata Kristu di êkrusay, ega poop non elobay yata bûnuutaabu be bata bukanaku kareesem ki kûjim, be, be bata ulaal ja mbi upakaal, eloba'uyu sembaasu sata Emitay. 19 Mata dôdu ma ŋiicim kaan Emitay yeene:
“Mbi ikaajen majaalhaamu mata bukanaku kajaalhuwaaku;
nîbuy poop kanamulenaku kata bukanaku kaakum kanamulenaku.”
20 Moo, ûtey bukanaku kajaalhuwaaku kemmi? Ûtey poop bukanaku kanamulenaku kemmi? Kaaku kañoosoorem, ûtey kemmi? Mata Emitay êyiise kaan, majaalhaamu mata di etaama'uye, moo bûnuutaabu di yo. 21 Malhegen, Emitay di majaalhaamu mata yo, egawut ma bukanaku kûmii'yo mata majaalhaamu matayiil, be di ega kaaku kâynemmi ma kupak hurim elobay yata yo ya uñaaŋenem, yaamom ya keenem yoo “bûnuutaabu.” 22 Mata jûdewwi ya kulhaw ma kujuk miñamu mata sembaasu sata Emitay ma mbi kûynen, be greguwi, ya kupaam majaalhaamu ma mbi kûynen. 23 Be ulaal ya uñaaŋenaal mata Kristu ariiŋim di êkrusay, dagam huuñdihulit be bata jûdewwi, di ga wahaw wata bûnuutaabu be bata bukanaku kagawutum jûdew. 24 Be, be bata bukanaku ka Emitay êwollom, kagam jûdew, di poop kaaku kagawutum jûdew, di buko, ma ebollom Kristu, ûdu sembaasu sata yo, di poop majaalhaamu mata yo. 25 Moo, wahaw wajukim non bûnuutaabu bata Emitay, uhaŋe majaalhaamu mata ajamaataw, waawu ta ejukim poop non ebajut sembe, uhaŋe sembaasu sata ajamaat.
26 Moo, kutiyaay, jiwolho non ma jeenuwemmi noo na Emitay êwolluum, mata bukanaku kinŋet kata di miwuul kabajemmi majaalhaamu mata di etaama'uye, kinŋet poop kabaanom sembaasu, di poop kinŋet kaganom bukanaku kabaam wah saŋiil. 27 Mata Emitay yoo ejotum wahaw wa bukanaku kata di etaama'uye kemmi bûnuutaabu, ma eŋaa'wo êpuñenum bukanaku kajaalhuwaaku. Di ejot poop waawu wata di etaama'uye wa bukanaku kemmi ubajut sembe, êpuñenum bukanaku kabaam sembaasu. 28 Malhegen, Emitay yoo ejotum wahaw wa bukanaku kata di etaama'uye kurembeelum, wa kemmi ujakut, ban ubajut ênjariŋ, ma eŋaa'wo êbuyum waawu wa kemmi ubaje ênjariŋ, 29 ma an Aatuba mbi alob bûlaat kayooŋ di Emitay. 30 Be miwuul, Emitay di egawuul ma jisohoor di Jesus Kristu, ma egawool aga majaalhaamu matoolaal; ban matawool ehikulumolaam, ma agawolaal bukanaku kacolum, ban di kunap. 31 Non ma demmi ma ŋiicim kaan: “Anaw a mbi asalooro, nasalooro mata kañaaŋaku kata Ata Emit.”