Pawlu nalob mata bûyababu
7
Ña mowme ma ilob mata wahaw wa jiŋiiculommi mata wo, ma jeenom jake ma ânniinaaw alako to bayabut. 2 Be înje neenuul, magam bukanaku koku ma kûgawikoorem, jake ma ânniinewooniine nayab añakanaw atawool, añaakanooñaakan nasoño'poop di ânniinaaw atawool. 3 Moo, ânniinaaw mbi aga apañoorool non ma ânniine agawem apañoorool, anñaakanaw poop naga apañoorool non ma anñaakan agawem ânniinaaw atawool. 4 Mata eniilay yata anñaakanaw, ntuwa yatawool, be apañoorool akiiyom; eniilay poop yata ânniinaaw, ntuwa yatawool, be apañoorool akiiyom. 5 Momakiimom, mumulet bi apañoori âkin eniilay yatayi, nulat di yo, mante pîya miwuul bajamoore ma jîrangoor jinŋet mata kalhawaku ka jîkimmi jilhaw Emitay. Be na mbi kalhawa'uku kuga kubawe, di jilaañ jîhugoor joon, ka mbi jibajut jimunten, di jilo di kabuntenaku kata Esatanaay.6 Moo, wahaw uwe wa ilobuum, mbi ya jiga wo di kajamooraku, be ntuwa non kûboñ. 7 Mata nîkineene ma yîinaay peh kugaween non înje bayabut, be anoowan nabaje non ma Emitay egawoom; aahu aano maamu, aahu naano maamu.
8 Momakiimom neenuul yîinaay kâkutom, di poop yaaraay kâkutom, jake ma kulakuween to non înje bayabut. 9 Be keeliit jaa kuyetoor di siniilasu satayiil, haŋ majak ma yîinaay kuyab, yaaraay poop di kusoño, ma keetubi kulako to umu ma siniilasu satayiil ya sîhaah mata bûyababu, di poop bûsoñaabu.
10 Be miwuul jammi ma jiyaboorum, nibaje kûboñaku be batawuul kagawutum kûmbaam, be kata Ata Emit, kaloom kaan, mumulet bi anñaakanaw aat di eluupay ma abet apañoorool. 11 Be aat jaa di eluupay, ña mumulet bi alaañ asoño di ânniine akeel, be mante alaañ be baabu di apañoorool. Ânniinaaw poop mumulet bi acah di apañoorool.
12 Nilobuu'poop mata bukan kaaku, be ntuwa kûboñaku kata Ata Emit, ânniinaaw abaa'jaa anñaakanaw agawutum âynena, ban anñaakanaw umu nâkin ma kenken ma kuyaboor, ânniinaaw umu mumulet bi acah d'oo. 13 Anñaakanaw poop agam âynenaaw, abaa'jaa ânniinaaw agawutum âynena, ban ânniinaaw umu nâkin ma kenken ma kuyaboor, añakanaw umu, mumulet bi âcaalh di eluupay ma aat. 14 Mata ânniinaaw umu agawutum âynenaaw, mbi aga anaw ata Emitay, mata ma apañoorool agam âynenaaw. Moomu poop kaŋ anñaakanaw agawut jaa âynenaaw, mbi aga anaw ata Emitay, mata apañoorool agam âynenaaw; mata gawent mo, kuñooliil keetubi kugaween bukanaku kata Emitay, be kata yo. 15 Be ânniinaaw, be mante anñaakanaw agawutum âynenaaw, âkin jaa ma bûyaboorabu batayiil buwaasoor di umu agam âynenaaw, beeli buwaas. Ña ânniinaaw umu, be mante anñaakanaw umu agam âynenaaw, atukagenkooro mata wahaw wa Emitay eloom mata bûyababu, mata yoo êwoollolaam ma ubajaal kâsuumaayaku. 16 Kama aw anñaakanaw jagam âynenaaw, ûmirut kaan nooliye upaken apañoori agawutum âynenaaw? Aw poop ânniinaaw jagam âynenaaw, ûmirut kaan nooliye poop upaken apañoori agawutum âynenaaw?
17 Momakiimom ma ilhikitenumem di sîgrisiyaasu peh di kaan, ânoowan nanken ma asoo'to di wahaw wa Ata Emit awuloom, di poop maama aanom na Emitay êwolloom. 18 Moo, Emitay êwoolul jaa anaw agawim ban huhaanaahu hata yîinaay, nalako to umu. Êwooluu'poop jaa anaw agawutihom, nalako to bagawuti ho. 19 Mata jagawaju jata huhaanaahu hata yîinaay, joo ntuwa makeel; jagawutaju poop jata ho, joo poop jibajut makeel. Moo, wahaw wahammi majak, ma usoh kûboñaku kata Emitay. 20 Momakiimom ânoowan, nalako to non ma alakuwemmi na Emitay êwolloom. 21 Moo, ûwolli jaa aw ma ugam amiikeelaw, aatuba unongoor makeel, be ubaa'jaa poop maama mbi uga ma ûcaalh di ho, jake. 22 Momakiimom an peh a Ata Emit âwollom agam amiikeelaw, ña naga anaw agawutum amiikeel ata Ata Emit. Anaw poop agawutum amiikeel a Kristu âwollom, ña naga amiikeelaw ata Kristu. 23 Mata miwuul, di êpiriyaay yajakum jinoomumim, momakiimom aatuba jîkin ma jiga emiikeel yata ajamaat. 24 Moo, kutiyaay, jake ma ânoowan anken ma alako kayooŋ di Emitay, non ma aanonom na êwolloom.
Pawlu nalob mata bûkutuwaataabu
25 Moo, mata bukanaku kayabutum, ibajut hurim hagam hata Ata Emit, be mbi iwuluul hurimahu hûmbaam, mata ma ibaam kañankiitaku di Ata Emit ma iga anaw âynenaayaw. 26 Malhegen di etaŋa'uye yata hûlaamahu ya oomaam di yo, jake ma ânniinewooniine, nalako to non ma ammi. 27 Aw jayaam anñaakanaw, aatuba uga ma mbi jiwaasoor; be aw jayabutum, aatuba uyab. 28 Be uyaa'jaa, ntuwa nubaje kûbajumiñ; moomu poop kaŋ bâjurabu busoño jaa, bûbajut kûbajumiñ. Be nîkine ma eenenuul mata hûlaamahu, mata anaw ayaam, di poop aahu asoñom, manooman mbi kûlaam.
29 Moo, kutiyaay, wahaw wa îkimmi ilobuul, neenuul, etaŋay ere ban kâriiŋ; momakiimom bukanaku kayaam, di kuga non bukanaku kayabutum, 30 bukaaku kammi ma kukaawem, di kuga non bukan kaleem ma kukaawem; kaaku kammi ma kûririgemmi, di kuga non bukan kaleem ma kûririgemmi; bukaaku kanoomulom wahaw, di kuga non bukan kabajut makeel; 31 bukaaku kammi poop ma kugenkoorom mata wahaw wata etaama'uye, keetubi kuga non bukan kammi ma kugenkoorom mata wah, mata non ma etaama'uye yemmi ume jaat, eetubi epiyo di êbuyo.
32 Momakiimom îkint ma jilako di kunongooraku. Moo, aw jayabutum jake ma unongoor mata bugoroorabu bata Ata Emit ma agawool âririgen. 33 Mata ânniinaaw ayaam, ya anongoor mata wahaw wata di etaama'uye, maama mbi aga apañoorool âririgen. 34 Mata ânniina'umu ya abaj kunongooraku kugaba. Moomu poop kaŋ ma anñaakanaw asoñom, anongoorem keb be bata wahaw wata di etaama'uye, maama mbi aali aga apañoorool âririgen. Be bâjurabu, di anñaakanaw asoñowutum, ya anongoor be bata bugoroorabu bata Ata Emit. Ya âkin ma awul eniilay, di poop bûyegetabu batawool be bata Ata Emit.
35 Be ntuwa ma ilobuum umu ma îlaamenuul, be nîkine ma eenenuul, ma mbi jiga wahaw wajakum, ban di ulheb, ma aatuba mbi jigolenoor di makeel, ma mbi jeeli jiga jak bugoroorabu bata Ata Emit.
36 Moo, yîinaay kabaam kusuubariil ka mbi kuyab, anaw ajuu'jaa kaan alee'ma agam jak asuubarool mata ma ayabutoom, ban âjuraw umu tatawool totahulhem, be ban ânniinaaw umu omanongoorem d'oo mata bûyababu, ña naga non ma âkimmi; be abajut kûbajumiñ, oo bayaberool. 37 Be ga jaa non ânniinaaw umu anongoor jaa kaan, jake ma alako to bayabut, an bañuusutool, ban naaliye asohooro ma aga wahaw wa âkimmi aga ma atukayab âjuraw umu, ña nagawe jak. 38 Moo, anaw ayaam asuubarool, nagawe jak, be aahu ayabutum nahaŋ maga jak.
39 Mata anñaakanaw asoñom, koku ma kusohoorum di apañoorool, oo baroŋ ma arommi. Be apañoorool umu akee'jaa, nalako to way non anñaakan asoñowutum, ña naaliye asoño di ânniinaaw aahu a âkimmi, be mbi ga ânniinaaw keb agam âynenaaw. 40 Be di hunongahu hûmbaam, nahaŋ mâririgen oo balako to umu basoñowut; be poop nîynene kaan nibaje Buynumabu bata Emitay.