Zakayo
19
1 Yesu dêy dǎ Yeriko mí drǒngó ní bba òluw ro, 2 fungá tdè Zakayo ní ndèy ró dho tdè nì li, nò-tsò-kpà ɦówdha mí kpa djú drǒngó ní li. À tdè věy ndèy-thokpa ó ddiy nà nì li, 3 à dêy měy ndèy njǎ ya áyìy Yesu nì ddiy; chú, ddiy kâ tdè à dhò nzá bíy nì ndrǔ-kpà dhí lò dhò; ddiydhò, à dhìy tdè pbúwrù. 4 À kòw tdè njitsś ò djò ro, à shì djèy klǒwklǒw ní, nzrŕ ndèy-gi nà nì ddì nì tsúw djò, ndaní ndèy njǎ Yesu; ddiydhò, à kà tdè à dǎ fú nga òluw. 5 Fú nga ò Yesu nì shǐ ro, à kâ ndèy-nyú ngbi ru ro, à kâ tdrà à dhò: “Zakayo, thú zěy; ddiydhò, ndu ddiy kà ma déy nyǐngá dza ó.” 6 Fúnga nà, Zakayo thû zěy ro, à kô Yesu hwî nà. 7 Fú ddiy ì njà ro, wánì bíy nì ndrǔ ónga ndrû ndrúní, ndrǔ dêy tdrǎ: “Íli rà dey cherr ndèy nì njěy nì li bbá!” 8 Chú, Zakayo kâ dèy ru bba-dja njìó ro, à kâ tdrà Drǒngóli dhò: “Nja, bba-dja, manì màtsá ddiy-kpà-ónga ndǒ ddìkàddì, rwo nì mí ddì nì la manì bbu zòw ní ndrǔ dhò, ya ddiy tdě ngǎjìní lò ma njèy ddì li dhò ro, mà rà ngù tho ngà nà ndeyli dhò.” 9 Yesu kâ tdrà à dhò: “Ndu, pádha shì í dza ó; ddiydhò, íli ddí nì Abrahamu ó ddèy. 10 Ddiydhò, Ndrǔ-Ddùw shì tdè, ndaní ndèy měy, ndèy pá víyní ì vîy nì ndrǔ.”Ddrǒ ndèy ró dzẑ nà nì djuw djú lò-ngbòdha
(Mat 25:14-30)
11 Chú, fú lò ndrǔ dêy rř ro, Yesu kâ lò-ngbòdha kíyddà ndrr; ddiydhò, à tdè Yerusalemu mí drǒngó ní bba kuwtsó chow-chow ro, ndrǔ dêy ddey Drà mí Pey mí nga kà tdè ndèy dhǒ ndèy fungá. 12 Fúnga nà, Yesu kâ tdrà: “Madha mí dza ó ddì nì li rà tdè ndì nì ngòw ò, ndaní ndèy rǎ Pey ní ndèy ngú mí drǒngó ní nga chùw ro; fú ddiy dzzdjú chú, ndèy ká ngu. 13 Chú, à kâ nděyngá dhǐy mí bíy nì ndrǔ rò iy ddri, fúkpa kàó ddì li-thokpa ò à bbû tdè órr̀-ngbluw ndèy ró dzìy nà lèy nì ro, à kâ tdrà kpa dhò: ‘Nyì nyá í mb-ho ónga, ma rà ngu mí nga djò chú pbǔw.’ 14 Chú, ǎngá ngòw ó ndrǔ ndrò tdè à ndròní ro; ndrǔ chô lò dhò ka chó nì nì kpa à kodjú, ì rǎ tdrà à dhò: ‘Mà jì fú li nzá à nyǔ Pey mà-djú.’ 15 Fǔchú mǎ kpe, ka lêy tdè à Pey ní ro, à kâ ngu ndèymí ngòw ò. Fúnga nà, à tdrà tdè ka íy nděyngá dhǐy mí kpa, mb-ho ndèy bbû tdè ì-thokpa òluw nì, ndaní ndèy njǎ ya ddu mà ndrǔ chùw djǒmá ddiy. 16 Chú, njitsś ò djú nì li shì ro, à kâ tdrà: ‘Drǒngóli, ma-thokpa ò nyi bbû nì órr̀-ngbluw djú mà chùw órr̀-ngbluw kíyddà ddri.’ 17 Fúnga nà, Pey kâ tdrà à dhò: ‘Ddiy nì lǎní, dhǐy mí lǎní li; ddiydhò, nyi tdè úwní ka ùw dù-dú ní ddiy-tá-kpà-rónga pbòdha òluw nì li, mànì nyidhò kpá-kpánga bbu ddri nì drò-dró ní bba djú.’ 18 Rwo nì mí dhǐy mí li shì ro, à kâ tdrà: ‘Drǒngóli, ma-thokpa ò nyi bbû tdè nì órr̀-ngbluw djú mà chùw órr̀-ngbluw kíyddà mb.’ 19 Chú, Pey kâ tdrà fú li dhò, ‘Nyi ddí, manì ley drǒngó ní li ní mb nì drò-dró ní bba djòluw.’ 20 Dhǐy mí njàddí li shì ro, à kâ tdrà: ‘Drǒngóli, nja nyìmí órr̀-ngbluw nì i; mà rù tdè loko ò. 21 Ma dêy nyi mí do njěy; ddiydhò, nyi dhà sà ndèy drǒ: Nyi déy nì nzá nyi lêy nì ddiy zǐy; nyi déy nì nzá nyi tdòw nì nyù-tsò njuw.’ 22 Pey kâ tdrà à ní: ‘Dhǐy mí ngǎjìní li; nyi djú ma rà lò tdèy, nyi-tsò ó lò-kpà djú. Nyi njà ŋà ma-dhà tde nì ngǎjìní ddiy; ma déy nì nzá ma lêy nì ddiy zǐy ro, ma déy nì nzá ma tdòw nì nyù-tsò njuw. 23 Ddudhò, nyi lêy tdè màtsá mb bákì ò nzá? Ngúní ma rà ngu ro, ma ká shì màtsá mb dda djǒmá ka ndrîy nì ddiy nà.’ 24 Fú ddiy dzzdjú, à kâ tdrà fungá ì tdè nì ndrǔ dhò: ‘Nyì ziy fú órr̀-ngbluw à thokpa óddù, nyì bbú fú órr̀-ngbluw ddri ndèy nì ndanà nì li dhò.’ 25 Fúnga nà, kpa kâ tdrà à ní: ‘Drǒngóli, fú li nì órr̀-ngbluw-kpà nà ddri!’ 26 Fúnga nà, à kâ lò ngù: ‘Ma nì tdrǎ nyì dhò, ney ndèy-thokpa ó ddiy rò nì li dhò, ka rà kíyddà bbu drǒngó; chú, ngǎ ndèy-thokpa ó ddiy nì li dèddò, ka rà à nì ndanà nì ddrǎ ní ddiy-tá ddí dda ddání. 27 Chú, màtsá ndrò-djá dhí ddiy óddù, nzá ì jì tdè ma ngú Pey ní nì ndrǔ, nyì mba ndrǔ ingá, nyì chǐ ndrǔ ma-nyú djú.’”
Yerusalemu mí drǒngó ní bbà ò Yesu nì rǎ ddiy
(Mat 21:1-11; Mk 11:1-11; Yoh 12:12-19)
28 Fǔchú ndèy tèy lò ddiy dzzdjú, Yesu dêy rǎ bíy ì shì njitsś ó nì ndrǔ njìó Yerusalemu mí drǒngó ní bbà ò ndèy djî nì tuw òluw. 29 Chowchow ndèy shì Betefagia mà, Betaniya nà mí bba ò, òlívè-tsúw mí ngòw ní ka nì iy nì nga kuwtsò ro, Yesu kâ ndèy kodjú ì nì rǎ nì kpa rò cho rwo ddí ì njìó. 30 À kâ tdrà kpa dhò: “Nyì rǎ chěy nyì-nyú djú nì bba ò. Fú bba ò nyì shì ro, nyì rà shì shúní ka shû nì kànàmí ngba ró; děy nzá djǒmá ddì nì áyìy rò màddí vè dòw nì. Nyì kló fú kànà, nyì mbǎ ma dè. 31 Kpechú, ddì li dhíy nyì-tsò ró: ‘Nyì ná fú kànà klo ddudhò?’ Nyì tdrǎ ndeyli dhò: ‘Drǒngóli nì jǐ ndey.’”
32 Chú, chóní ka chô tdè nì kpa kâ rà ro, kpa shì wánì lò chùw, gbè Yesu tdrà ì dhò níchú. 33 Chú, kànàmí ngba kpa dêy klo ro, fú kànàmí bba-dja kâ dhiy kpa-tsò ró: “Nyì ní fú kànàmí ngba klo ddudhò?”
34 Chú, kpa kâ lò ngù: “Drǒngóli jì fú kànàmí ngba ndey.” 35 Ndrǔ mbà kànàmí ngba Yesu dè ro, ndrǔ kpì ì ró rù-kpà kànàmí ngba djú ro, kpa kâ ley Yesu djí kànàmí ngba djò. 36 Chú, Yesu dêy rǎ nú ràní ro, ndrǔ dêy kǒw rǎ ì ró rù djú rù-kpà kpǐ tuw òluw nú kpì ní.
37 Chowchow ndrǔ shì tdè Yerusalemu mí drǒngó ní bba ò, òlívè-tsúw mí ngòw djúddù thúnì ndèy thû nì tuw òluw Yesu dêy thu ro, à kodjú ì dêy rǎ nì bíy nì ndrǔ-kpà wá, yà ì-ónga kì věy hwî nà, dêy Drà ma drǒngó ní ì-chuw nà, njàní ì njà wánì ddùw-kpà dhò. 38 Ndrǔ kâ dey tdrǎ: “Hòsánàb, ddiy kà Drà léy bû, bba-dja ró dho nà ndèy nì shǐ ni Pey djò! Li-thíy-tsò djówdha rakpa óddù, madha ru pléy nì Drà dhò!”
39 Bíy nì ndrǔ-kpà kàó ì tdè nì Farisayó rò kâ tdrà Yesu ní: “Li gwíydha-dja, ja nyi kodjú ì nì rǎ nì kpa-djúnga ddǎ.” 40 Fúrò, Yesu ngù lò: “Ma nì tdrǎ nyì dhò, ya fú ndrǔ djúnga ddǎ ro, djuw-kpà rà ì-ónga jòw!”
Yesu nì dzž Yerusalemu mí drǒngó ní bba djú ddiy
41 Chowchow Yesu shì Yerusalemu mí drǒngó ní bba kuwtsò ro, à njà fú bba ro, à dzz̀ djǒmá, 42 yà ndèy nì tdrǎ ǐchú: “Ya nyi djùkpa ddí lǒw tdè fú lò ro, fú ddu nà ka kǎ ka chûw li-thíy-tsò djówdha ŋǎchú! Chú, nja-nja, fú ddiy ka rù nyì róddù rùní, nyì kà nyì njǎ nzá! 43 Ddiydhò, ddu-kpà rà shì nyi dhò ney, fú ddu ó, nyìmí ndrò-djá rà nyi rónga-tsò riy gbrǔ, kpá-kpá ndèy-rónga ka rù nì nga ò, kpa rà nyi rónga-tsò pbì la nà ro, kpa rà nyi ónga pbo wánì nga òluw. 44 Fúnga nà, kpa rà nyì sà nyìdhí nzòw mànà wá; nyì dhò kpa rà ddì nì djuw rò ddí bbà njàddí djuw djú nzǐ; ddiydhò, nyi njà tdè nzá Drà shì nyi-tso-tso ko ǒmá nì ddu-jì.”
Ddiy-ónga ì nì dzíy Drà mí dza ó nì bíy nì ndrǔ Yesu dìy ddiy
(Mat 21:12-17; Mk 11:15-19; Yoh 2:13-22)
45 Fúnga nà, Yesu tsùw Drà mí dza ò ro, à dîy tdè ddiy-ónga ì tdè dzíy nì bíy nì ndrǔ díyní, 46 Yà ndèy nì tdrǎ ǐchú bíy nì ndrǔ dhò: “Drà mí ndíyní ka ndîy nì lò ó, Drà dêy tdrǎ kpǔkpǔ: ‘Màtsá dza rà tdè, Drà nzz̀dha mí dza ní,’ chú, nyì ngù fú dza gbu-djá dhí loko ní!”
47 Fúnga nà, Yesu dêy li gwiy wánì ddu ró Drà mí dza ó. Ndrǔ ró dho nà ì nì shǐ Drà njìò nì kpa djú drò-dró ní kpa mà, yǎdha ì nì ndíy nì kpa mà, ndrǔ-tsi kàó madha mí ní ì nì nì ndrǔ mànà ddí dêy měy ì hwî à hwìní. 48 Chú, kpa tsì tdè nzá ya ŋǎchú ì njey ddiy; ddiydhò, ndrǔ-tsi wá tdè à rř yà ì lêy ì-thíy lêy ní à nì těy nì lò djú.