Bàtízò ndèy nì bbu nì Yohana tdrà nì lò
(Mat 3:1-12; Mk 1:1-8; Yoh 1:6-8)
3
1 À tdè Roma mí drǒngó ní bba ó, Pey djú drǒngó ní Pey, Kayisariya Tiberiyo dêy Pey nyǔ nì ddri ndèy djú mb nà nì cho ó, Pontiyo Pilato tdè Yuddeya mí ngòw ó gǎvènà. Herodde dêy Pey nyǔ Galilaya mí dziylíy ó ro, àmí djûnì, Filipo dêy Pey nyǔ Itureya mí dziylíy ndèymí Trakonitide mí dziylíy nà ó, Lisaniya dêy Pey nyǔ Abilene mí dziylíy ó. 2 Ana mà, Kayafa nà tdè dyǎdjí. Fúnga nà, Drà tsò djú lò shì tdè Zakariya mí ddùw-nì Yohana dè ɦiynínga ó. 3 À dêy bbiy Yoroddani mí pbèyní ndèy nì pběy nì drǒngó ní dda kuwtsòluw nì dziylíy òluw wá. À dêy í lò tdrǎ: “Nyì lí nyì dhà rónga, nyì lǒw bàtízò ro, Drà rà nyìdhí cherr sà sàní.”4 Cha, Drà ró dho nà ì nì lò těy ndrǔ dhò děy ndèy rà shì nì lò-djò nì li, Isaya ndîy tdè hòní ka dêy tsò nì hǒ nì bǔkù ó nì lò ó lò tdrà tdè níchú:
“Ddì li chuw nì nga jǒw ɦiynínga ó:
Nyì thi Drǒngóli, Drà mí tuw ónga,
nyì dá tuw ónga chěy à dhò!
5 Wánì dda-bbùw-ónga, ka rà ru rúní,
wánì drò-dró ní ngòw-kpà ndèymí dù-dú nì ngòw-kpà mànà ka rà thu thúní;
tdóní ì-ónga tdô ì nì tuw-kpà ónga, ka rà da dání;
nglûwkànglûw ì-ónga ní nì tuw-kpà, ka rà thì ddiy-kpà ngú kpì.
6 Wánì ndrǔ rà Drà nì bbu nì gowdha njà ì-nyú nà.”
7 Bíy nì ndrǔ dêy ì nyǎ Yohana dè, ndaní à bbú bàtízò ì dhò. Chú, à kâ tdra ndrǔ dhò ǐchú: “Ngìydhá-kpà, ɦîy ní nì òluw nì gòw-kpà! Nyì dhò, áyìy dhò ná ndey ya ŋǎchú nyì kà nyì nyǐ ndèy rà shì nì Drà mí thǒw? 8 Nyì dho nyì dhà rónga nyì lî ddiy, nyì òluw nì ngǎjìní lò nyì kô ddiy ò ndèy tsi ddiy òluw, nzǐ nyì tdra nyì nyìníddù: ‘Màdhí bbuwnì nì Abrahamua.’ Ddiydhò, manì tdrǎ nyì dhò kpǔkpǔ, Drà kà ndèy zǐy í djuw-kpà, ndaní ndèy léy ddiy-kpà ngú Abrahamu ngá nzòw ní! 9 Lǒ ka zìy ŋà, ndaní ka tděy ndanà tsúw-kpà gudjò, ì-dhey ròluw. Nzǐ ndèy nì lǎní ndèy tsi-kpà ǒ nì wánì tsúw, ka rà tdey ro, ka rà ngbo ddí kàss ò.”
10 Fú bíy nì ndrǔ-kpà kâ dhiy à-tsò ró: “Ndeynì, à kà ná mà dhò mà njěy ddu?” 11 Yohana kâ dey lò ngù kpa dhò: “Rwo ndèy nì rù djú rù nà nì li dhò, ddiy kâ fú li bbú rò mà ddì, ngǎ ndèy ró ddiy nì nì li dhò; nyû nà ndèy nì nì li dhò, ddiy kâ fú li ndǒ fú nyû rò ndòní, ngǎ ì nì nyû nà nì ndrǔ dhò.” 12 Chú, nò-tsò-kpà ɦówdha mí kpa màddí kâ ì nyà, ndaní ka bbú ì dhò bàtízò ro, kpa kâ dhiy Yohana-tsò ró: “Li gwíydha-dja, ddiy kà ná mà dhò mà njěy ddu?”
13 Chú, à kâ lò ngù, à kâ tdrà kpa dhò: “Nzǐ nyì kó nò-tsò-kpà ɦówdha mí mb-ho, ddiy kâ nì djòluw tǐ.”
14 La-dzàdha-djá màddí kâ dey dhiy à-tsò ró: “Mà kě, ddiy kà ná mà dhò mà njěy ddu?” Fúnga nà, à kâ tdrà kpa dhò: “Nzǐ nyì zǐy mb-ho rò ddì nì li rò mà-thokpa óddù klôw nà, ǐngí nzǐ nyì bbow ndrǔ mbwa nà; chú, nyì njey hwî ney nyì nì ndanà nì ddiydhò.”
15 Ndrǔ-tsi wá dêy nga pbǒ ì-thíy óddù, ndrǔ dêy nga dhiy ì òluw, ya Yohana tdè ngǎ Kristo, Drà ngá chì nà ka vìy nì li ro, 16 Yohana kâ tdrà wánì kpa dhò: “Ma nì bàtízò bbu nyì dhò dda nà; chú, děy ndèy nì shǐ nì li nì klôw nà tǐ ma djòluw; ma dhò à kà kàní mǎ nzá ddí, ma kló hwî ndèy bba à koko-rónga-tsò nì shí-kpà-ngìy-tsò. Fúli rà bàtízò bbu nyì dhò, Drà mí Bblǒ Thíy mà, ndèymí kàss nà òluw. 17 À thokpa ó nì nyû-rónga ka lí nì ndanà nì ddiy, ndaní ndèy ndǒ ndanà nyû-tsi mà kàónga, nyû-tsi ró bbùnì nà. À rà nyù-tsi-tsò njuw ndèymí ddèrr̀ ò; chú, à rà ngǎnò tsi ró bbùnì bey nzǐ ndèy nì dhi nì kàss ò.”
18 Yohana dêy ngéyní hwî mí lò-ɦéy tdrǎ ndrǔ-tsi dhò ro, bíy nì njàddí lò kíyddà ndèy nì tdrǎ nì ddiy òluw. 19 Chú, Yohana kâ Galilaya mí dziylíy ó ndèy dêy Pey nyǔ nì li, Herodde mblòw; ddiydhò, à kòw tdè ndèymí djûnǐ ngá ɦìytss, Heroddiya ndèymí njàddí bíyní ngǎjìní lò-kpà à kâ njèy ddiy mí lò dhò. 20 Fú ddiy kíyddà ní, Herodde kâ ngǎjìní njàddí lò njèy: À kâ ley ka chěy Yohana ngiy-dzà ò.
Yesu lòw bàtízò ddiy
(Mat 3:13-17; Mk 1:9-11; Yoh 1:32-34)
21 Ŋà wánì ndrǔ-tsi lòw tdè bàtízò ddiy dzzdjú, Yesu ddí kâ bàtízò lòw. Drà nà à dêy lò těy ro, rakpa-ónga kâ ndèy wi, 22 Drà mí Bblǒ Thíy kâ thu à djò ndèy ró ji nà gbè bbǎlá níchú. Fúnga nà, ddì li-chuw kâ ndèy rr̀ rakpa óddù: “Nyi nì drǒ ma jì nì màtsá Ddùwnì; nyi ó ma lêy màtsá wánì jǐ.”
Yesu shì ì óddù nì gôw mí ndrǔ
(Lot 5; 11:10-27)
23 Yesu lòw njí-tsò ro, àmí cho tdè chow-chow drì-drí nga gbow. Yusufu mí ddùw-nì ní ka dêy à iy ro, Yusufub ndèy ndèyníddò tdè Eli mí ddùw-nì; 24 Eli tdè Matati-ddùw, Matati tdè Lawi-ddùw, Lawi tdè Melki-ddùw, Melki tdè Yunani-ddùw, Yanani tdè Yusufu-ddùw. 25 Yusufu tdè Matatiya-ddùw, Matatiya tdè Amosi-ddùw, Amosi tdè Nahumu-ddùw, Nahumu tdè Esli-ddùw, Esli tdè Nagayi-ddùw. 26 Nagayi tdè Mati-ddùw, Mati tdè Matatiya-ddùw, Matatiya tdè Semeyi-ddùw, Semeyi tdè Yoseki-ddùw, Yoseki tdè Yudda-ddùw, 27 Yudda tdè Yohanani-ddùw, Yohanani tdè Resa-ddùw, Resa tdè Zerubabeli-ddùw, Zerubabeli tdè Salatiyeli-ddùw, Salatiyeli tdè Neri-ddùw, 28 Neri tdè Melki-ddùw, Melki tdè Addi-ddùw, Addi tdè Kosemu-ddùw, Kosemu tdè Elimandemu-ddùw, Elimandemu tdè Err̀-ddùw, 29 Err̀ tdè Yoswa-ddùw, Yoswa tdè Eliyezerr̀-ddùw, Eliyezerr̀ tdè Yorimu-ddùw, Yorimu tdè Matati-ddùw, Matati tdè Lawi-ddùw, 30 Lawi tdè Simeyoni-ddùw, Simeyoni tdè Yudda-ddùw, Yudda tdè Yusufu-ddùw, Yusufu tdè Yonama-ddùw, Yonama tdè Eliyakimu-ddùw, 31 Eliyakimu tdè Meleya-ddùw, Meleya tdè Mena-ddùw, Mena tdè Matata-ddùw, Matata tdè Natana-ddùw, Natana tdè Dawuddi-ddùw, 32 Dawuddi tdè Yese-ddùw, Yese tdè Obeddi-ddùw, Obeddi tdè Bohaza-ddùw, Bowaz tdè Sala-ddùw, Sala tdè Nasoni-ddùw, 33 Nasoni tdè Aminadabu-ddùw, Aminadabu tdè Admini-ddùw, Admini tdè Arni-ddùw, Arni tdè Ezroni-ddùw, Ezroni tdè Perezi-ddùw Perezi tdè Yudda-ddùw, 34 Yudda tdè Yakobbo-ddùw, Yakobbo tdè Isaka-ddùw, Isaka tdè Abrahamu-ddùw, Abrahamu tdè Tera-ddùw, Tera tdè Nahori-ddùw, 35 Nahori tdè Serugi-ddùw, Serugi tdè Rewu-ddùw, Rewu tdè Peledji-ddùw, Peledji tdè Ebere-ddùw, Ebere tdè Sala-ddùw, 36 Sala tdè Kayinani-ddùw, Kayinani tdè Afrozaddi-ddùw, Afrozaddi tdè Shemu-ddùw, Shemu tdè Nowa-ddùw, Nowa tdè Lameki-ddùw 37 Lameki tdè Matusela-ddùw, Matusela tdè Enoka-ddùw, Enoka tdè Yareddi-ddùw, Yareddi tdè Mahalaleli-ddùw, Mahalaleli tdè Kayinani-ddùw, 38 Kayinani tdè Enoss-ddùw, Enoss tdè Sete-ddùw, Sete tdè Addamu-ddùw, Addamu tdè Drà-ddùw.