Yesu gòw ndèy ddiy
(Mat 1:18-25; 5:1-2; Isa 9:5)
2
1 Fú ddu ó, Kayisari Awugusto, cha ndèy tdè Pey ní kpa djú drǒngó ní Pey, Roma mí drǒngó ní bba ó nì, bbû tdè yǎdha ka ndíy fú ngòw ó ì nì dey nì ndrǔ wá. 2 Fú ddì nì mí bíy nì ndrǔ zòwdha, njèy tdè ndèy, cha Kuriniyo tdè gǎvènà Suriya ó nì ro. 3 Fúnga nà, bbalè wánì rà tdè ì ró dho ndiy, njàddí li ndèymí déy ní drǒngó ní bba ò. 4 Yusufu ddí kâ dji, Galilaya mí ngòw ó Nazareti mí drǒngó ní bba óddù, ndaní ndèy rǎ Yuddeya mí ngòw ò, Dawuddi ngá drǒngó ní bba, Betelehemu ní ka nì iy nì; ddiydhò, Yusufu tdè Dawuddi ngà dzá ndèymí à ó gòw ó nì li. 5 À kâ rà Mariya nà, ndèy tdè zǐy ɦìytss ní nì, cha à tdè tǔwtǔw ní nga nà nì, ì rǎ ì ró dho ndiy.6 Chú, ndrǔ tdè fulè Betelehemu ò ro, Mariya kà tdè ndèy kló ndèymí ddu kâ ro, 7 à kâ nděyngá ddíydjò ní kpatss̀ ní ngba gòw. À pbì ngba rónga rù nà ro, à kâ ngba là měyá nyu nì nga mí nò ò; ddiydhò, nga rò tdè ngǎ ndrǔ dhò lu-dzà ó.
Malayika dhò ndèy, měyá rónga ì nì pbǒ nì kpa dhò ddiy
(Isa 41:27)
8 Fú dziylíy ó, tdè měyá rónga ì dêy pbǒ nì kpa. Kúw nà fúkpa dêy ddǔ tsó òluw ìdhí měyá mí hó-rónga pbòdha dhò. 9 Fúnga nà, bba-dja Ddrǎ ngá malayika kâ shì kpa dè ro, Drà mí kadha kâ kpa-rónga tdyi gbrǔ, drǒngó ní do ddí kâ kpa lòw. 10 Chú, malayika kâ tdrà kpa dhò: “Nzǐ nyì njey do; ddiydhò, ma mbà nyìdhò drǒngó ní hwî mí lò-ɦéy; drǒ ndèy rà wánì ndrǔ-tsi nyú thò nì; 11 Ndu nì í kúw nà, Dawuddi ngá drǒngó ní bba ó, gôw dhò ka vû nì li gòw ndèy. À nì Drǒngóli, Kristo. 12 Nyì nja, nyì rà à njà rǒmá nì ji nì i: Nyì rà shì rù nà kà pbì ndèy-rónga nì kà ní ngba chùw, měyá nyu nì nga mí nò ó ndèy ka là.”
13 Fúnga nà, chú déy, fú malayika kuwtsó, bíyní malayika-kpàmí hó kâ ì nyà rakpa óddù, Drà ì nì ma, yà ì nì tdrǎ ǐchú:
14 “Madha déy Drà dhò, ru pléy nì rakpa òluw,
li-thíy-tsò djówdha déy dziylíy djú ì nì dey nì jìní à jì ì nì bbalè dhò.”
Měyá ró ì nì rǔ nì kpa nì rǎ Betelehemu mí bba ò ddiy
15 Malayika kpà rà kpa kuwtsóddù, ndaní ì ngú rakpa ò ro, měyá ró ì dêy rǔ nì kpa dêy lò tdrǎ ddì li njàddí li dhò: “Mà ra ndeynì Betelehemu mí bba ò chú kpòw; mà njǎ cha ndèy njèy ndèy nì ddiy Drǒngóli, Drà lêy mà tsǐ nì.” 16 Fúnga nà, kpa kâ rà zěy-zěy ro, kpa kâ shì Mariya mà Yusufu nà chùw; ndèymí kà ní ngba ka là měyá nyu nì nga mí nò ó. 17 Chú, ndrǔ njà fú ngba ddiy dzzdjú, fúkpa kâ malayika tdrà tdè ì dhò fú ngba djò nì lò-tey klo. 18 Wánì bbalè, cha ì rr̀ fú lò nì ónga ꞌwìy wá, fú měyá rónga ì tdè pbǒ nì kpa dêy tdrǎ ì dhò nì lò dhò. 19 Chú, Mariya dêy fú lò-kpà wánì rónga pbǒ ro, à dêy ǒnga ddey ndèy-thíy ó; 20 Fú ddiy dzzdjú, měyá rónga ì tdè pbǒ nì kpa kâ ngu. Kpa dêy Drà mí drǒngó ní nga mà ndèymí madha bbu, ì rr̀ nì ndèymí ì njà nì wánì ddiy mí lò dhò. Wánì lò njèy tdè ndèy, cha malayika tdrà tdè níchú.
Ngba ró dho ka lêy Yesu ní ddiy
21 Ddu rù, cha ka tdè rǎ yâ krr̀ ngba ró nì shì tdè ro, ka lêy ngba ró dho Yesu. Dho, cha malayika bbû tdè děy nzá àmí yâ-nì chùw tdè àmí tǔwtǔw ní nga ní ro.
Ka mbà Yesu Drà-dzà ò ddiy
22 Fú ddiy dzzdjú, ùní ka u Drà mí ddiy ní nì ddiy ka nì njěy, gbè Musǎ ngá yǎdha tdrà ddiy níchú mí ddu shì ro, Yusufu mà Mariya nà kâ ngba mbà Drà mí dza ò, Yerusalemu mí drǒngó ní bba ò, ndaní ka bbú à bba-dja, Drà dhò, 23 gbè bba-dja Drà mí yǎdha mí bǔkù ó ka ndîy níchú: “Ddíydjò ní kpa nì nzòw chú wá, ka rà ley Drà dhò nú thí.” 24 À kâ tdè kpa bbú fú lò dhò ŋà kâ nì bbudha ní ddiy: Bbǎlá rwo, ǐngí liyrr̀ rwo, cha gbè ka ndîy: Drǒngóli Drà mí yǎdha ó níchú.
25 Fúnga nà, ddì nì kpatss̀, ndèy ró dho nà Simewoni nì tdè Yerusalemu mí drǒngó ní bba ó. Fúli tdè chǒw ní lò ndèymí Drà-dò ndèy tdè njěy nì li; fú li dêy Israeli ndèy kà ndèy gów nì li pbǒ. Drà mí Bblǒ Thíy tdè à nà, 26 Drà mí Bblǒ Thíy tdrà fú li rà dhì nzǐ ya děy nzá ndèy vè Kristoa, bba-dja Drà mí li ní ka vìy chì nà nì li njà ní. 27 Drǒngóli Drà mí Bblǒ Thíy ddà à jòkpa-tsò ro, Simewoni kâ rà Drà mí dza ò. Yesu mí gòw mí ndrǔ mbà tdè kà ní ngba Yesu, ndaní ì njěy bba-dja Drà mí yǎdha dêy ko nì lò à dhò. 28 Fúnga nà, Simewoni kâ ngba ko ndèy ngò djò ro, à kâ bû bbu Drà dhò, yà ndèy nì tdrǎ ǐchú:
29 “Nja-nja, Drǒngóli, Drà,
bba nyìmí dhǐy mí li, à rǎ li-thíy-tsò djówdha nà, gbè nyi-tsò ró lò tdrà níchú.
30 Ddiydhò, ma njà nyìmí gowdha pbǔw ma-nyú nà;
31 wánì ndrǔ-tsi-kpà nyú djú, nyi thì nì gowdha.
32 À nì Yunani-ddúw rà nyi tsì òmàluw nì kadha,
à rà tdè nyìmí ndrǔ-tsi Israeli mí madha.”
Drà ró dho nà Simewoni nì lò těy ndrǔ dhò děy ndèy rà shì nì lò-djò ddiy
33 Fú ngba mí djǎnì mà yâ-nì nà, ónga dêy ꞌwǐy wá fu Simewoni dêy tdrǎ fú ngba djò nì lò dhò. 34 Simewoni kâ bû nzz̀ kpa djò ro, à kâ tdrà Yesu mí yâ-nì, Mariya dhò: “Í ngba nì ndrǔ ngbòdha dhò, ndèymí Israeli mí bíy nì ndrǔ ngu djiy ní ddiy mí lò dhò. À rà tdè, gbè nzǐ li-chuw-tsò nì ndèy gbǎ nì ddiy rà bbu nì ji níchú. 35 À nì ddí fǔchú, Mariya, nyi thíy-ónga chú, nga ddéydha rà tòw gbè la-dzàdha mí rwo ndèy kuwdjò nà nì dyi níchú; ndaní bíy nì ndrǔdhí djiy ó, rùní ndèy rù ndèy nì nga ddéydha ká ndèy ko lálá ní nga ò.”
Drà ró dho nà Ana nì lò těy ndrǔ dhò děy ndèy rà shì nì lò-djò ddiy
36 À tdè Drà ró dho nà ndèy nì lò těy ndrǔ dhò děy ndèy rà shì nì lò-djò nì ɦìytss ní li, Ana, Fanuweli mí dhànì, Aserr̀ mí bbúwb ó nì. À tdè ngó ní. Àmí yǎddá ní nga djúddù, à kòw tdè ndèy ddiy dzzdjú, ndrǔ dêy tdè nděyngá dza-dja nà cho zarr̀gbòw. 37 Àmí dza-dja dhì ddiy dzzdjú, Ana mí cho shì tdè drì-drí nga rù ndèy djú tho nì nà. À dêy ndèy dda Drà mí dza óddù nzǐ; chú, à dêy njí njěy Drà dhò itsś ś ndèymí kúw-ónga ná wá: À dêy nyû-tsò chěy ndèy ró, ndèy nì nzz̀dha nzǐ ro. 38 Fúnga nà, Ana shì dey madha bbu Drà dhò ro, à kâ dey Yesu djú lò tdrǎ, cha ì dêy Yerusalemu mí drǒngó ní bba, Drà kló ddiy ì nì pbǒ nì ndrǔ dhò.
Nazareti mí drǒngó ní bba ò Yesu mí gòw mí ndrǔ nì ngu ddiy
39 Ŋà Yesu mí gòw mí ndrǔ tdyâ tdè bba-dja Drà mí yǎdha ó lò-tsò ro, Yusufu mà Mariya nà kâ ngu Yesu nà Galilaya mí dziylíy ò, ìdhí drǒngó ní bba, Nazareti ò. 40 Chú, ngba dêy dhǐy ro, à dêy klôw chûw. À tdè lò-ónga ndòdha mí nyǔꞌwiy nà drǒ, Drà mí zòw tdè à djú.
Yesu rà Drà mí dza ò, ddri ndèy djú rwo nà ndèymí cho nì ro ddiy
(Yad 16:1-8; Lot 20:11; Isa 11:1-2)
41 Wánì cho ró, Yesu mí gôw mí ndrǔ dêy rǎ Yerusalemu mí drǒngó ní bba ò, Pasaka mí drǒngó ní ddu mí nyû dhò. 42 Yesu mí cho shì ddri ndèy djú rwo nà ro, ndrǔ kâ dji Yerusalemu mí drǒngó ní bba ò, gbè drǒngó ní ddu dhò ka dêy njěy níchú. 43 Ŋà drǒngó ní ddu mí nyû-tsò tdyâ tdè ndèy-ro, kpa kâ ngu; chú, ngba Yesu kâ mà kpa kodjúddù Yerusalemu mí drǒngó ní bba ò. Àmí gòw mí ndrǔ tsì tdè fú ddiy rò nzá. 44 Ndrǔ dêy ddey, ì bbîy ndanà nì ndrǔ nà Yesu mà tdè ddiy ní ro, kpa bbîy tdè ddì ní tdûw. Fú ddiy dzzdjú, kpa kâ dey Yesu měy ìdhí ndrǔ mà, ìdhí lu ní bíy nì ndrǔ mànà nì kàòluw. 45 Chú, kpa chùw tdè à nzá ro, kpa kâ ngu Yerusalemu mí drǒngó ní bba ò à mèydha nà. 46 Ddu gbow nì dzzdjú, ndrǔ kâ à ɦuwdjò tdèy Drà mí dza ò; à dêy dey yǎdha mí li-gwíydha-djá kàó, yà ndèy nì kpa dêy těy nì lò rř ro, à dêy nga mà kpà dhiy kpa-tsò ró. 47 Ì tdè à dêy těy nì lò rř nì ndrǔ wá ónga dêy ꞌwǐy wá, àmí lò-tsìdha mí nyǔꞌwiy mà, lò-kpà à dêy ngǔ ddiy mànà nì dhò. 48 Àmí gòw mí ndrǔ kâ à njà ro, kpa-ónga kâ ꞌwìy wá, àmí yâ-nì kâ dhiy à-tsò ró: “Màtsá ngba, nyi njèy ná ddu mà ró fǔchú? Djǎnyi, ndèymí ma nà, nyi mànì měy ro, mà-ónga dêy tdǒ drǒ.”
49 Fúnga nà, Yesu kâ lò ngù ndèymí gòw mí ndrǔ dhò: “Nyì tdè ná ma měy ddudhò? Nyì njà ná nzá à kâ ma njěy màtsá djǎnì mí njí ddiy?” 50 Chú, Yesu dêy tdrǎ kpa dhò nì lò lòw tdè kpa-djùkpa nzá.