Setani nì Yesu-thíy-ónga mbǔ ddiy
4
1 Yesu-ónga kì tdè Drà mí Bblǒ Thíy nà ro, Yesu ngû tdè Yoroddani mí pbèyní ndèy nì pběy nì drǒngó ní dda-tsò róddù ro, Drà mí Bblǒ Thíy kâ tuw-tsò dda à dhò ɦiynínga ò; 2 fulè, dìyàbólò kâ Yesu thíy-ónga mbù ddu drì-drí nga tho nì dhò. Fú ddu-kpa ó wá, à kâ nga rò nyù nzá. Chú, fú ddu-kpà-tsò tdôw ro, ɦùw kâ à lòw. 3 Dìyàbólò kâ tdrà à ní: “Ya nyi nì Drà-ddùw ro, tdra í djuw dhò ddiy lí ndèy mùkátì ní.” 4 Yesu kâ lò ngù à dhò: “Drà mí bǔkù ó ka ndîy nì lò nì tdrà kpǔkpǔ: ‘Ndrǔ rò rà dey nzǐ djiy ní nyû nà kpala-kpala.’”5 Fú ddiy dzzdjú, setani mbà à ru pléy nì nga ó ro, à kâ ngòw djú dzò nì Pey mí nga-kpà wánì dhò à dhò ro, 6 dìyàbólò kâ tdrà Yesu dhò: “Ma rà fú drǒngó ní nga wá ndèymí fú Pey mí nga-kpà mí kpá-kpánga ndèymí madha nà bbu nyi dhò; ddiydhò, fú ddiy ka bbû ma dhò, ma rà fú ddiy bbu, ma jì ma bbú nì li dhò.” 7 “Ya kě nyi bbû madha ma dhò ro, wánì ddiy rà tdè nyìmí ddiy ní.” 8 Yesu kâ lò ngù à dhò: “Drà mí bǔkù ó ka ndîy ǐchú: ‘Nyi rà madha bbu Drǒngóli nyìmí Drà dhò, à nì à chúddì, nyi rà ma.’”
9 Chú, fú ddiy dzzdjú, setani kâ à mbà ddíyàchú, Yerusalemu mí drǒngó ní bba ò, à kâ Yesu tduw ru, Drà mí dza djú pléy ndèy tdûw ndèy nì nga ò ro, à kâ tdrà Yesu ní: “Ya nyi nì Drà-ddùw ro, ngbo nyi ingáddù gudjò; 10 ddiydhò, Drà mí bǔkù ó ka ndîy ndèy nì lò nì tdrǎ kpǔkpǔ: ‘Drà rà yǎdha-kpà bbu nděyngá malayika dhò, ndaní ì pbǒ nyi rónga.’ 11 Fú ddiy kíyddà ní, kpa rà nyi tduw ì-thokpa ó, ndaní nzǐ ddì nì djuw rò ddí pběy nyi koko.” 12 Yesu kâ lò ngù à dhò: “Drà mí bǔkù ó ka ndîy ndèy nì lò nì tdrǎ kpǔkpǔ: ‘Nzǐ nyi mbǔ Drǒngóli nyìmí Drà-thíy-ónga.’” 13 Ŋà à mbù Yesu-thíy-ónga ngéy-ngéy ní tuw-kpà òluw wá ddiy dzzdjú ro, dìyàbólò kâ ndèy dda Yesu róddù ndì, njàddí ngéy ní nga djò chú kpòw.
Yesu lòw ndèymí njí-tsò Galilaya mí dziylíy óddù ddiy
(Isa 61:1-3; Mat 4:12-17; Mk 1:14-15)
14 Fú ddiy dzzdjú, Yesu kâ ngu Galilaya mí dziylíy ò, ŋà ndèy-ónga kì věy Bblǒ Thíy mí kpá-kpánga nà ro. Fúnga nà, ndrǔ dêy à djú lò těy fú dziylíy kuwtsòluw nì dziylíy òluw wá ro, 15 à dêy bíy nì ndrǔ gwiy Yahuddi-ddúw dhí ddǐnì-dzà-kpà òluw wá ro, wánì bíy nì ndrǔ dêy à ma mádha ní.
Nazareti mí drǒngó ní bba ó ndrǔ gù Yesu ddiy
(Mat 13:53-58; Mk 6:1-6)
16 Fú ddiy dzzdjú, Yesu kâ ngu Nazareti mí drǒngó ní bba ò, dhìy ní ndèy dhìy ǒmá nì. Sabato ddù ó, à kâ tsùw Yahuddi-ddúw dhí njuwdha-dzà ò, cha ney ndèy dêy njěy níchú. À kâ ndèy ngbi Drà mí bǔkù ó ka ndîy ndèy nì lo zòwdha dhò. 17 Ka kâ à dho Drà ró dho nà ì nì lò těy děy ndèy rà shì ní lò-djò nì li, Isaya ngá hòní ka dêy tsò nì hǒ nì bǔkù bbu. À kâ fú bǔkù ónga wi ro, à kâ ǐchú ka ndîy nga ǒmá nì nga chùw:
18 “Drǒngóli, Drà mí Bblǒ Thíy nì ma-djú,
ddiydhò, à vìy ma, Drà mí li ní ka nì li vǐy ndanà nú ngéy nì chì nà,
ndaní ma tdrǎ àmí hwî mí lò-ɦéy zòw ní ndrǔ dhò.
À chô ma, ndaní ma tdrǎ lò drǒngó ní ma-chuw nà kpǔkpǔ,
ngiy-dzà ó ìnì nì ndrǔ ka rà klo nì ddiy djò,
ma bbú nga njàdha, nzǐ ì-nyú nì nga njǎ nì ndrǔ dhò;
à chô ma, ndaní ma ngǔ nzání ka nì nza nì ndrǔ, ì ngú ngǎ ì djú lò nà nì ndrǔ ní;
19 À chô ma, ndaní ma tdrǎ bba-dja, Drà rà shì lǎnínga njèy ndrǔ dhò ǒmá nì cho-ɦéy.”
20 Fú ddiy dzzdjú, Yesu hò bǔkù-tsò ro, à kâ ngù dhǐy mí li-thokpa ò, à kâ dòw gudjò. Yahuddi-ddúw dhí ddǐnì-dzà ó ì tdè nì ndrǔ wá, dêy à njǎ chǒw. 21 Chú, Yesu kâ lòw dey tdrǎ ndrǔ dhò: “Í bǔkù ó ndíyní ka ndîy nì lò, fu nyì rr̀ ndu nì, ddiy njèy ndèy ŋà.” 22 Yesu djú ì dêy lò těy wánì ndrǔ ónga dêy ꞌwíy à-tsò óddù dêy shǐ nì zòw mí lò dhò ro, ndrǔ dêy tdrǎ: “Fúní ngǎ Yusufu mí ddùw-nì?” 23 Fúnga nà, Yesu kâ tdrà kpa dhò kpǔkpǔ: “Dìchú nú, nyì rà í lò-ngbòdha tdrà ma ní: ‘Munganga, pá nyi, nyiníddò.’ Nyì rà ngu tdrà ma ní ǐchú: ‘Njey gbè cha Kapernawumu mí ngòw ó, mà rr̀, nyi njèy tdè nì lò-kpà wá ingá, nyìmí déy ní bba ó.’” 24 Fú ddiy dzzdjú, Yesu kâ lò kíyddà ndrr ǐchú: Ma nì dìychú ní lò tdrǎ nyìdhò: “Drà ró dho nà ì nì lò těy ndrǔ dhò děy ndèy rà shì nì lò-djò nì ddì nì li rò mà, nzǐ ka kó nì lǎní, gòwní ka gòw ndèy nì bba ó. 25 Fú ddiy kíyddà ní, dìychú ní lò ó, manì tdrǎ nyì dhò, chìní ì-kpá chì ì nì dhì tdè bíy Israeli mí dziylíy ó, Eliya mí cho ó, nzá dji rò kô tdè rakpa óddù cho gbow ndèymí bǐy za nà ro, ɦùw kâ chèy dziylíy wánì djò. 26 Chú, Drà chô tdè Eliya nzá fú dhì kàó ddì li dè mǎ ddí; chú, Drà kâ à cho Sidoni mí dziylíy ó, Serepta mì bba ó ndèy tdè dey nì ddì nì ɦìytss ní li dè chúddì. 27 Drà ró dho nà ì nì lò těy ndrǔ dhò děy ndèy rà shì nì lò-djò nì ddì li, Elisa mí cho ó ddí, tsátsá nà nì ndrǔ tdè bíy Israeli mí dziylíy ó. Tsátsá mí dhi nà nì fú ndrǔ kàó ddì li rò ddí kpe, ka lêy tdè ùní ndèy ù ndèy nì li ní ddí nzá; ya à tdě ngǎ nú Namani, Suriya mí dziylíy ó nì li ro.”
28 Fú lò ì rr̀ ro, Yahuddi-ddúw dhí ddǐnì-dzà ó ì tdè nì ndrǔ wá ónga kì vey nà. 29 Fúnga nà, ndrǔ ngbî ì ro, ndrǔ kâ Yesu dìy drǒngó ní bba óddù rúgò, ndrǔ kâ à mbà Nazareti mí drǒngó ní bba ka ss̀ djǒmá nì gbè ní ngòw djòchi ò, ndaní ì djiy à djòtey bbi fú ngòw djúddù. 30 Chú, Yesu dà fú bbalè kàòluw ro, à kâ rà ndèy dhò nú.
Nzání che thíy dêy nza nì li
(Mat 4:13-16; 8:14-18; Mk 1:21-39)
31 Fúnga nà, Yesu kâ rà Galilaya mí dziylíy ó, Kapernawumu mí drǒngó nì bba ò ro, à dêy bíy nì ndrǔ gwiy Sabato ddù ó. 32 Ndrǔ ónga dêy ꞌwǐy wá àmí lò-gwíydha dhò; ddiydhò, àmí Drà nzz̀dha tdè kpá-kpánga nà. 33 Yahuddi-ddúw dhí ddǐnì-dzà ó tdè nzání dàyìmónì mí che thíy dêy ndèy nza nì ddì li ro, fú kpatss̀ lòw dey swa rí ní ndèy chuw nà: 34 “Nazareti mí drǒngó ní bba ó li, Yesu dye! Nyi nà mà kàó ná ddu lò? Nyi shì ná mà sàdha dhò? Ma tsì, Drà mí ngǎ ndèy ó cherr rò nà nì li, nyi nì ddiy ŋà!” 35 Fúnga nà, Yesu kâ dàyìmónì mblòw, yà ndèy nì tdrǎ ǐchú rí ní ndèy chuw nà: “Chey nyi-tsò, shi fú li óddù!” Che thíy kâ fú li ngbò gudjò wánì bíy nì ndrǔ-kpà kàó ro, fú che thíy kâ shì à óddù, yà nzá ndèy njèy ngǎjìní lò rò ddì ddí kpe à ró ní 36 wánì bíy nì ndrǔ, bbìní li-rónga bbi dhò mànì do kâ lòw ro, ndrǔ kâ dey tdrà, ì kàòluw: “Fú ní ddu mí lò? Fúli nì lò tdrǎ klôw nà, ndèymí kpá-kpánga nà che thíy-kpà dhò ro, ddiy-kpà nì shǐ shìní.” 37 Yesu ɦuwdjò dêy ndrř wánì nga òluw.
Yesu pâ ì nì dhi nà nì bíy nì ndrǔ ddiy
(Mat 8:14-17; Mk 1:29-34)
38 Chú, Yesu shì Yahuddi-ddúw dhí ddǐnì-dzà óddù mi nga nà, à kâ rà Simoni bbâ. Simoni mí djǎnì ró dhi mí kàss tdè drǒ mí lò dhò, ndrǔ kâ dhiy Yesu-tsò ró, ndaní à kó à tso-tso. 39 Fúnga nà, à lù ndèy-ónga à djò ro, Yesu kâ à ró dhi mí kàss mblòw rí ní ndèy chuw nà ro, à ró dhi mí kàss kâ ndèy si ndùw. Fúnga nà, à kâ ndèy ngbi ro, à kâ lòw dey kpa-tso-tso ko.
40 Chú, itsś ś dêy tsûw mí ngǎ nà, ngéy-ngéy ní dhi mí bíy nì ndrǔ nà ì tdè nì ndrǔ wá, kâ fú dhi mí ndrǔ-kpà mbà Yesu dè. À kâ ndèy-thokpa ley dhi mí ndrǔ kàó ddìddì ní li djò ro, à kâ ndrǔ ró dhi pa. 41 Chú, dhi nà nì bíy nì ndrǔ óddù ddí, dàyìmónì mí che thíy-kpà lòw dey ì nyà, yà ì nì swa rí ní ì-chuw nà: “Nyi, nyi nì Drà-ddùw nì ndey!” Chú, Yesu dêy che thíy-kpà mblǒw rí ní ndèy chuw nà ro, à dêy ddiy-kpà-tsò gǔ, nzǐ ddiy-kpà těy lò; ddiydhò, ddiy-kpà tsì tdè tsìní, à tdè Kristo, Drà mí chì nà ka vìy nú ngéy nì li.
Yesu nì li gwiy Yahuddi-ddúw dhí ddǐnì-dzà-kpà òluw ddiy
(Mk 1:35-39)
42 Chú, nga bbû tdè ro, Yesu rà drǒngó ní bba óddù ro, à kâ rà ngǎ ndrǔ rò tdè mí nga ò. Fúnga nà, bíy nì ndrǔ lòw dey à mèy. À ró ndrǔ kâ shì ro, ndrǔ jì tdè ì chǒ à-tsò chòní, nzánà à ddá ndèy ì kuwtsóddù. 43 Chú, Yesu kâ tdrà ndrǔ dhò: “À kâ ma dhò ma tdrǎ Drà mí Pey mí nga mí Hwî mí lò-ɦéy njàddí ngéy ní drò-dró ní bba òluw màddí; ddiydhò, à nì fú lò dhò chú, Drà chô ma ddiy.” 44 Yesu dêy lò tdrǎ Yahuddi-ddúw dhí ddǐnì-dzà-kpà òluw.