Yesu îy ndèy kodjú ì nì rǎ nì nji nì kpa ddiy
(Mat 4:18-22; Mk 1:16-20; Yoh 21:1-11)
5
1 Ddì ní, Yesu tdè Genezareti mí drǒna, gó ní dda-tsò ró ro, bíy nì ndrǔ njûw tdè ì à ròluw gbrǔ ì pbíydha nà, Drà mí lò-rr̀-dha dhò. 2 Yesu njà ngǒ rwo bbì lówdha-djá dhî, cha ndrǔ thû tdè gudjò ǒmáddù ìdhí njǒw gbúdha dhò nì. 3 Yesu tsùw ddì nì ngǒ ò, cha ndèy tdè Simoni ngá ní nì, à dhîy Simoni-tsò ró, pbiy ma djòtey dziylíy djúddù dda ò. Yesu dòw ngǒ ó ro, à lòw dey bíy nì ndrǔ gwiy Drà mí lò nà.4 Ŋà à sî bbalè gwíydha ro, à kâ tdrà Simoni dhò: “Pbiy ngǒ dda liy ò, nyì ngbǒ nyìdhí njǒw nyì dyâsi nà, ndaní nyì lów bbì.” 5 Simoni ngù lò Yesu dhò: “Drǒngóli, mà njèy dhǐy re, mà chùw ddiy rò nzá: chú, nyi tdrà ddi mí lò dhò, mà rà njǒw ngbò sûw.” 6 Ŋà ndrǔ njèy gbè Yesu tdrà níchú ro, ndrǔ lôw bbì věy, ndrǔdhí njǒw ddí lòw dey ndèy tdey. 7 Ndrǔ hwêy ì-dyâsi, cha ì tdè njàddí ngǒ ó nì, ndrǔ rǎ ì-tso-tso kódha dhò. Fú ngǒ rwo nì tdè chow-chow tsùwdha nà dda ò, ì kì bbì nà ddiy mí lò dhò. 8 Simoni Petro njà fú lò ro, à kò ndèy Yesu kotéy, à tdrà, “Drǒngóli, nzǐ ndrr ma dè, manì cherr-djá.” 9 Fú bbì ì lôw ddiydhò, do lòw Simoni mà ndèy dyâsi nà wá. 10 Zebiddayo ngá nzòw, Yakobbo ndèymí Yohana, cha ì tdè dhǐy njěy Simoni mànà nì ddí, do lòw. Yesu kâ tdrà Simoni dhò, “Nzǐ do njěy nyi, nja-nja, bbì lówdha-rr̀dja ó, nyi rà bbalè-tsò njuw ma dhò.” 11 Fúddiy dhò, ndrǔ ddâ ìdhí ngǒ dda-tsò ró dziylíy djò, ndrǔ bbà wánì ddiy, cha ì tdè njěynì, ndrǔ dyòw Yesu dzzdjò.
Yesu pâ tsátsá nà nì li-rónga ddiy
12 Ddì ní, Yesu shì ddì nì bba ó ro, à njûw ndèy tsátsá mí li nà. À njà Yesu ro, à rà Yesu dè. À tòw ndèy djùkpa gudjò, à kô Yesu, à tdrà, “Drǒngóli, ya à kâ ro, gbú ma ró í dhi, nyi ngǔ ma thí.” 13 Yesu mbû à-rónga, à tdrà, “Ma ùw ŋà nyi ngú thí!” Fúnga nà, ndùw, tsátsá vîy à róddù. 14 Yesu tdrà à dhò, “Nzǐ nyi tdrǎ fú lò njáddí li dhò, ra nyi rónga dhò Drà ngá dyǎdjá dhò. Nyi rǎ madha bbu nyi rónga ngû thí mî, nyi-thokpa ó ddiy nà, cha Musǎ ngá yǎdha tdrà tdè níchú, ndaní wánì bbalè tsǐ nyi rónga pâ dìychú ddiy.” 15 Fǔchú mǎ kpe, Yesu ɦuwdjò rr̀ ndèy sûw wánì nga òluw. Bíy nì ndrǔ dêy ì njuw, ì rř Yesu tdè tdrǎ nì lò, ndaní à pá ì ró dhi màddí. 16 Fú nga óddù, Yesu rà lò tèy Drà nà hwî ní ɦiy ní nga ò.
Yesu pâ djówdjów mí dhi nà ni li ddiy
(Mat 9:1-8; Mk 2:1-12)
17 Ddì ní, Farisayó ní kpa ndèymí Musǎ ngá yǎdha-ónga túwdha-djá nà, ndrǔ dòw dey Yesu chuw rř, cha à nì bba-dja Drà mí lò tdrǎ ddiy. Fú bbalè shì tdè bíy nì bba, Galilaya ó nì, Yuddeya mí ngòw óddù nì ndèymí Yerusalemu mí drǒngó ní bba nà. Fúnga nà, Drà bbû Yesu dhò li pádha mí kpá-kpánga, ndaní à léy dhi nà nì ndrǔ pá. 18 Njàddí bbalè rà Yesu dè, cha ì tdûw ndèy nì djówdjów mí dhi nà nì li ra djú. Ndrǔ jì tdè ì tsúw à dzá, ndaní ì léy à Yesu njìó. 19 Bíy nì ndrǔ tdè ddiydhò; tsùwdha Yesu dè tdè klǒw, fú ddiy lêy ndrǔ djèy ru, dza-djùkpa wi. Ndrǔ thû à Yesu njìó ndèymí ɦíydha mí nò djú. 20 Yesu njà ndrǔdhí ùwdha ro, à tdrà fú kpatss̀ dhò, “Í kpatss̀ š, nyìmí cherr sà ndèy ŋà.”
21 Farisayó ní kpa-djá ndèymí yǎdha ì nì ndíy nì kpa mànà ngà lò-tdràdha ì kàòluw: “Í ná áyìy, cha ndèy tdra ǐchú nì nzow mí lò Drà ró nì! Áyìy dhò ná ndey bbalè dhí cherr sà, ya ngǎ Drà chúddì ro?”
22 Yesu, cha ndèy tsì tdè ndrǔdhí ddeydha wánì, ngù ndrǔdhí lò ǐchú: “Ddudhò nyì ná lò ddey nyì-thíy òluw fǔchú?” 23 Ŋánì ní ndey lǎní tdràdha nà, “Nyìmí cherr sà ndèy ŋà nyi dhò, njàddí kě tdràdha nà, ‘Ngbí nyi, nyi bbíy?’” 24 Nja-nja, nyì rà tsì dìychú, Ndrǔ-Ddùw nì kpá-kpánga nà bbalè dhí cherr sàdha mî í dziylíy djú. Yesu tdrà fú kpatss̀ dhò, “Ngbí nyi ru, tdúw nyìmí ɦíydha mí nò ddí, nyi ngú nyi bbâ.” 25 Fúnga nà, à ngbî ndèy ru, à tdûw nděyngá nò, à ngû ndèy bbâ, Drà mádha nà. 26 Bbalè wánì ónga ꞌwìy, ndrǔ lòw dey Drà ma. Ndrǔ ónga ꞌwìy ì njà nì ddiy mí lò dhò, à lêy ndrǔ tdrà ǐchú: “Ndu mà njà nzá mà vè njà nì ddiy!”
Yesu îy Lewi (Matayo) ddiy
(Mat 9:9-13; Mk 2:13-17)
27 Yesu rà fú nga óddù ddiy dzzdjú, à njà nò-tsò-kpà ɦówdha-dja, cha ndèy ró dho tdè Lawi nì, à dòw nò-tsò kpà ɦówdha mí nga ó. Yesu tdrà à dhò, “Dyow ma-dzzdjò.” 28 Lewi bbà wánì ddiy, à rà Yesu kodjú.
29 Ŋà ndrǔ shì bba kàò ro, Lawi shì drǒngó ní nyû thì Yesu mà dhò. Njàddí bíy nì ndrǔ-kpà ndèymí nò-tsò-kpà ɦówdha mí ndrǔ nà ddí, nyù nga ddǐ nga ó Yesu mànà. 30 Farisayó ní kpa ndèymí yǎdha ì nì ndíy nì kpa mànà ónga ndrû Yesu kodjú ì nì rǎ nì kpa dhò: “Ddu mí ní, nyì ní nga nyǔ nò-tsò-kpà ɦówdha mí ndrǔ ndèymí njàddí cherr-djá mànà?”
31 Yesu ngù lò ndrǔ dhò: “Ì-rónga nà vukávu nì ndrǔ mey nì li-rónga pádha-djá nzǐ, dhi nà nì ndrǔ chú mèy nì ndey, li-rónga pádha-dja. 32 Ma rà ngǎ chǒw ní lò ì nì njěy nì bbalè dhò; chú, ma rà cherr-djá iy, ndaní ndrǔ lí ì-jùw Drà dè.”
Lò dhíydha, Drà nzz̀dha ngǎ nyû ní ddiy djú
33 Ddì ní, Yesu kodjú kpa tdrà Yesu dhò: “Yohana dzzdjú ì dêy rǎ nì kpa ndèymí Farisayó ní kpa mànà dêy nzz̀dha nzǐ ndèymí nyû-tsò chèydha nà njàddí ngà nà. Chú, nyǐngá kpa kě ná nyû nyǔ ndèymí nga mbǔ ddu mí ní?”
34 Yesu tdrà ndrǔ dhò: “Sǐngba-kpà mí lu kà ná ŋà ì déy nyû-tsò chèydha ní, cha ka nì ìdhí ków mí nga ó, ì nì hwî njěy ro?” Nzǐ! 35 “Ddu rà shì ney, cha ka rà ndanà sǐngba-kpà tduw fú ndrǔ róddù mî, fú ddu ó chú, ndrǔ rà Drà nzz̀ nyû-tsò chèydha ní. Fúli mí dyasi rà rà ɦùw nà.”
36 Yesu tdrà ndrǔ dhò lò-ngbòdha nà, li rò nì ngǎ, cha ndèy dho rù klǐ ónga tow rù-tdey-tsò nà nì, ya à njěy fǔchú ro, fúnì ddiy thâ rù tdey; ddiydhò, rù tdey mà dho nzǐ ì njûw rù klǐ nà.
37 “Li rò nì ngǎ, ndèy léy nì dìyváyìy-ngìy-tsi wà mí tdey dìyváyìy-ngìy-tsi wà mí ɦèy mí sàwu ò, ya à njěy fǔchú ro, dìyváyìy-ngìy-tsi wà mí tdey rà dìyváyìy-ngìy-tsi-wà-ɦèy mí sàwu thà, cha ddiy nì djǐ ro, ddiy rà ndèy tdiy. 38 Dìyváyìy-ngìy-tsi wà mí tdey, ddiy kà ka léy dìyváyìy-ngìy-tsi wà mí tdey mí sàwu ò. 39 Li rò nì ngǎ, cha ndèy ji nì ndèy mbǔ nzá djì nì dìyváyìy-ngìy-tsi wà mí ndèy djì nì dzzdjú. Ddiydhò ndrǔ tdra nì, ‘Djìdha ní dìyváyìy-ngìy-tsi wà mí nì lǎnía.’”