Yesu ngbò lò ró ji dhìní ndèymí kpatss̀ dhì nì ɦìytss ní li djúddù ndèymí lò ndèy nì tděy nì li nà ddiy
(Isa 62:6-7; Mk 7:24-30; Lwk 11:5-10)
18
1 Fú ddiy dzzdjú, Yesu kâ ddì nì lò-ngbòdha tdrà ndèy dzzdjú ì nì rǎ nì kpa dhò: “À kà bíy nì ndrǔ wánì nzǐ Drà ngǎ nzàdha ní, ddu ró ddu ró.”2 Yesu kâ tdrà: “Lò tdèydha-dja tdè ney ddì nì drǒngó ní bba ó, nzǐ ndèy tdè Drà dò njěy nì ndèymí ndèy dêy bíy nì ndrǔ njǎ víní ddiy ní.” 3 Fú drǒngó ní bba ó, ddì nì ɦìytss ní li rò tdè nèy ndèymí kpatss̀ dhì tdè nì. À kâ tdrà à dhò: Á túw mà kàó lò-ónga ma-làyiy nà. 4 Fú lò-tdèydha-dja nyì fú lò-ónga túwdha bíy ní ddu dhò. Fú ddiy dzzdjú, à ddêy ndèy-thíy-ónga nà ǐchú: Kpechú chú, ma njeynì Drà dò nzǐ, bíy nì ndrǔ ddí ma nja nì víní ddiy ní ndèymí ndrǔ ddí ma gbú nì gbúní. 5 Chú, í ɦìytss ní li, cha ndèymí kpatss̀ dhì nì, nì ma nza ddiy mí lò dhò, ma rà àmí lò-ónga tuw, nzánà à déy ma nza wánì ddu ró. 6 Drǒngóli kâ tdrà: “Gǒ rr̀, nzǐ ndèy nì chǒw ní lò tděy nì li tdrà nì lò. 7 Drà dho ná nzǐ ndèy vû nì kpa dhò chǒw ní ddiy bbu, cha ndrǔ nì nzǐ ndèy dè itsś ónga ndèymí kúw-ónga nà wá ro?” 8 Ma nì tdrǎ nyì dhò: “À rà ndrǔ dhò chǒw ní ddiy bbu zěy. Chú, cha Ndrǔ-Ddùw rà shì ro, à rǎ ùwdha chùw dziylíy ó nì?”
Farisayo ní li ndèymí nò-tsò-kpà ɦówdha mí li djú lò-ngbòdha
9 Yesu kâ í lò-ngbòdha tdrà, chǒw ní lò ì nì njěy nì ndrǔ nì úwní ì ùw ì Drà nyú djú nì ndèymí víní ì nì njàddí ndrǔ njǎ nì ndrǔ dhò: 10 “Bbalè rwo nì dêy rǎ lò tèy Drà nà Drà mí dza ò; ddì li tdè Farisayo ní li, njàddí li tdè nò-tsò-kpà ɦówdha mí li. 11 Farisayo ní li dèy ru ní ro, à dêy lò těy Drà nà ndèy-thíy ó ǐchú: ‘Drà dye, manì madha bbu nyi dhò; manì ngǎ, gbè njàddí bíy nì ndrǔ níchú: ndrǔ nì gbu-djá ní mǎ, nzǐ ì nì chǒw nì lò njěy nì ndrǔ ní mǎ, ngǎ ì nì ddǔ ìdhí ków mí bíy nì ndrǔ nà nì ndrǔ mànà; manì madha bbu nyi dhò, manì ngǎ, gbè nò-tsò-kpà ɦówdha mí li níchú mí lò dhò. 12 Ma chey nì nyû-tsò rwo ngà nà yěngà ddì nì kàó, ma ndo nì màtsá ddiy-ónga mà ddìkàddì, ddri nì mí ddì nì là ma bbú nì nyi dhò.’ 13 Chú, nò-tsò-kpà ɦówdha mí li dêy děy ndèy dhò nga gitéy ro; à dêy mbǔ nzǐ ndèy ngbí ndèy-nyú rakpa ò; chú, à dêy ndèy-ngòtsò pbey, yà ndèy nì tdrǎ ǐchú: ‘Drà dye, njey ma-zòw, cherr manì njěy nì li.’ 14 Yesu kâ tdrà: ‘Nò-tsò-kpà ɦówdha mí li tdè Drà mí chǒw ní lò ndèy nì dyǒw nì li ndèy bbâ ndèy ngû ro; chú, ngǎ Farisayo ní li. Ddiydhò, ngbí ní ndèy nì ndèy ngbi nì ŋá li kpe, ka rà thu thúdha ní; chú, thúní ndèy nì ndèy thu nì li, ka rà ngbi ngbídha ní.’”
Yesu nì bû ley dù-dú ní nzòw djò ddiy
(Mat 18:1-4; 19:13-15; Mk 10:13-16)
15 Chú, bíy nì ndrǔ mbà tdè ìdhí dù-dú ní nzòw ddí Yesu dè, ndaní à léy ndèy-thokpa fú nzòw djò. Fú ddiy ì njà ro, Yesu kodjú ì nì rǎ nì kpa dêy fú nzòw mblǒw mblòw ní. 16 Chú, Yesu kâ tdrà nzòw shǐ ndèy kuwtsò chow-chow, yà ndèy nì tdrǎ: “Nyì bba nzòw shǐ ma dè! Nzǐ nyì cho ndrǔ rónga-tsò; ddiydhò, Drà ngá Pey mí nga nì, gbè fú nzòw níchú ì nì nì ndrǔ dhò. 17 Ma nì tdrǎ nyì dhò dìychú: ‘Nzǐ ndèy nì ndèy ngǔ Drà ngá Pey mí nga dhò, gbè ddrǎ ní ngba níchú nì li, kà ndèy tsûw Drà mí pey-mí nga ò ddì ddí kpe nzá.’”
Věy ndèy nì ddiy nà nì li
(Mat 18:1-4; 19:13-30; Mk 10:13-31)
18 Fúnga nà, Yahuddi-ddúw djú drǒngó ní li ddì nì kâ dhiy Yesu-tsò ró: “Lǎní li-gwíydha-dja, tdra, ma kà ná ma njěy ddu, ndaní ma chûw ndruteyró ndèy nì nì djiy?” 19 Chú, Yesu kâ lò ngù à dhò: “Ddudhò nyi ná ma iy lǎní li ní? Ddì li rò lǎní nì ddí nì ngǎ; Ya à tdě nú ngǎ Drà ndèy ddǐ-ddi ní ro.” 20 Nyi tsì yǎdha tsìní: “Nzǐ nyi ddǔ ngǎ ndèy nì nyìmí ków mí li nà; nzǐ nyi hwî bbalè; nzǐ nyi njěy gbu; nzǐ nyi tdrǎ mbwa mí lò rò bíy nì ndrǔ djò; bbú madha djǎnyi mà dho gò yâ-nyi nà.” 21 Chú, à kâ lò ngù: “Ma pbò fú yǎdha-rónga wá màtsá ddrǎ ní nga djúddù.” 22 Chú, fú lò ndèy rr̀ ddiy dzzdjú, Yesu kâ tdrà à ní: “Ddì nì ddiy mà nyi dèddò děy, dzíy nyi nì ndanà nì ddiy-ónga wá, nyi ndǒ fú mb-ho ónga zòw ní ndrǔ dhò; fú nga nà, nyi rà tdè ddiy-kpà na věy rakpa ò. Fú ddiy dzzdjú chú, nyi rǎ ma-kodjú.” 23 Fú lò-kpà à rr̀ ro, zòw kâ à lòw; ddiydhò, à tdè ddiy nà věy. 24 Chú, Yesu njà zòw lòw à ro, Yesu kâ tdrà: “Ddiy nì klǒw drǒ věy ì nì ddiy nà nì ndrǔ dhò ì tsûw Drà mí Pey mí nga ò!” 25 Ddiydhò, ddiy nì ngǎ klǒw ngàmíyà dhò ndèy dǎ sìndánì-nyú òluw; chú, ddiy nì klǒw drǒ věy ì nì ddiy nà nì ndrǔ dhò ì tsûw Drà mí Pey mí nga ò. 26 Yesu dêy tdrǎ nì lò ì dêy rř nì ndrǔ kâ tdrà: “Pádha níchú áyìy dho ná pa ndey?” 27 Chú, Yesu kâ lò ngù: “Nzǐ ndèy nì ka bíy nì ndrǔ dhò nì ddiy, kà kà ní Drà dhò.” 28 Fúnga nà, Petro kâ tdrà: “Rr nji, nja mà bbà màdhí ddiy, ndaní mà rǎ nyi kodjú.” 29 Chú, Yesu kâ tdrà ndrǔ dhò: “Ma nì tdrǎ nyì dhò kpǔkpǔ, ddiy nì dìychú ní lò: ‘Ya ddì li bbǎ nděyngá dza mà, ǐngí nděyngá ɦìytss mà, ǐngí ndèymí cha ì ùw Yesu nì kpa mà, ǐngí ndèymí gôw mí ndrǔ mà, ǐngí nděyngá nzòw mànà; Drà mí Pey mí nga mí lò dhò ro, 30 ndeyli rà věy ní ddiy chùw nzǐ í ddu nà, ndèymí děy ndèy rà shì luwtéy nì dziylíy djú, ndruteyró nga mí djiy ddí chùw nzǐ.’”
Gbow ngà nà mí ní, Yesu nì dhìní ndèy rà dhì ndèymí djiy ní ndèy rà ngu ddiy-ɦéy tdrǎ ddiy
(Mat 20:17-19; Mk 10:32-34; Lwk 9:22)
31 Fúnga nà, Yesu kâ ndèy kodjú ì nì rǎ nì ddri ndèy djú rwo nà nì kpa iy ndèy kuwtsò ro, à kâ tdrà kpa dhò: “Nyì rr̀, mànì rǎ Yerusalemu mí drǒngó ní bba ò; fulè chú, Ndrǔ-Ddùw djò Drà ró dho nà ndèy nì lò těy ndrǔ dhò děy ndèy rà shì nì lò-djò nì kpa ndîy nì lò rà ndèy njèy wá. 32 Ddiydhò, ndrǔ rà à thotèy bbu Yunani-ddúw thokpa ò; ndrǔ rà à njà víní mǎ, ndrǔ rà à dhùw dhùwní mǎ, ndrǔ rà sa mà hwi à nyú ò mǎ, 33 ndrǔ rà à dhèy shí nà, ndrǔ rà à hwì hwìní. Ddu gbow nì djú, à rà ngu djiy ní.” 34 Chú, Yesu kodjú ì nì rǎ nì kpa-djùkpa fú lò lòw tdè nzá; ǒmá ka dêy tdrǎ nì lò rù tdè ndèy rùní kpa ró, kpa tsì tdè nzá ya ddu djú Yesu tdè lò těy ddiy.
Yesu pâ nzǐ ndèy-nyú nì nga njǎ nì li ddiy
(Mat 20:29-34; Mk 10:46-52)
35 Chú, chow-chow Yesu shì tdè Yeriko mí drǒngó ní bba ó ro, ddì li cha nzǐ ndèy-nyú nì nga njǎ nì dêy děy tuw gitéy ro, à dêy nga ko bíy nì ndrǔ-tsò ró. 36 Chú, bíy ì tdè nì bbalè-kpà dêy shǐ ddiy à rr̀ ro, à kâ dhiy ya ddu tdè ndey ddiy. 37 Ndrǔ kâ tdrà à dhò: “Ddiy nì Nazareti ó nì li, Yesu nì dǎ ddiy.” 38 Fúnga nà, à kâ ndèy-ónga jòw: “Yesu, Dawuddi-ddùw, njey ma-zòw!” 39 Njitsś ò djú ddù ì dêy rǎ nì ndrǔ dêy à mblǒw mblòwdha ní, ndaní ì gǔ à-tsò gùdha ní. Chú, à gò dêy swa rí drǒ: “Dawuddi-ddùw, njey mà zòw!” 40 Chú, Yesu kâ dèy ro, à kâ jà ka shǐ à nà ndèy dè, chow-chow à shì ro, Yesu dhîy à-tsò ró: 41 “Nyi jì ná ma njěy ddu nyi dhò?” À kâ lò ngù: “Drǒngóli, léy ma njǎ nga ddíyàchú.” 42 Yesu kâ tdrà à dhò: “Nja nga; nyìmí ùwdha pâ nyi ŋà.” 43 Fúnga nà, ndùw, à kâ nga njà ddíyàchú ro, à kâ rà Yesu kodjú, yà ndèy nì madha bbu Drà dhò. Fú lò ndrǔ-tsi wá kâ njà ro, ndrǔ kâ madha bbu Drà dhò.