Yesu chô ndèy kodjú ì nì rǎ ní 12 nà nì kpa ddiy
(Mat 10:5-15; Mk 6:7-13)
9
1 Yesu njûw tdè ndèy kodjú ì nì rǎ nì ddri ndèy djú rwo nà nì kpa-tsò ro, à kâ dàyìmónì-kpà dìydha mí kpá-kpánga ndèymí dhi-kpà pádha mí drǒngó ní nga bbu kpa dhò. 2 Fú ddiy dzzdjú, à kâ kpa cho, ndaní kpa rǎ Drà ngá Pey mí nga mí lò-ɦéy tdrà, kpa pá dhi nà nì ndrǔ màddí. 3 Fúnga nà, Yesu kâ tdrà ndrǔ dhò: “Nzǐ nyì ddúw ddì nì ddiy rò nyì-thokpa ó, bbiydha dhò: Lotèy ddi nzǐ, kpǔ ddí nzǐ, mùkátì ddí nzǐ, mb-ho màddí nzǐ; nzǐ nyì déy rù djú rù nà rwo. 4 Ya nyì tsùw ddì nì dza ò ro, nyì déy fúlè dzá, pbǔw nyì rà ràmí nga djò. 5 Ya ndrǔ gù nyì kódha wánì nga òluw gùní ro, nyì nì rǎ fú bba óddù ro, nyì chǒ nyì koko ró hôw fú drǒngó ní bba ò; fú ddiy rà tdè, gbè cha lò-ɦéy tdràdha níchú nyì ì gù nì ndrǔ dhò.” 6 Chú, Yesu kodjú ì nì rǎ nì kpa kâ rà ro, kpa dêy dǎ, í bba óddù chá bba ò, hwî mí lò-ɦéy ì nì kǒw tdrǎ ro, yà ì nì kǒw dhi nà nì ndrǔ pa wánì nga òluw.Herodde-ónga nì tdǒ ddiy
(Mat 14:1-12; Mk 6:14-29)
7 Galilaya mí dziylíy ó ndèy dêy Pey nyǔ nì li, Heroddea, kâ ndèy nì danì wánì lò rr̀ ro, àmí tdeydha-ónga kâ ndèy sà; ddiydhò, njàddí ndrǔ rò dêy tdrǎ: “À nì bàtízò ndèy dêy bbu nì Yohana chú ngû djiy ní ddiy.” 8 Njàddí ndrǔ dêy tdrǎ: “À nì Eliya dhò ndèy ddiy.” Fúnga nà, njàddí ndrǔ dêy tdrǎ: “À nì màdhí bbúwní-chò ó, Drà ró dho nà ì nì lò těy ndrǔ dhò děy ndèy rà shì nì lò-djò ní kpa, mí ddì li ngû djiy ní ddiy.” 9 Chú, Herodde dêy tdrǎ: “Ma lêy tdè ka tdèy tdè Yohana djùkpa ŋà, fu ndèy djú ndrǔ nì lò-kpà těy manì rř nì li ná áyìy?” Fúnga nà, Herodde dêy měy ndèy njǎ Yesu.
Yesu bbû nyû pèy-péy nga mb nì bíy nì ndrǔ dhò ddiy
(Mat 14:13-21; Mk 6:30-44; Yoh 6:1-14)
10 Dyòw-djá ngû tdè ro, kpa kâ ì njèy tdè nì lò-tey klo wá Yesu dhò. Fúnga nà, à zìy kpa ro, à kâ rà kpa nà, Betesayidda ní ka nì iy nì drǒngó ní bba ò. 11 Chú, bíy nì ndrǔ-kpà kâ fú ddiy tsì ro, kpa kâ rà à kodjú. Yesu kâ ndrǔ ko ro, à kâ dey lò těy ndrǔ dhò Drà mí Pey mí nga djò; à pâ tdè ì ró dhi nà nì ndrǔ ddí. 12 Chú, nga lòw dey tey ro, ddri ndèy djú rwo nà nì kpa kâ ì ndrr à dè ro, kpa kâ tdrà à dhò: “Léy í bíy nì ndrǔ wá ngú; ndrǔ rǎ bba-kpà ndèymí tsó òluw nì bba-kpà mà òluw, ndaní ndrǔ měy ddu mí nga ndèymí nyû nà. Ddiydhò, mànì ɦiynínga ní nga ó.” 13 Yesu kâ tdrà kpa dhò: “Nyì bbú nyû fú bíy nì ndrǔ dhò nú nyì.” Chú, fúkpa kâ lò ngù: “Mà nì mùkátì nà nú mb ndèymí bbì nà rwo, ya à tdě ngǎ mà rà ndey nyû dzìy màníddù í ndrǔ-kpà wánì dhò ro.” 14 Ddiydhò, fungá kpa tdè chow-chow pèy-péy nga mb. Fúnga nà, Yesu kâ tdrà ndèy kodjú kpa dhò: “Nyì léy ndrǔ dǒw dziylíy djòluw drì-drí nga mb ì njûw ì-tsò ddiy nà.” 15 Yesu dzzdjú ì nì rǎ nì kpa kâ njèy nú fǔchú, kpa kâ ley wánì ndrǔ dǒw dziylíy djòluw. 16 Fúnga nà, Yesu kâ fú mb nì mùkátì ndèymí bbì rwo nà nì zìy ro, à kâ ndèy-nyú ngbi ru rakpa ò, à kâ bû nzz̀ fú nyû-kpà djò. Fú ddiy dzzdjú, à kâ ǒnga-kpà pbrù ro, à kâ ddiy-kpà bbu ndèy kodjú ì nì rǎ nì kpa-thokpa òluw, ndaní kpa ndǒ bíy nì ndrǔ dhò. 17 Ndrǔ wá nyù nga ro, ndrǔ ónga kâ kì. Fúnga nà, ndrǔ kâ nyû-gògò ndèy mà tdè nì tsò njuw, tdyǔ ddri ndèy djú rwo nà nì òluw věy věy.
Petro tdrà Yesu nì Masiya ddiy
(Mat 16:13-19; Mk 8:27-29)
18 Ddì ní, Yesu dêy Drà nzǐ ro, à kâ ndèy-rónga li ddǐ-ddi ní, nga gitò. À kodjú ì nì rǎ nì kpa tdè à nà ddìnga ó. Fúnga nà, Yesu kâ dhiy kpa-tsò ró: “Bíy nì ndrǔ tdra ní manì áyìy?” 19 Chú, kpa kâ lò ngù: “Njàddí ndrǔ tdra nì; Nyi nì Yohana Batista; njàddí ndrǔ, nyi nì Eliya; njàddí ndrǔ, nyi nì Drà ró dho nà ndèy nì lò těy ndrǔ dhò děy ndèy rà shì nì lò-djò ní kpa, ndruní kpa kàó ndèy tdè nì ddì li ngû djiy ní ddiy.” 20 Fúnga nà, Yesu kâ dhiy kpa-tsò ró: “Nyì kě, nyì ná tdrǎ manì áyìy?” Fúnga nà, Petro kâ lò ngù: “Nyi nì Kristo, Drà ngá li ní nú, ka vìy chì nà nì li.”
Yesu nì dhìní ndèy rà dhì, ndèymí djiy ní ndèy rà ngu ddiy-ɦéy tdrǎ ddiy
(Mat 16:20-28; Mk 8:9-30)
21 Yesu kâ kpa mblòw tsátsá ní ndèy chuw nà, nzǐ nyì tdrǎ fú lò rò áyìy dhò mǎ kpe. 22 Fú ddiy dzzdjú, Yesu kâ lò kíyddà ndrr: “À kâ tdè Ndrǔ-Ddùw nzá ndèy drǒ, Yahuddi-ddúw dhí ddǐnì mí drò-dró ní kpa mà, ndrǔ ró dho nà ì nì shǐ Drà njìò nì kpa ndèymí yǎdha ì nì ndíy nì kpa mànà, rà Yesu gù gùní. Ndrǔ rà à hwì ro, ddu gbow nì djú, à rà ngu djiy ní.”
23 Fú ddiy dzzdjú, Yesu kâ tdrà wánì ndrǔ dhò: “Ya, ddì li ŋá nì mà jǐ ndèy rǎ ma kodjú ro, ndeyli bbǎ ndèy ndèyníddò djò ndèy nì nga ddey ddiy-tsò; ndeyli tdúw ndèymí tàdha ní tsúw b wánì ddu ró, ndèy rǎ ndanà ma kodjú. 24 Ddiydhò, ya ndeyli jì ndèy pá ndèymí djiy ro, fú li rà ndèymí djiy viy víyní; chú, cha ndèy rà ndèymí djiy viy màtsá lò-djò nì li, ndeyli rà ndèymí djiy pa pádha ní. 25 Ddiydhò, í dziylíy kâ ndèy dhò wánì li, ndeyli dho ná ddu chùw ǒmáddù, ya ddiy nì ngǎ ndeyli víy víyní ndèy ndèyníddò ro, ǐngí fú li nì rǎ sàní ndèy rà ndèy sàmí nga ò ro? 26 Ddiydhò, ya ddì li ŋá nì mà tdě do nà, màtsá lò mà kpà djò ro, Ndrǔ-Ddùw rà tdè do nà ndeyli djò, ya à shǐ ndèymí, djǎnì mí madha, ndèymí ngǎ ì ó cherr rò nà malayika dhí madha mànà ò ro. 27 Chú, manì tdrǎ nyì dhò dìychú ní lò nà, ingá ì nì nì njàddí ndrǔ rò rà dhì nzǐ, děy nzá ì vè Drà mí Pey mí nga njàní.”
Yesu ró ji lî ndèy ddiy
(Mat 17:1-8; Mk 9:2-8)
28 Chowchow ddu rù, Yesu tdrà tdè fú lò ddiy dzzdjú, Yesu kâ Petro, Yohana ndèymí Yakobbo mànà zìy ndèy nà ro, à mà kâ dji ngòw djò, ndaní ndèy nzǐ Drà. 29 À tdè Drà nzǐ ro, à nyú-djúnga jì lî tdè ndèy ngéy, à ró rù-kpà ngû tdè sárŕ tǐ, yà ndèy nì nga tda làlà níchú. 30 Yesu mà tdè lò těy ì kàó ro, rwo nì kpa kâ ì nyà chǔ fú nga ò, à tdè Musa ndèymí Eliyac nà, 31 rakpa ó drǒngó ní kadha kàó ì nì ì dhǒ ddiy nà. Kpa dêy lò těy Yesu nà, à rà ndèymí njí-tsò tdya, Yerusalemu mí drǒngó ní bba ò, ndèy nì rǎ dhì ddiy nà ddiy djò. 32 Petro mà ndèy-làyiy ní kpa mànà kâ ddù ngbíyrŕ; chú, kpa chì ro, kpa kâ Yesu mí madha njà, ddìnga ó ì dèy tdè à nà nì, rwo nì kpa nà. 33 Fúkpa dêy rǎ Yesu kuwtsóddù ro, Petro kâ tdrà Yesu dhò: “Li gwíydha-dja, ddiy nì lǎní drǒ mà déy ingá. Mà sš gú-dzà gbow, nyi dhò ddì, Musa dhò ddì, Eliya dhò ddí ddì.” Chú, Petro dêy, ndèy nì tdrǎ nì lò tsǐ nzǐ. 34 Petro dêy lò těy fǔchú ro, nduw-nduw kâ shì, kpa-rónga-tsò tsìy. Yesu kodjú ì nì rǎ nì kpa njà fú ddiy ro, do kâ kpa lòw. 35 Fúnga nà, nduw-nduw óddù li-chuw kâ ndèy rr̀: “Ínì ma-ddùw, víní ma vû nì. Nyì rr̀ fú li!” 36 Li-chuw rr̀ ndèy ddiy dzzdjú, Yesu kâ mà ddǐ-ddi ní. Yesu kodjú ì nì rǎ nì kpa-djúnga kâ ddà ɦiy. Fú ddu-kpà ó, kpa kâ fu ì njànì lò-tey klo áyìy dhò mǎ ddí nzá.
Yesu pâ che thíy nì nza nì ngba ddiy
(Mat 17:14-18; Mk 9:14-27)
37 Něyngá bbǔtss̀ s̀djú, kpa thû tdè ngòw djúddù ro, bíy nì ndrǔ-kpà kâ ì njuw Yesu nà. 38 Fú bíy nì ndrǔ-kpà kà-óddù, ddì li kâ ndèy-ónga jòw: “Li gwíydha-dja, manì ko nyi-tsò ro, nja ma-ddùw, à nì ddì kpala nú nì kpatss̀ ní ngba! 39 Che thíy low nì à ro, fú nga nà ndùw à jow nì nga, che thíy ja nì à ónga klôw nà ro, pbiysá ddí liy nì à kuw ò; che thíy nì à nza ro, ddiy ddá nì ndèy à óddù klôw nà. 40 Ma kô tdè nyi kodjú ì nì rǎ nì kpa-tsò ro, kpa dhò fú che thíy dìydha kâ tdè nzá.” 41 Fú ddiy dzzdjú, Yesu kâ lò ngù: “Ngǎ ì dhí ùwdha nà nì ndrǔ, jìní ì jì ì njěy cherr nì ndrǔ ó í ddèy! Nyì nà à kâ ná mà déy ddu thi nì dhò? Nyì-tsò ddiy kâ ná ma vǐy ddu thi nì dhò? Mba ddùw-nyi ingá” 42 Cha à tdè shǐ Yesu dè chow-chow ro, dàyìmónì kâ ngba ngbò dziylíy djò ro, ddiy kâ ngba ónga jà kpá-kpánga nà. Chú, fú nga nà, Yesu kâ che thíy mblòw ro, à kâ ngba pa, à ngù ngba djǎnì dè. 43 Bbalè-ónga ꞌwìy wá, Drà mí drǒngó ní nga dhò.
Yesu nì ndèymí dhi-ɦéy kíyddà tdrǎ ddiy
(Mat 17:22-23; Mk 9:30-32)
Děy wánì ndrǔ ónga dêy ꞌwǐy Yesu dêy njěy nì wánì lò dhò ro, Yesu kâ tdrà ndèy kodjú ì nì rǎ nì kpa dhò: 44 “Nyì rr̀, nja-nja manì tdrǎ nyì dhò nì í lò: ‘Ndrǔ-Ddùw ka rà bbu bíy nì ndrǔ-kpà thokpa ò.’” 45 Chú, fú lò dêy Yesu kodjú ì nì rǎ nì kpa-djùkpa lǒw nzǐ; ddiydhò, fú lò rù tdè ndèy kpà ró rùní; nzánà à lǒw kpa-djùkpa; fú lò-djò ìdhíy nga Yesu-tsò ró ddiy-dò dêy kpa njěy njèy ní.
Drǒngó tǐ ndèy nì nì li
(Mat 18:1-5; Mk 9:33-37)
46 Yesu kodjú ì nì rǎ nì kpa dêy ì ddǎ ì kàòluw, ndaní ì tsǐ ya áyìy nì ndey ì kàó drǒngó tǐ ddiy. 47 Yesu tdêy tdè fúkpa dêy ddey ì-thíy ó nì lò-djòtey ro, fú nga nà, à kâ ddì nì ddrǎ ní ngba-tá zìy, à kâ ley ndèy kuwtsó ro, 48 à kâ tdrà kpa dhò: “Ya ddì nì ŋá li mà kó í ngba-tá ma ró dho nà ro, ndeyli kô ma-ngàngà. Ya ddì nì ŋá li mà kó ma ro, ndeyli kô chóní ndèy chô manì li. Chú, nyì wánì kàó, ddrǎ tǐ ndèy nì nì li, nì drǒngó ní li.”
Ngǎ ndèy nì nyi-tsò ró nì li, fú li nì nyi dhò
(Mk 9:38-40)
49 Fúnga nà, Yohana kâ tdrà: “Li gwíydha-dja, mà njà tdè, nyi ró dho nà, ddì nì li nì dàyìmónì mí che thíy-kpà dǐy ro, mà gù fú ddiy à dhò; ddiydhò, fú li nì ngǎ mà kàó li.” 50 Chú, Yesu kâ lò ngù, à kâ tdrà: “Nzǐ nyì gu fú ddiy fú li dhò. Ddiydhò, ngǎ ndèy nì nyi-tsò ro nì li, à nì nyi làyiy.”
Samariya mí dziylíy ó ddì nì bba ó ndrǔ gù Yesu ddiy
51 Yesu dhò, ràdha rakpa ò mí ddu shi tdè chow-chow ro, Yesu kâ lò tdèy ndèy-thíy ó, kpá-kpá ní nga nà, ndèy rǎ Yerusalemu mí drǒngó ní bba ò. 52 Fúnga nà, Yesu kâ ndèymí lò-ɦéy ì nì mbǎ nì ndrǔ rò cho ndèy njìó. Fúkpa rà ro, kpa kâ tsùw Samariya mí dziylíy ó ddì nì bba ò, ndaní ì thǐ à dhò kà ní ndèy kà nì wánì lò. 53 Fú bba ó ndrǔ kâ Yesu ko nzá; ddiydhò, à dêy rǎ Yerusalemu mí drǒngó ní bba ò. 54 Chú, Yesu kodjú ì nì rǎ nì kpa, Yakobbo ndèymí Yohana nà kâ fú lò njà ro, kpa kâ tdrà: “Drǒngóli, nyi jì ná ŋà mà íy kàss à thú rakpa óddù, ndaní fú kàss kǒ í bíy nì ndrǔ tey?”
Yesu kodjú ì jì ì rǎ nì ndrǔ
(Mat 8:19-22)
57 Tuw òluw kpa dêy rǎ ro, ddì li kâ tdrà Yesu dhò: “Ma rà rà nyi kodjú, nyi rà rà ò mànì wánì nga òluw.” 58 Fúnga nà, Yesu kâ tdrà à dhò: “Gbè, ꞌwǎ níchú ì dêy nì zǎ-tá-kpa nì ìdhí loko-kpà nà, rakpa ró rì-kpà nì ì-dzàkí-kpà nà; chú, Ndrǔ-Ddùw nì ndèy djùkpa ndèy la ò mànì nga mà, ndèy-rónga ndèy shu ǒmá nì nga rò nà ddí ngǎ.”
59 Chú, Yesu kâ tdrà njàddí li dhò: “Ra ma-kodjú.” Fúli kâ lò ngù: “Drǒngóli, úw ma dhò, ma rǎ màtsá djǎnì tdòw dji.” 60 Chú, fú nga nà, Yesu kâ tdrà fú li dhò: “Bba bu tdǒw ìdhí bu-kpà; nyi, ra Drà ngá Pey mí nga mí lò-ɦéy tdrà.”