Yesu chô ndèy kodjú ì nì rǎ nì 72 nà nì kpa ddiy
10
1 Fú ddiy dzzdjú, bba-dja Yesu vû tdè njàddí bíy nì ndrǔ drì-drí nga zarr̀gbòw ndèy djú rwo nà ro, à chô tdè ndrǔ rwo rwo ndèy njìó, wánì drò-dró ní bba-kpà ndèymí, cha ndèy kà tdè ndèy rǎ ndèy ndèyníddò nì nga-kpà òluw. 2 À kâ tdrà kpa dhò: “Nyû-tsò njúwdha nì drǒ; chú, dhǐy mí ndrǔ nì ngǎ bíy. Fú lò dhò, nyì nziy nyù-tsò njúwdha mí bba-dja-tsò ró, à chó njàddí dhǐy mí bíy nì ndrǔ kíyddà nyû-tsò njúwdha dhò. 3 Nyì ra! Ma nì nyì cho gbè sìrì ní towmbù-kpá níchú gú ó tsǐ-kpá kàòluw. 4 Nzǐ nyì tdúw mb-ho rò, ǐngí kpǔ rò, ǐngí nyi koko ró shí màddí. Nzǐ nyì děy tuw-tsò ó, li-rónga dhíydha dhò. 5 Ddì nì dza ò nyì rà dey tsûw ro, nyì tdrǎ nji: ‘Li-thíy-tsò djówdha déy í dza djú!’ 6 Ya li-thíy-tsò djówdha mí li nì ney fungá ro, nyìdhí li-thíy-tsò djówdha rà dey fú li djú, ya ngǎ fǔchú ro, nyì ddá nyìdhí li-thíy-tsò djówdha ngú nyì dè. 7 Chú, nyì déy fú dza ó, nyì nyǔ nga, nyì mbǔ nyì dhò ka rà bbu fulè dzá nì ddiy. Ddiydhò, ddiy kâ dhǐy mí li chûw ndèy-kobì. Nzǐ nyì da yò dzá ddù chalè dzá. 8 Ddì nì ŋá drǒngó ní bba ò, nyì rà tsùw ro, ya ka rà nyì ko ro, nyì nyǔ nyì dhò ka rà bbu nì ddiy, 9 nyì pá fú drǒngó ní bba ó dhi nà nì ndrǔ; fú ddiy dzzdjú, nyì tdrǎ fú ndrǔ dhò: ‘Drà mí Pey mí nga shì chow-chow nyì kuwtsó.’ 10 Chú, ddì nì drǒngó ní bba ò nyì nì tsûw ro, ya ndrǔ rà nyì ko nzǐ ro, nyì rǎ tuw-tsò-rá ò, nyì tdrǎ ndrǔ dhò: 11 ‘Nyìdhí drǒngó ní bba ó hòw, cha mà-koko ròluw ndèy pbà tdè nì mànì chǒ nyì djò. Chú, nyì njǎ: Drà mí Pey mí nga shì chow-chow.’ 12 Ma nì tdrǎ nyì dhò kpǔkpǔ: ‘Lò tdèydha-dyì ó, fú bba ó ndrǔ rà chùw nì lò-tdèydha rà dà, Sodomua mí drǒngó ní bba ó ì tdè dey nì ndrǔdhí lò-tdèydha djòluw.’”Gùní ndrǔ nì Yesu gǔ ì úw òmàluw nì drò-dró ní bba-kpà
(Mat 11:20-24)
13 “Zòw nyi dhò, Korazini; zòw nyi dhò, Betesayidda! Nyì òluw ka njèy nì ddùw-kpà, ka njěy tdè Turo mà, Sidonib mà òluw ro, ínì tdè kì fú drò-dró ní bba òluw ì nì dey nì ndrǔ lî ì-dhà-rónga ndruní, ndrǔ kà tdè ì thó ì ró gùníyà-kpà, ì dǒw huwru òluw. 14 À nì fú lò dhò chú, lò-tdèydha mí ddu ó, Turo mà Sidoni nà dhí lò-tdèydha rà tdè ddrǎ nyìdhí lò-tdèydha róddù. 15 Nyi kě, Kapernawumu, nyi ná nzǐ nyi rà nyi ngbi pbǔw rakpa rò ddiy ní? Nyi ka rà thu, dhìní ì dhì nì ndrǔ déy nì mí nga ò!”
16 Fúnga nà, Yesu kâ tdrà ddíyàchú ndèy kodjú ì nì rǎ nì kpa dhò: “Nyì nì tdrǎ nì lò ndèy nì rř nì li, ndeyli nì manì tdrǎ nì lò ddí rř; gùní ndèy nì nyì gǔ nì li, ndeyli nì ma gǔ; gùní ndèy nì ma gǔ nì li, ndeylì nì ma ndèy chô nì li gǔ.”
Drì-drí nga zargbò ndèy djú rwo nà nì kpa ngû ddiy
17 Chóní Yesu chô tdè nì drì-drí nga zarr̀gbòw ndèy djú-rwo nà nì kpa ngû tdè drǒngó ní hwî nà ro, kpa kâ tdrà: “Drǒngóli, dàyìmónì mà kpà ddí rr̀ nga mà dhò, mànì lò-kpà tdrǎ nyi ró dho nà ro!”
18 Chú, Yesu kâ lò ngù kpa dhò: “Ma dêy setani njǎ, rakpa óddù ndèy nì chěy, gbè làlà nì nga tdá ddiy níchú. 19 À tdrà: ‘Nyì nja, ma bbû ngìydhá mà kpà, tsš mà kpà nà nyì bbiy djòmàluw mí kpá-kpánga nyì dhò ro, nyì chíy mbǔ-dja mí kpá-kpánga, ngǎjìní ndèy njèy nyì nì ddiy rò tdè ngǎ. 20 Nzǐ nyi njey hwî, che thíy-kpà nì nga rř nyì dhò mí lò dhò; chú, nyì njey hwî nyì ró dho ka ndîy rakpa ò mí lò dhò.’”
Yesu nì hwî njěy ddiy
(Mat 11:25-27; 13:16-17)
21 Fúnga nà, chú déy, Drà mí Bblǒ Thíyc lêy Yesu-ónga kì hwî nà ro, à kâ swa: “Bàbá, rakpa mà dziylíy nà nì mí bba-dja dye! Manì nyi ma; ddiydhò, nyi rù í lò-kpà, lò-ónga ndòdha mí nyǔꞌwiy mí bíy nì ndrǔ mà ndèymí nyǔꞌwiy-djá mànà róddù; chú, nyi dhò fú lò dù-dú ní nzòw dhò. Òní, Bàbá, nyi jì nì ddiy chú nì fu.”
22 “Màtsá djǎnì ngù wánì ddiy-kpà ma-thokpa ò. Ddì li, ŋá nì ddí nzá, à tsì Ndrǔ-Ddùw nì áyìy ddiy, ya ngǎ à tdě Bàbá ro. Ddì nì áyìy ddí nzá tsì Bàbá nì ya áyìy ddiy, ya à tdě ngǎ Ddùw nì ddǐ-ddi ní ro ndèymí Ddùw nì jì ndèy dhǒ fú ddiy ì dhò nì ndrǔ mà ro.”
23 Fú ddiy dzzdjú, Yesu lî ndèy-rónga ndèy kodjú ì nì rǎ nì kpa dè ro, à kâ tdrà kpa dhò chúddì: “Hwî nà ì nì nì ndrǔ nì, nyì nì njǎ nì ddiy, ì njànì ndrǔ! 24 Ddiydhò, manì tdrǎ nyì dhò kpǔkpǔ, Drà ró dho nà ì nì lò těy ndrǔ dhò děy ndèy rà shì nì lò-djò nì bíy nì kpa, Pey ní kpa mànà, cha ì jì tdè ì njǎ nyì njà nì lò; chú, ndrǔ njà tdè nzá; ì rř nyì nì rř nì ddiy; chú, kpa rr̀ tdè nzá.”
Samariya mí ngòw ó, lǎní li djú lò-ngbòdha
25 Fúnga nà, yǎdha-ónga túwdha-djá kàó ddì li ngbî tdè ndèy, ndaní ndèy kí Yesu ro, à kâ dhiy à-tsò ró: “Li gwíydha-dja, ddiy kà ná ma njěy ddu, ndaní ma chûw ndruteyró ndèy nì dey nì djiy?” 26 Yesu kâ dhiy à-tsò ró: “Musǎ ngá yǎdha mí bǔkù ó ka ndîy ná ŋǎchú? Ǒmá nyi zòw ná ddu?” 27 Chú, fú li kâ lò ngù: “Ka ndîy ǐchú: ‘Ddiy kà nyi jǐ Drǒngóli nyìmí Drà nyi thíy óddù wá, nyimí djiy nà wá, nyimí kpá-kpánga nà wá, nyimí lò-tsìdha mí nyǔꞌwiy mànà ddí wá.’ Fú ddiy dzzdjú: ‘Ddiy kà nyi jǐ nyi làyiy ní li, gbè nyi níchú.’” 28 Chú, Yesu kâ tdrà à dhò: “Nyi ngù lò lǎní. Njey fú ddiy, nyi rà dey djiy ní.”
29 Chú, Musǎ ngá yǎdha-ónga túwdha mí li jì tdè ndèy njǎ ndèy chǒw ní lò ndèy nì njěy nì li nì ro, à kâ dhiy Yesu tsò ró: “Ma-làyiy ní li ná áyìy?” 30 Fúnga nà, Yesu kâ lò ngù: “Ddì li dêy thu Yerusalemu mí drǒngó ní bba óddù Yeriko mí drǒngó ní bba ò. Kpákpá ní nga nà ì nì gbu njěy nì kpa lòw tdè fú li ro, kpa sôw à tdè ndanà nì ddiy wá ro, kpa kâ à dhèy, à bbà chow-chow dhìdha ò. 31 Fúnga nà, ddì nì Drà ngá dyǎ-djad tdè thu bbi fú ddì nì tuw òluw, à njà ndèy-rónga nyû nì li ro, à kâ dà nga gitèy òluw. 32 Chú, Lawi ní li ddí kâ shì fungá ro, à njà ndèy-rónga nyû nì li ro, à ddí kâ dà nga gitèy òluw. 33 Chú, Samariyae mí drǒngó ní bba ó ddì li, cha ndèy tdè ndèymí bbiydha ó nì, à shì fungá ro, à njà fú li ro, à njèy fú li zòw. 34 Fúnga nà, à ndrîy ndèy à dè ro, à ddù chì ndèymí dìyváyìy-ngìy-tsi wà mí à ró chúwkpà djòluw ro, à kâ djǒnga chèy. Fú ddiy dzzdjú, à tdûw fú li nděyngá kànà djò, à kâ fú li mbà lu-dzà ò. À njèy fú li dhò wá kâ nì lò. 35 Něyngá bbǔ, à ddâ mb-ho rwo fú li-rónga pbòdha mî, à bbû lu-dzà-rónga pbòdha-dja dè ro, à kâ tdrà fú li dhò: ‘Pbo í li-rónga. Ddiy wánì cha nyi rà sà tǐ fu ma bbû nì djòluw, fú li-rónga pbòdha dhò nì, ma rà ngù nyi dhò ya ma ngû ro.’”
36 Fúnga nà, Yesu dhîy: “Fú bbalè gbow nì kà-óddù, áyìy ní ndey fu ndèy-rónga ka nyû nì li-làyiy?” 37 Chú, yǎdha-ónga túwdha-dja kâ lò ngù, à kâ tdrà: “À nì cha ndèy njèy fú li zòw nì li.” Fúnga nà, Yesu kâ lò ngù à dhò: “Ra, nyi njěy ddí fǔchú.”
Yesu nì Marta mà Mariya nà dhí bba ó ddiy
38 Yesu mà, ndèy kodjú ì nì rǎ nì kpa mànà tdè tuw ó ro, à kâ tsùw ddì nì bba ò. Fú bba ó, Marta ní ka dêy ndèy ró dho iy nì ɦìytss ní li kô tdè à nděyngà dzá. 39 Marta mí vînì, Mariya, dêy dǒw bba-dja Yesu kotéy, à dêy Yesu mí lò rř. 40 Chú, Marta tdè kprìy dzá nì dhǐy-kpà ró, à kâ rà Yesu dè ro, à kâ tdrà: “Drǒngóli, màtsá vînì bbà ma dhǐy-tsò ró ddiy ná nyi ónga tdǒ nzǐ?” Tdra à dhò ndey nì, à kó ma tso-tso.