Cherr ndèymí cherr sàdha nà
(Mat 8:6-9; 21–22; Mk 9:22-28)
17
1 Chú, Yesu kâ tdrà ndèy kodjú ì nì rǎ nì kpa dhò: “Cherr njèydha dhò ndèy nì ndrǔ ndrř nì lò rò kà ndèy tdě ney. Chú, nzadha nì ney, cha ndèy lêy fú ddiy njěy ndèy nì li dhò. 2 Ddiy kà ndèy tdě lǎní drǒ ka chěy drǒngó ní djuw fú li-chuwtèy ró, ka ngbǒ à drǒngó ní ju-ddà ò, nzánà í dù-dú ní nzòw kàó ddì nì ngba kpe à ká ley à chěy cherr ò ddiy djòluw.” 3 Nyì ru nyì ró nyìníddù!“Ya djû-nyi njèy cherr ro, mblow à, gu fú lò à dhò rí ní nyi chuw nà. Ya kě, à njèy nì lò tdǒ à ónga ro, sa à dhò à njèy nì fú lò. 4 Ya kě, à njèy cherr nyi là djò zarr̀gbòw ngà nà ddì nì ddu dhò ro, ya à ngú ndèy li nyi dè zarr̀gbòw ngà nà chúddí, yà ndèy nì tdrǎ ǐchú: ‘Ma-ónga ddiy nì tdǒ dìychú.’ Nyi ká fú ddiy sà à dhò.”
Ùwdha
5 Dyòw-djá kâ tdrà Drǒngóli dhò: “Ndríy màdhí ùwdha kíyddà.” 6 Chú, Yesu kâ lò ngù: “Ya nyìdhí ùwdha tdě drǒngó, gbè mùtárdì mí tsúw-tsi níchú ro, nyì kà tdè nyì tdrǎ í tsúw dhò: ‘Drr̀ nyi dhey dziylíy óddù, nyi rǎ nyi tdòw drǒngó ní ju-ddà ò.’ Fú tsúw kà tdè ndèy rř nyì chuw ŋà.”
Ŋà ndèy kâ njí mí li dhò nì ddiy
7 “Chú, mà ddéy gò í lò ddey nji: Nyì kàó ddì li tdě nděyngá nza bbìdha mí dhǐy mí li, ǐngí nděyngá měyá mí hó-rónga ndèy nì pbǒ nì li nà. Ya nza óddù fú li nì ngu ro, ndèy nì à njǎ nì li kà ná ndèy tdrǎ à dhò: ‘Á ra zěy nyi dǒw mêzà tsò rò?’ 8 Chú, nzǐ. À kà ndèy tdrǎ à ní: ‘Thi nyû ma nyǔ; fú ddiy dzzdjú, ɦów nyi ró rù-rónga-kpà, ndaní nyi kó ma tso-tso nga manì nyǔ ro, mbùdha ní ddiy mà, manì mbǔ ro. Fú ddiy dzzdjú chú, nyi kà nyi ká ngu nga nyù, mbùdha ní ddiy mà mbù!’ 9 À kà ná ndèy bbú madha nděyngá dhǐy mí li dhò, ndèy tdrà à njěy nì ddiy, à njèy ddiy mí lò dhò nzá? 10 Nyì dhò ddí, à nì fǔchú. Nyì dhò ka jà nì lò wá nyì njèy ro, nyì rà tdrà: ‘Mà nì ngǎ bíy nì ndrǔ cha ì ꞌwíy ìdhí lò-rónga kpá-kpá nì; mànì dhǐy mí kpa chúddì.’”
Yesu pâ tsátsá mí ddri nì kpa ddiy
(2Pe 5:1-15; Mat 8:2-4; Lwk 5:12-14)
11 Yesu dêy rǎ Yerusalemu mí drǒngó ní bba ò ro, à dà tdè Samariya mí drǒngó ní bba mà ndèymí Galilaya mí ngòw-thù-tsò òluw chow-chow. 12 Cha Yesu dêy shǐ ddì nì bba ó ro, tsátsá mí ddri nì kpa rà ì njuw à nà. Ndrǔ kâ dèy ndì nga óddù.
13 Ndrǔ kâ dey nga jòw: “Yesu, Drǒngóli, njey mà zòw!” 14 Yesu njà kpa ro, à kâ tdrà kpa dhò: “Nyi ra nyì dhò ndrǔ ró dho nà ì nì shǐ Drà njìò nì kpa dè.” Děy ndrǔ dêy rǎ fulè ro, kpa kâ pa ndùw. 15 Chú, kpa kàó ddì li, à njà ndèy ró dhi sî ndèy-ro, à ngû ndèy-ko djò nà, yà ndèy nì Drà dhò madha bbu drǒngó ní ndèy chuw nà. 16 À kâ ndèy ngbò Yesu kotéy gbrǔgbrùní dziylíy djò ro, à kâ madha bbu Yesu dhò. Fúli tdè Samariya mí drǒngó ní bba ó nì li.
17 Chú, Yesu kâ tdrà: “Ddri nì kpa ró dhi pâ ná tdè ndey nzá? Njàddí drrdhiy nì kpa ná ŋangá? 18 Ddì li màddí ddêy nga nzá madha bbúdha djú Drà dhò, ya à tdě ngǎ nú ngéy ní ngòw ó í li ro?” 19 Fú ddiy dzzdjú, Yesu kâ tdrà fú li dhò: “Ngbí nyì ru, ra; nyìmí ùwdha pâ nyi ndey.”
Pey mí nga nì shǐ ddiy
(Mat 24:23-28)
20 Chú, Farisayó kâ dhiy Yesu-tsò ró, “Drà mí Pey mí nga rá shì ŋá nga nà?” À kâ lò ngù kpa dhò: “Drà mí Pey mí nga rò rà shì nzǐ, gbè njàní ndèy nja ndèy nì ddiy níchú. 21 Ndrǔ rà tdrà nzǐ: ‘Nja-nja, ddiy nì i ddiy!’ Ǐngí: ‘Ddiy nì cha ddiy!’ Ddiydhò, nyì nja, Drà ngá Pey mí nga nì nyì kàó.”
22 Fú ddiy dzzdjú, à kâ tdrà ndèy kodjú ì nì rǎ nì kpa dhò: “Ddu rò rà shì ney, nyì rà jì nyì njǎ Ndrǔ-Ddùw ddì ní mǎ pbǔw; chú, nyì rà à njà nzǐ. 23 Ndrǔ rà tdrà nyì dhò: ‘Nyì nja nga changá!’ Ǐngí: ‘Nyì nja nga ingá!’ Chú, nzǐ nyì rǎ fulè, nzǐ nyì kǒw fulè. 24 Ddiydhò, gbè làlà nì nga tda rakpa ròluw, ddiy nì nga tdyi ddì nì nga-tsò tdôw mí nga óddù, pbǔw njàddí nga-tsò tdôw mí nga ò. Ddiy nì ddí fǔchú, Ndrǔ-Ddùw rà tdè ndèymí ddu itsś ś djú.” 25 Chú, ddiy kâ tdè à nzá ndèy drǒ, ddiy kâ ndu nì cho ó ndrǔ gǔ à gùní. 26 Cha Nowa ngá cho ó ndèy njèy tdè ndèy nì lò kíyddà chú rà ndèy njèy, ddiy rà tdè ddí fǔchú Ndrǔ-Ddùw mí ddu-kpà itsś ś djú. 27 Bbalè dêy nga mà nyǔ, mbùdha ní ddiy mà mbǔ; bíy nì ndrǔ dêy ì mà kow kówní, ǐngí ndrǔ bbû tdè ì ków dhò pbǔw Nowa tsùw ngǒ ò mí ddu djò. Fúnga nà, drǒngó ní dji-yà-kpà kâ ko ro, ddiy kâ wánì bíy nì ndrǔ chì chìní. 28 Ddiy rà tdè ddí, gbè Loti ngá cho ó nì níchú: Bbalè dêy nga mà nyǔ, mbùdha ní ddiy mà mbǔ, nga mà dzíy, ddiy-kpà-ónga mà dzíy, nyû mà tdów, dza mà sš ro; 29 chú, Loti kâ rà Sodomu mí drǒngó ní bba óddù mí itsś ś djú, gbè lùmétì ka thì ndanà nì ddiy ngbonì nì kàss-dà níchú, ndèy dêy tdè nì ddiy kô tdè, gbè dji níchú rakpa óddù nì chì tdè bíy nì ndrǔ wá chìní.
30 Ndrǔ-Ddùw rà ndèy dhò mí itsś ś djú, ddiy nì ddí fǔchú ní lò chú, rà ndèy njèy. 31 Fú itsś ś djú, nděyngá dza-djùkpa djú déydha dhò ka thì nì nga ó nì li, dzá ndèymí ddiy mànì li dhò, ddiy rà kà nzǐ à dhò à thú fú ddiy zìy. Gbè nza ó ndèy rà tdè nì li màddí dhò, ddiy rà kà nzǐ ndèy ngú nděy ngà dzá. 32 Nyì ddéy Loti ngá ɦìytss mí lò! 33 Ndèy rà mèy ndèy pbǒ ndèymí djiy rónga nì li, rà ndèymí djiy viy víyní; chú, víyní ndèy rà ndèymí djiy viy nì li, rà ndèymí djiy rónga pbò pbòní. 34 Ma nì tdrǎ nyì dhò kpǔkpǔ: Fú kúw nà, bíy nì ndrǔ rwo nì rà tdè ddì nì ra djú, ddì li ka rà tduw, njàddí li kě, ka rà bbà bbàní. 35 Dhì ní ndrǔ rwo, cha ì nì nga ùw ddǐ nga ó nì: ddì li ka rà tduw, njàddí li kě, ka rà bbà bbàní. 36 Rwo nì kpa rà tdè nza ó: ddì li ka rà tduw, njàddí li kě, ka rà bbà bbànía. 37 Fúnga nà, Yesu kodjú ì nì rǎ ní kpa kâ dhiy à-tsò ró: “Drǒngóli, fú ddiy rá ndèy njèy ŋá nga nà?” Fúnga nà, Yesu kâ lò ngù: “Bu rà tdè mí nga ó, fungá chú, gbè cha chòw níchú ndèy dêy nì, ngbléy ì chuwtèy nà nì rì-kpà rà ì-tsò njuwb.”