Ddiy-rónga ndèy nì pbǒ nì, nyǔꞌwiy mí li
(Mat 6:24)
16
1 Yesu kâ tdrà ndèy kodjú ì nì rǎ nì kpa dhò: “Věy ndèy nì ddiy nà nì li tdè nděyngá ddiy-rónga pbòdha-dja nà ro, ndrǔ rà tdè dàní dà nì lò djú lò tdrà à dhò. Ndrǔ kâ tdrà: ‘Nyǐngá ddiy-rónga pbòdha-dja nì nyìmí ddiy-kpà sǎ sàdha ní.’ 2 Drǒngóli kâ à iy ro, à kâ tdrà à ní: ‘Nyi djú ma ná ŋá lò rř? Gǒ dho ma dhò ya ŋǎchú nyi nì njí njěy mb nà ddiy; ddiydhò, nyi rà tdè ngǎ màtsángá ddiy-rónga pbòdha-dja ní.’ 3 Chú, ddiy-rónga pbòdha-dja kâ tdrà ndèy dhò ndèyníddò: ‘Màtsá Drǒngóli rà màtsá njí dda ma-thokpa óddù ro, ma rá ddu njèy? Ma nì ngǎ klôw nà dziylíy bbìdha mî, ndrǔ-tsò rónga kódha rà do pa ma djò. 4 Áh, ma tsì ŋà ya ddu ma rà njèy ddiy, ya ma vîy ddiy-rónga pbòdha mí dhǐy ro, bbalè rà ma ko ìdhí dza òluw!’ 5 Fúnga nà, à kâ nděyngá drǒngó lǐ ngá bi-djá tsò njuw wá. À kâ dhiy njitsś ò djú li-tsò ró: ‘Màtsá Drǒngóli dhò, à kà ná nyi bbú ddiy thi?’ 6 À kâ lò ngù: ‘Òlívè mí chì kàtínì ngiy ddì.’ Ddiy-rónga pbòdha-dja ngù lò à dhò: ‘Á nja, nyi djú ndèy nì nì mb-ho; zěy drǒ, dow dziylíy djò, ndíy drì-drí nga mb.’ 7 Fú ddiy dzzdjú, à kâ dhiy njàddí li-tsò ró: ‘Nyi kě, ddiy kà ná nyi bbú ddiy thi?’ Fúli ngù lò: ‘Ngǎnò tsi mí gùníyà ngiy ddì.’ Ddiy-rónga pbòdha-dja kâ tdrà fú li dhò: ‘Á nja, nyi djú ndèy nì nì mb-ho mí bi; á ndíy drì-drí nga rù.’ 8 Fúnga nà, Drǒngóli bbû madha, ddiy-rónga pbòdha-dja dhò, nzǐ ndèy nì chǒw ní lò njěy nì, fǔchú à njèy tdè ddiy nyǔꞌwiy nà ddiy mí lò dhò. Ddiy nì ddí fǔchú, í dziylíy djú bbalè-nyú ꞌwìy drǒ ì kàó lò thìdha dhò, ì-dyâsi nà, à da kadha ó ì nì nì ndrǔ djòluw.”9 Yesu kâ tdrà: “Ma nì tdrǎ nyì dhò: ‘Nyì thi lu nyì dhò, í dziylíy djú věy ka nì ndanà nì nzǐ ndèy nì chǒw ní lò nà nì ddiy, ngǎ ddiy-kpà rà tdè ro, ndaní ka ká nyì ko ndruteyró nì bba ò.’ 10 Nzǐ ndèy ka nì uw ddrǎ ní lò ó nì li nì nzǐ ndèy ka nì uw drǒngó ní ddiy ó nì li. Nzǐ ndèy nì chǒw ní lò njěy ddrǎ ní ddiy ó nì li, ndeyli nì nzǐ ndèy nì déy ní lò njěy drǒngó ní ddiy ó nì li. 11 Ya, nyì nì nzǐ ì ka nì uw věy ì nì ddiy-kpà nà nì mbwa mí ndrǔ ro, áyìy dhó nyì uw ndey dìychú ní ddiy ó? 12 Ya, nyì tdè nzǐ nyì nì chǒw ní lò njěy njàddí ndrǔdhí lò ró ro, áyìy ká ná uw ndey, ndèy bbú nyì-thokpa ò nyìdhí ní nì ddiy?”
13 “Njí mí ddì li, ŋá nì màddí kâ nzá ndèy njěy njí drò-dró ní kpa rwo nì dhò: ‘A rà njitsś ò djú li ndrò ndròdha ní, ǐngí à rà luwtéy li jì jìdha ní; ǐngí à-thíy rà pbà njitsś ò djú nì li ró, à rà rwo nì mí li njà víní. Nyì kà nzá nyì njěy njí bba-dja Drà dhò ndèymí mb-ho nà ddì kodjú.’”
Yesu tdrà kpǔkpǔ nì ngéy-ngéy ní lò-kpà
(Mat 11:12-13; 5:31-32)
14 Chú, Farisayó dêy fú lò-kpà wánì rř ro, kpa dêy Yesu gbu gbúdha ní; ddiydhò, kpa jì tdè mb-ho mí lò dhò. 15 Fúnga nà, Yesu kâ tdrà ndrǔ dhò: “Nyì déy nì nyì dhǒ, gbè chǒw ní lò ì nì njěy bbalè-nyú djúddù nì ndrǔ níchú, Drà tsì nyì-thíy ó lò wá. Ddiydhò, drǒ ka nì ì dhò madha bbu nì ndrǔ nì Drà nyú djúddù, gbè ndròní à ndrò nì ddiy níchú.”
16 “Musǎ ngá yǎdha mà, ndèymí Drà ró dho nà ì nì lò těy ndrǔ dhò děy ndèy rà shì nì lò-djò nì kpa mànà, dhí nga dêy tdè pbǔw bàtízò ndèy dêy bbu nì Yohana ngá cho djò. Fú nga djúddù, Drà ngá Pey mí nga mí hwî mí lò-ɦéy ka kâ tdrà ro, njàddí li ndèyníddò nì ndèymí klòw njěy, ndaní ndèy tsûw òmà. 17 Chú, rakpa mà, dziylíy nà rà dà zěy drǒ, gbè Musǎ ngá yǎdha kàó ddrǎ ní lò-tá kà ndèy dǎ nzá zěy níchú.”
18 “Dìyní ndèy dìy nděyngá dza-yà nì li, ya à ngú njàddí kòw kpe ro, fú li ddù ngǎ ndèymí ków mí li nà; dìyní njàddí li dìy nì ɦìytss ní li, ndèy kòw nì li, fú li ddù ngǎ ndèymí ków mí ɦìytss nà.”
Věy ndèy nì ddiy nà nì li mà Lazaro nà
(Ngw 49:17-20; 73:4-5; 19; Lwk 6:20-21)
19 “Ddì nì kpatss̀ tdè ddiy nà věy, à dêy lǎní drǒ ka thì nì drǒ ndèy ró dzẑ nà nì ngbùkàngbù ní rù-kpà kpǐ ro, wánì ddu ró à dêy dey lǎní, yà ndèymí deydha ddí tdè lǎní. 20 Ǎngá kaley-tsò djúddù, zòw-dja ddì nì, ndèy ró dho nà Lazaro nì dêy ɦiy. À-rónga tdè wá dolá nà. 21 À jì tdè ndèy ngûw ndèy věy nděyngá ddiy tdè nì li ngá mězà djúddù ndèy dêy ndèy tdrú nì nyû-gògò-kpà nà. Fú ddiy kàó, tsǐ ddí dêy à ró dolá ónga tdǎ. 22 Chú, fú zòw-dja kâ dhì ro, malayika kâ à tduw Abrahamu ngò djò. Věy ndèy nì ddiy nà nì kpatss̀ ddí kâ ngu dhì ro, ndrǔ kâ à tdòw. 23 Fúnga nà, věy ndèy tdè ddiy nà nì li dêy ndèy nza drǒ kpliy ndèy-ónga nà nì bbuw ò ro, à kâ ndèy nyú ngbi ru ndì nga óddù, à njà Abrahamu, Lazaro tdè à-ngò djú. 24 Fúnga nà, à kâ swa: ‘Bàbá Abrahamu; njey ma-zòw; chó ndeynì Lazaro, à tǒw ndèy-thokpa-djùkpa-tsò dda ò, ndaní à djów ma-dà-rónga; ddiydhò, manì ma nza drǒ í kàss ó.’ 25 Chú, Abrahamu kâ tdrà à ní: ‘Màtsá ngba, á ddéy gò, nyi chùw tdè lǎní ddiy-kpà věy djiy ní nyi tdè mí ddu-kpà ó: Lazaro kě chùw tdè nzadha-kpà. Nja-nja, à thíy-tsò djòw ŋà. Nyi kě, nyi nì nyi nza nzání. 26 Fú ddiy níchú, nyi mà, mà mànà, mà kàó nì kpliy ndèy-ónga nà nì, hwî ndèy-tsò nà nì bbuw. Ingáddù ì jì ì dǎ nyì nì mí nga ò nì ndrǔ dhò ddí, à rà kà nzǐ; nyì nì mí nga óddù ddí ndrǔ kà ì shǐ mànì mí nga ò nzá.’ 27 Věy ndèy tdè ddiy nà nì li kâ tdrà: ‘Bàbá, manì ko nyi-tsò ró, á chó Lazaro màtsá djǎnǐ ngá dza ò, 28 màtsá cha ì ùw Yesu nì kpa nì mb mí nga ò. À rǎ fú lò-ɦéy tdrà pbǔw kpa dhò; ndaní nzánà ndrǔ ddí shǐ í nzadha mí nga ò.’ 29 Chú, Abrahamu kâ fú lò ngù: ‘Djúnyí nì, Musa mà ndèymí Drà ró dho nà ì nì lò těy ndrǔ dhò děy ndèy rà shì nì lò-djò nì kpa mànà, ndaní ndrǔ tdrǎ fú lò-ɦéy kpa dhò: Ddiy kà ndrǔ rř fúkpa!’ 30 Chú, věy ndèy tdè ddiy nà nì li kâ tdrà: ‘Bàbá Abrahamu, fú ddiy kâ nzá. Chú, ya ddì li ngú dhìní ì dhì nì ndrǔ dèddò ro, à shǐ ndrǔ dè; fú nga nà, fúkpa rà ì-jùw li.’ 31 Chú, Abrahamu kâ tdrà à ní: ‘Ya fú kpa rř Musa mà ndèymí Drà ró dho nà ì nì lò těy ndrǔ dhò děy ndèy rà shì nì lò-djò nì kpa mà nzá ro, dhìní ì dhì nì ndrǔ kà-óddù ya ddì li ngbî ndèy ro, kpa rà ùw ddí nzǐ.’”