Víyní ndèy vîy nì towmbù ka chùw ddiy djú lò-ngbòdha
(Mat 18:12-14)
15
1 Nò-tsò-kpà ɦówdha mí li ndèymí cherr-djá nà njûw ì Yesu ròluw gbrǔ dey à chuw rr̀. 2 Fú ddiy lêy Farisayó ní kpa ndèymí Musǎ ngá yǎdha ì nì ndíy nì kpa nà lòw dey ndru: “Í kpatss̀ nì dyasi ní cherr-djá nà. À nì nga nyǔ ddí ndrǔ nà.” 3 Fúnga nà, Yesu kâ í lò-ngbòdha tdrà ndrǔdhò.4 “Ya nyì kàó ddì li nì towmbù nà ngiy ddì, ya ro mà vîy ddì ro, nyi dhò ná ddu njèy? Nyi dhò ná nzǐ drì-drí nga drrdhiy ndèy djú drrdhiy nì bbà wǎ tò, ndaní nyi rǎ fú ndèy vîy nì mèy pbǔw nyi rà chùw ddiy ò? 5 Nyi chùw fú towmbù ro, nyi rà à tduw nyi kùw-djú hwî nì nyi njěy ddiy mí lò dhò, 6 fúnì chú nyi rà ngu bba kàò. Fú ddiy-dzzdjú nyi rà nyi làyiy iy ndèymí nyi dyâsi nà, gbělé nyi rà tdrà ndrǔ dhò: ‘Mà njey hwî, mà chùw màtsá ndèy vîy nì towmbù ŋà.’ 7 Yesu tdrà ndrǔ dhò, manì tdrǎ nyì dhò, fǔchú ddí hwî nì drǒ rakpa ò; ddiydhò, cherr-djá ddì nì lî ndèy-jùw Drà dè ro, à bbà chǒw ní lò ì nì njěy nì bbalè drì-drí nga drrdhiy ndèy djú drrdhiy nì nà, cha ngǎ ì nì Drà dè ngúdha ꞌwíy nà nì.”
Víyní ndèy vîy nì mb-ho ka chùw ddiy djú lò-ngbòdha
8 Yesu tdrà ndrǔ dhò ngéy ní lò-ngbòdha: “Fú ɦìytss ní li rá ddu njèy, ya ǎngá mb-ho ddì nì vîy ddri nì kà-óddù ro? Fú ɦìytss ní li dho ná nzǐ kadha mí nò ró kàss tòw, ndèy tsûw dza-ónga, gbělé ndèy měy ndanà fú mb-ho pbǔw ndèy rà chùw ddiy ò? 9 Fú ddiy dzzdjú, ŋà à chùw ndèymí mb-ho ro, à rà ndèy dyâsi ndèymí ndèy-làyiy nà iy, gbělé à rà tdrà ndrǔ dhò: ‘Nyì ra mà njěy hwî! Ma chùw màtsá víyní ndèy vîy nì mb-ho ŋà.’ 10 Yesu tdrà ndrǔ dhò, Ndrǔ-Ddùw ddí nì tdrǎ nyì dhò fǔchú, Drà ngá malayika nì hwî nà, ddì nì cherr mí li lî ndèy Drà dè ro.”
Víyní ndèy vîy nì ngba ka chùw ddiy djú lò-ngbòdha
11 Yesu ngû ngéy ní lò-ngbòdha tdrà ddíyàchú ndrǔ dhò: “Ddì nì kpatss̀ tdè nděy-ngá kpa ní nzòw nà rwo. 12 Luwtéy ddùw-nì tdrà djǎnì dhò: ‘Bàbá, bbú ma dhò màtsá ddiy fú ddiy kà-óddù děy djiy ní nyi nì ro.’ Fú ddiy lêy djǎnì ndò nděyngá ddiy-ónga fú ddúwní rwo nì kàòluw. 13 Ddrǎ ní ddu dzzdjú, luwtéy ddùw-nì njûw ndèymí ddiy wá, gbělé à rà ngéy ní dziylíy ò. Fulè à shì nděyngá mb-ho sà wá ngǎjìní deydha nà. 14 Ŋà à sà ndèymí ddiy wánì ddiy dzzdjú, drǒngó ní ɦùw chèy fú dziylíy ò. À mà ngǎ ddiy ní ndèy nyu nì. 15 Fú ddiy lêy à rà dhǐy mèy ndèy njěy fú bba ó bba-dja dè, gbělé fú bba-dja chô à rǎ dey nyû bbu nděyngá bíy ní djòw dhò. 16 À jì tdè ndèy nyǔ djòw dêy nyǔ nì nyû-gògò; chú, li rò tdè ngǎ ndèy bbú à dhò nì. 17 À ddêy lò ndèy-ónga nà, à tdrà: ‘Màtsá djǎnì ngá dhǐy-djá thi nì ná ndey nga nyǔ dàní dà ì-rónga djòluw, ma chú nì dhǐ i ngá ɦùw nà! 18 Ma rà bbiydha tà, ka ngu màtsá djǎnì dè, gbělé ma rà shì tdrà à dhò: Bàbá, ma njèy cherr rakpa ó Drà ró ndèymí nyi ró ddí. 19 Ma kâ nzá nyi íy ma ddùwnyi ní; léy ma, gbè nyǐngá ddì nì dhǐy-dja níchú.’” 20 Fú ddiy lêy luwtéy ddùw-nì ngbî ndèy, à ngû ddíyàchú djǎnì dè.
“Děy ddùw-nì tdè ndì ro, djǎnì njà à, ngbíyrŕ à njèy à zòw. Fúnga nà, à kòw ddùw-nì-tsò tdèy, à hò ndèy ddùw-nì chuwtéy ro, gbělé à mbû ddùw-nì, à-rónga dhíydha nà. 21 Fúnga nà, ddùw-nì tdrà djǎnì dhò: ‘Bàbá, ma njèy cherr rakpa ó Drà ró ndèymí nyi ró ddí. Ddiy kà nzá ka íy ma ví nyǐngá ngbaa ní.’ 22 Chú, djǎnì kâ tdrà nděyngá dhǐy mí kpa dhò: ‘Nyì mba lǎní kànzò zěy, nyi thó à rò. Nyì thó ley à thokpa ró ndèymí à koko ró shí nà. 23 Nyì mba dhuw nà nì ndrìytsíy mí ngba, gbělé nyì hwî, ndaní nyì thí, mà nyǔ, ndùw mà njěy hwî. 24 Ddiydho, màtsá í ddùw-nì dhì tdè ŋà; chú, à ngû djiy ní. À vîy tdè; chú, ka chùw à ŋà.’ Fúnga nà, ndrǔ lòw dey hwî njèy.”
25 “Fú ddiy tdè ndèy njěy ro, ddíydjò ní ngba tdè děy nza ò. Ŋà à shì chow-chow bba kàò ro, à rr̀ ngo ndèymí dyì-chuw nà. 26 Fú ddiy lêy, à îy dhǐy mí ddì li rò ro, à dhîy à-tsò ró, cha ndèy nì ndèy njěy bba kàó nì ddiy. 27 Fú dhǐy mí li ngù lò-dziy-djò: ‘Djûnyi ngû ndèy ràmí nga óddù; fú ddiydhò chú, djǎnyi hwì dhuw nà nì ndrìytsíy mí ngba.’ 28 Fú lò dhò, thǒw lòw ddíydjò ní ngba, à gù dzá ndèy tsuw ddiy kpǎ. Fú ddiy lêy àmí djǎnì rà à zìy rútsóddù, à dêy ndèy na à ró. 29 Chú, à ngù lò, à tdrà djǎnì ní: ‘Gǒ rr̀, cho bíy nì dhò ma njèy nyi dhò dhǐy, nzá ma gù nyi bbû ma njěy nì yǎdha rò ddì ddí kpe: chú, nyi bbû ma dhò ddrǎ ní ndrr̀ tá ddí kpe nzá, ma ǎ ma-dyâsi nà. 30 Chú, í ddùwnyi, cha ndèy sà nyìmí djiy ó ddiy wá ngǎjìní ì jì nà nì dhì nzòw ní nzòw nà nì, shì ro, fú ddùwnyi dhò chú, nyi jì dhuw nà nì ndrìytsíy mí ngba.’ 31 Fúnga nà, djǎnì ngù lò à dhò: ‘Ma nì nyi nà wánì ddu ró, màtsá ddiy nì nyìmí ddiy. 32 Chú, ddiy kâ tdè ŋà mà thí nyû mà nyǔ, ndùw mà njěy hwî; ddiydhò, í djû-nyi dhì tdè ŋà, à ngû djiy ní. À vîy tdè, nja-nja ka chùw à ŋà.’”