Ŋaablaxɔ yee ko dzɔ̀nxɔ̀ yee raa goò
21
1 Ayìwà, tà shɔ̀ùn, min ŋaablaxɔ yeu, ko dzɔ̀nxɔ yeu ja. Nìi ŋaablaxɔ jɔ̀naà ko dzɔ̀nxɔ jɔ̀naà, twɛy na gereon nòn, kòòyua tsu naà ni dɛ. 2 Min wɔ̀ fɛnɛɛ sa ja, Yerusalɛmun yee, tɔ jàà bo naɔ jìrànxɔɔ̀ doùn Ŋaablà tɛyn, à mabyɛɔ̀n a ci kɔnɲɔn taan nìi mawɔɔ e re kpir'la raa. 3 Min vu blà sɔn myɛn tɔ boo màsà gbaaniɛn nà, è bà dziàn ci: «Ŋaablà re bùù gba vyamaa siin nèe, nìi y'à tsùùma mòdzin neè ka. À nà e tsuù mɔn è ka, è bà ni è ka. Yè bà à re mòdzin ì, è bà è re Ŋaablà. 4 À nà è jaa ra jaayuà sapɛ tsɛ. San fa bà ni dɛ, shìgoo fa bà ni dɛ, gɛɛy vu fa bà ni dɛ, ɲìnìnbe to fa bà ni dɛ, kàtsu goo jɔna reè sapɛ gereun.»5 Àwà mòò riì tsùuŋnà màsà gbaaniɛn tsɛ, tɔ̀ yeè dzin tɔ̀un ci: «À yɛ nèe, mun goò sapɛ baà yeu.» È dzin kɔn ci: «À sɛbɛn, kàtsu à gooma ì nì, nìì rèe fyɛɔ, yè bà sààben.» 6 Tà shɔ̀ùn kɔn, è dzin mun na ci: «À fau nòn. Mun nì Alifà ko Omegà, Dziikuan ko Bònèmaa. Mìnoo ye ba ni mòò riì rà, mun nà jaamabee donkungɔra yua sìn tɔ̀ ra maana. 7 Mòò riì ye ba dzibaa, tɔ nà tɔ̀ tàrà shɛn. Mun nà bà à re Ŋaablà, è bà mun dzin. 8 Ŋà nìi shiɲaàn nèè, ko ɲɛynabɛy reè, ko Ŋaablà cɛn goo fa reè, ko mòdzìn vu reè, ko ɲànmɔ̀ɔ̀bè fa reè, ko tɔ̀gòòtsi reè, ko ɲɔ̀n kɔ reè, ko doo de reè sapɛ, twɛy nà bè sà blàa ko gìrìbià ɲàn, tɔ̀ niì saàn fiiraa.
Yerusalɛmun yee raa goò
9 Tɔ̀un, gooɲaan latan neè yukuun ɲɛɛ̀nun nìi reè tsyɛɔ̀n, twɛy kuɔn mɛ̀rɛ̀kɛ ɲɛ̀ɛ̀nun nìì reè suun, twɛy soo yeè nà gooma mun ka, è dzin mun na ci: «Nà, mun nà kɔnɲɔn taàn kpàdè wo ra, sààtòmòìriɛ rè tààn.» 10 È bè mun ka n akir'là ɲàn tɔ̀un jèn gbààn bla tsɛ, è wɔ̀ fɛnɛɛ kpàdè mun na, nìi Yerusalɛmun, tɔ jàà bo naɔ Ŋaablà tɛyn jìrànxɔɔ̀ doùn. 11 Ŋaablà nɔɔrɔɔ̀ n'a tsɛ, è bà dendeèn a ci kpààmà ge kpàxɔù. Ɔ̀ɔn, à ni a ci kpàà riì kir'là ci yasipe kpaa, à jaà ni yereyere a ci vɛɛrɛ. 12 Sin gbaan brisi y'à laguruɔ̀, dzii teeŋ fii yè bà ni à ra. Mɛ̀rɛ̀kɛ teeŋ fii tsìiŋnà twɛy dzii rèè rà, tsoo ì yè bà sɛbɛɔ̀n dzii rèè tsɛ, nìi Isirayɛlidzin neè tsu teeŋ fiɛ̀ tsoo rèè. 13 Dzii zhììgi ni kir'la kèrè, zhììgi ni kòòdùù tɔɔn kèrè, zhììgi ni wòròdùù tɔɔn kèrè, zhììgi yeè bà ni bwèydo re kèrè. 14 Wɔ̀ɔ̀ sian dzun baɔ̀ dzunbama teeŋ fii tsɛ, tsoo teeŋ fii yè bà sɛbɛɔ̀n twɛy dzunbama rèè tsɛ, nìi sààtòmòìriɛ rè kɛɛradzin teeŋ fii rèè tsoò.
15 Àwà, nìi goomaa mun ka, gè gɔɔn gè sɛnuma na kuɔn tɔ̀ suun, è bà ni wɔ̀ɔ̀ gɔ̀n, à y'à dzii rèè gɔ̀n ko à sian. 16 Wɔ̀ɔ̀ si nààleèn sapɛ na sɛ̀rɛ̀n. À si gbààn ko à si kuruiriɛ̀ sapɛ gbanbee na soo. À y'à gɔ̀n tɔ̀un, à y'à jà à si gbàan, ko à si kuruiriɛ̀, ko à gbànbee sapɛ sɛ̀rɛ̀n. È sapɛ kilomɛtɛrɛ gbaa fii fii ko cààmoò nààlen nààlen tsurua. 17 È sian gbànbee gɔ̀n, à y'à jà tɔ mɛtɛrɛ jaa mùey ko tsyeùn ko dzin fiib, mòdzin naa gɔ̀ùn' n kur'la mɛ̀rɛ̀kɛɛ̀ rè. 18 Sian na jiɔ̀ ko yasipe kpaa ka, wɔ̀ɔ̀ yè bà sɛn'na yɛ̀r'la yɛ̀r'la tèrèkee, a ni yereyere a ci vɛɛrɛ. 19 Wɔ̀ɔ̀ sian dzunbama rèè mà na wɔɔ kpààmà ge kpàxɔɔ̀ kaatsià sapɛ ka. À jɔ̀naà tɔ yasipe kpaa, à fiiraa, tɔ safiri kpaa, à zhììgìraa, tɔ kaliseduwani kpaa, à nààlènaa, tɔ emerodzi kpaa, 20 à nùnaa, tɔ sariduwani kpaa, à tsùnmɛ̀naa, tɔ kɔrinalini kpaa, à ɲɛ̀nùnaa, tɔ kirisolitsi kpaa, à ŋaalonaa, tɔ bèrìlì kpaa, à kyèèrònaa, tɔ topazhi kpaa, à tsyeunaa tɔ kirisoparasi kpaa, à teeŋ sɔnaa, tɔ yasɛntsi kpaa, à teeŋ fiiraa yè bà ametsisite kpaa. 21 Wɔ̀ɔ̀ dɔ̀nmàdzii teeŋ fiɛ̀ faɔ̀ ko fyɛɛdzinma ge wùù wuu teeŋ fii ka, dziɛ̀ soo soo sapɛ fyɛɛdzin soo soo. Wɔ̀ɔ̀ da blàa sapɛ sɛn'na yɛ̀r'la yɛ̀r'la tèrèkee, è bà ni yereyere a ci vɛɛrɛ.
22 Mun na Ŋaa blabe gba blà pɛn jà à doùn waa, kàtsu Tsìfaà, Dzitsi Ŋaablà tà ko sààtòmòìriɛ, twɛy rìì y'à Ŋaa blabe gba blà. 23 Àwà, wɔ̀ɔ̀ màgoo na ni bwèy ko kuu pɛn na twɛy vyeè yè bà ni à vi waa. Ŋaablà nɔɔrɔɔ̀ rìì y'à ɲanviɔ̀, sààtòmòìriɛ yè bà à fitsina vyee. 24 Kun neè mòdzian nà jìì à vyeè rà, dzɔ̀nxɔɔ̀ màsa rèè yè e nɔɔrɔɔ̀ dɔ̀n à doùn. 25 À wɔ̀ɔ̀ dzii rèè fa tsyee jà bòroon ko fen, kàtsu dzɔn fa tsì waa. 26 È nà dɔ̀n à doùn kun neè mòdzian nɔɔrɔɔ̀ ko è blàbee ka. 27 Goo nootsi pɛn fa dɔ̀n mɔn, Ŋaablà cɛn goofabaa fa dɔ̀n mɔn, doodebaa to fa dɔ̀n mɔn, fɔ nìì reè tsoo sɛbɛɔ̀n sààtòmòìriɛ rè jaamabee sɛbɛɛn doùn.