22
1 Àyìwà, mɛ̀rɛ̀kɛɛ̀ yè jaamabee bayu sɔn kpadè mun na tɔ̀un, tɔ̀ jaà ni yereyere a ci vɛɛrɛ, è bà boò Ŋaablà ko sààtòmòìriɛ rè màsà gbaaniɛn dzuun.2 Wɔ̀ɔ̀ da blàa fi rɔn, baà bìɛ. Baà kàjaa fii fi, jaamabee gɔ̀ɔ̀ku xeo nìi dzin jaa teeŋ fii faa jiɛ doùn, kuu soo soo sapɛ dzin jaa soo, à tsira rèè yè bà kun neè mòdzian jan faa.3 Danga pɛn fa bà ni dɛ. Ŋaablà ko sààtòmòìriɛ rè màsà gbaaniɛn nà bà ni à doùn, à re jòn nèè yè bà faagoò faa à re.4 È nà à jaakɔrɔn jà, à tsoò yè bà ni è ten neè rà.
5 Dzɔn fa tsì dɛ, mòò màgoo to fa ba ni fìtsìnà vyee ko bwèè vyee ra dɛ, kàtsu Tsìfa Ŋaablà nà vyevyeè bo è re, yè màsàbee fa watsi sen ɲɛn watsi tsɛ.
6 Mɛ̀rɛ̀kɛɛ̀ yè dzin mun na kɔn ci: «Nèe gooma ree reè fyɛɔ, yè bà sààbèn goòma ì. Goo nìi nà fa sani dɛyn, mùn Tsìfa Ŋaablà riì yè e re kɛɛra reè akiri kɔ̀ɔ, tɔ̀ yeè e re mɛ̀rɛ̀kɛɛ̀ ka nau, è nà tɔ̀ kpàdè e re jòn nèè rà.» 7 À yɛ, Yesù ci: «Sani dɛyn, mun nà nà ! Mòò riì nèe kìtaabu ree kɛɛra goòmà rèè mar'la, tɔ̀ raa wùbeu !"
Yùxanà rè shɛɛrɛbee gooma lataan
8 Mun Yùxanà, mun twɛy goo rèè myɛ̀un, mun yè è jà. È myɛ̀unmaà, mun yè è jà, mɛ̀rɛ̀kɛ rìi yè è kpàdèu mun na, min kunun gban ji tɔ̀ bììn, ci mun nà n kuu m'a blàbe. 9 È dzin mun na ci: «Àyi, m'a tɔ̀ fa waa ! Mun sa wo faagoofasià sɔn ni, wo neema kɛɛra reè kòòsi, ko nèe kìtaabu rèe gooma reè màràbaa rè kòòsi. Ŋaablà rii blàbe !» 10 È dzin mun na kɔn ci: «Maà nèe kìtaabu rèe kɛɛra goòmà rèè mɛnɛn waa. È watsi tsyɛnbeò. 11 Wo mòò riì ni terenbɛybe tsɛ, a maxɔbe tɔ̀ mà. Mòò riì to ni goo nooŋma tsɛ, è maxɔbe tɔ̀ mà. Mòò riì ni terenbe tsɛ, tɔ̀ yeè e maxɔbe tɔ̀ mà. Nìi sa ni fɛnɛbe tsɛ, tɔ̀ yeè e maxɔbe tɔ̀ mà.»
12 Yesù ci: «À yɛ, sani dɛyn, mun nàa ! Mun ne sàr'là ni mun suun, mun nà mòdzian soo sookɔɔn sapɛ sarà, è kòrò è fadziɛ ka.» 13 «Mun ni Alifà ko Omegà, Jɔ̀naà ko Lataan, Dziikuan ko Bònèmaa.
14 Nìì reè yè e re vya rèè fòò fyɛɛ̀, yè bà ni dzi jaamabee gɔɔ̀ dzian sɔn tarà ɲɔn, yè dɔ̀n wɔ̀ɔ̀ doùn à dɔ̀nmà dzii reè rà, twɛy raa wùbeu ! 15 Nìì reè nà to da rɔn, twɛy rìì siin: kɛ̀kɛ̀ɛ̀y gòò fa reè, tɔ̀ gòò fa reè, goo nooŋma fa reè, vui fa reè, ɲɔ̀n gòò fa reè ko nìì reè sapɛ ni doò fyɛ̀'un.
16 Mun Yesù, min ne mɛ̀rɛ̀kɛɛ̀ kau, è bà ni be nèe shɛɛrɛbe ree bo ɲɛynamoo kur'lèè tsɛ ye re. Mun màsà kpiri Dawudà màdoon rìì, à tsua dziàn, dzɔ̀n vì dziɛ rè swɛyn denkɔɔn.» 17 Àyìwà, Ŋaablà re Dzia ko kɔɲɔn taàn, twɛy yè dzin ci: «Nà !» Mòò riì to ye gooma ree myɛ̀n, tɔ̀ tsìfa sa yeè dzin ci: «Nà.» Mìnoo ye ba ni mòò riì rà, à tsìfa yè nà. Mòò riì ye ba gaa jaamabee yuà rà, à tsìfa yè sɔn sen min maana maànà.
18 Àwà, m'a dè fyɛɛ̀, ci nìì reè sapɛ toro nà ji nèe kìtaabu rèe doùn kɛɛra gooma rèè ɲàn, mòò riì ye sɔn ba à tɛ̀y, gooɲaan niì reè gooma deò kìtaabu rèe doùn, Ŋaablà nà twɛy bà tɔ̀ tsìfa raà tɛ̀y. 19 Mòò riì to ye sɔn bo è ra, jaamabee gɔ̀ɔ rìi ko wɔ̀ fɛnɛ riì goo deò kìtaabu rèe doùn, Ŋaablà sa nà tɔ̀ tsìfa nìn bo twɛy ɲàn.
20 Mòò riì twɛy goo rèè shɛɛrɛbe faa, tɔ̀ ci: «Ɔ̀ɔn, sani dɛyn mun nàa !» Àmiina, nà Tsìfa Yesù !
21 Arì she, Tsìfa Yesù yè e ɲan wùɔ kpàdè e sapɛ ra !