Yudè
rè sɛbɛn faumaà
Sɛbɛɛn kaɔ nìì reè rè, ko dzwɛɛ̀
1
1 Mun Yudè, Yesù Kirisà rè jòn kpir'la, ko Yàkubà keresia, nèe mun ne sɛbɛn, è sìn Fà Ŋaablà re mòdzin kiriuma rèè rà, à twɛ̀y nìì reè kɛ̀niɔ̀n, è bà è màrà tsùuŋnà Yesù Kirisà rè. 2 Arì she, Ŋaablà yeè twɛy màtsur'la, ko jaanciàn, ko kɛ̀nbààbee sìn e ra giri !Yudè nìi dèu kààmoo doo de reè tsɛ
3 Mun ne kɛ̀niunma rèè, mùn sa dzyèeŋnà tsii rìi mà, mun sàò na ni min goo sapɛ ko e kuru fa, min sɛbɛn ka ye re tɔ̀ kàjaa tsɛ. Ŋà, à bàu mun mà fààn, min nèe sɛbɛn nee ka ye re, m'a ka ye màxɔ̀n ye yè bà ni ɲɛynaà kaà fa, tɔ̀ niì sìun Ŋaablà re mòò rèè rà jaa soo pe. 4 È ɲɛn à tsɛ, mòdzìn ì dɔɔ̀n ye sàn dzuun, nìì reè na shia Ŋaablà jɔɔn waa, Ŋaablà re Goomaa nìì reè kitsi goo deò nòn, fɔ dan. Twɛy mòdzìn neè ɲe re Ŋaablà ɲanwùɔ goò lakere baɔ̀ seebɛybe goo, yè bà e dziira tsɛɛ̀ Yesù Kirisà rà, mùn Kùntsii soo pee ko mùn Tsìfaà.
5 Àwà mun sào ni min ye taa to goo sɔn ne, ye to kɛ̀sɛɛn ye ba à sapɛ tɔ nòn. Nìi yɛ, ci Tsìfaà rè e re mòò rèè tsi boumaà shɔ̀ùn Misiran jamaan doùn, nìì reè na ɲɛn à ra waa, à twɛy vuu. 6 Mɛ̀rɛ̀kɛ nìì reè na to e re kùntsììbee tsiìma nɔn waa, ŋà è bou e yɛr'là gbaa doùn, twɛy shì ji tsuuŋma ni jɔ̀rɔ̀kɔ ì ka kudɛyn tsitsiì brìsià ɲàn, yè kitsia jisee blaa màshu ji tsuù. 7 Sodomùn, ko Gomɔrɔ̀ ko e dzii re wɔ rèè sa tɔ̀ goò tsuru fau. È ɲànmɔ̀ɔ̀be fau, nìi yɛ kpiri ko kpiri gaa. Tà tsuru, sà dzibɛɛ byɛnbee bàu è nìn, è ka mòdzian sapɛ latsi.
8 Tɔ̀ soo tsuru taki, twɛy mòdzin neè sa gbaɔn e re sìràn goo reè kpɛyn, yè e gɔɔ̀n noo ko tɔ̀ ka. Yè e nɔn Tsìfaà rè kùntsììbee rè, yè jìrànxɔɔ̀ nɔɔrɔ ge reè tsoo bara. 9 Tɔ̀ to y'à tàrà, arì Mikayilù, mɛ̀rɛ̀kɛ rèè kùntsii blàa, watsi riì bwèy tà ko Sànwɔbaà na e si sɔ̀ɔn yè ba e si sɔ̀swɛɛ̀ Musà fùàn tsɛ, à na e kuùn xɔbe è kitsi kunun à tsɛ, à y'à tsoo bara goòmà ì ka waa. À dziun ni bàsɔùn ci: «Tsìfaà y'à koron !» 10 Twɛy mòdzin neè na gè nìì reè tɔ̀ waa, è re tsoo bara goòmà rèè wɔɔ twɛy rìì tsɛ. È ko e dzwɛka akir'la to nìi tɔ̀, twɛy rìì yè bar'la. 11 È raa barau ! È ɲɛn à tsɛ, è Kayinìn dɔ̀n shià seun, ɲɛyn goo yè bà saabu, yè e san fìrì a ci Bàlaamùn. È màbaunmaà doùn a ci Korè raà tsuru, è barau. 12 Ye kɛ̀nbààbè ɲwɛyn nìì reè ɲɔɔ̀n esire, ye rìì twɛy bar'la. Twɛy ɲwɛyn nèè ko'ùn, seey soo na ni è jaa ra, è ɲɔn cɛɛ̀n, è na ŋòoŋnà. È ni a ci ŋaa tsi ŋaa bɛy, fyɛɛn nìi sen beè. È ni a ci gɔ̀ɔ̀ku ì, dzin na jaà è ra e dzin bwèy. È san jaa fii fau, è ko e jii rèè yè fù. 13 È ni a ci kòòjua fù tèynkɔɔn ku reè, è kànkankɔɔn yè è seeyragoo reè bo jia. Yè bà ni a ci swɛyn tsyeerekɔɔn ì, tsitsii tsìù bian nì yè è màshu ji tsuuŋnà kudɛyn.
14 Nìi Enɔkì, Adamà tsua dzin ɲɛɛnunaa, tɔ̀ sa kɛɛrabee fau, è nèe gooma ree dè ɲɛn ye rìì tsɛ ci: «Tsìfaà nàuma siin e re mɛ̀rɛ̀kɛ̀ rèè gbaayirika ka, 15 è bà ni kitsia kùnùn mòdzian sapɛ tsɛ. Nìì reè na shia Ŋaablà jɔɔn waa, è kitsi mɛɛy twɛy sapɛ tsɛ e faadzii ɲaan neè kamà, tà ko Ŋaablà jɔɔn shiɲaanbɛybeè doùn, twɛy gooɲaan fa reè gooma xɔù gè o ge dèu.» 16 Kudɛyn ŋùnùnŋùnùn vu na do jàa ye rìì dzu e re jaamabee kamà, e taama to na dzi. È gbaɔn e yɛr'la kur'la goo ɲaan neè rìì kpɛyn, gooma bla blaa yè bà ni è dzu. Yè nɛɛ̀n wɔɔ̀ mòdzian dzuun e yɛr'la nàfaà kamà.
Yudè rè làtsìì latan neè
17 Ŋà nìi ye, mun ne kɛ̀niunma rèè, mùn Tsìfa Yesù Kirisà rè kɛɛradzin neè nìi dèu dan, ye taa to tɔ̀ re. 18 È na dziàn ye ra ci: «Watsi latan neè ɲàn, ɲànŋwɛ̀ynfabaa ì nà bà ni, è yɛ̀r'leè kur'la goo ɲaan neè yè bà è kuru kuɔn è ɲɛn è re Ŋaablà jɔɔn shiɲaanbɛybeè tsɛ. 19 À ye rìì. È modzian fi vyɛɛ̀, è adamadzin mòdzin maana ì, Ŋaablà re Dzia na ni è ɲan. 20 Ŋà nìi ye, mun ne kɛ̀niunma rèè, ye fààn wɔ e yɛrɛ ɲan è ɲɛn ye re ɲɛyna fɛnɛɛ tsɛ. Ye Ŋaablà mafyɛ̀n à re Dzi Fɛnɛɛ baraka rɔ̀n. 21 Ye to Ŋaablà re kɛ̀nbààbee doùn, ye bà ni mùn Tsìfa Yesù Kirisà rè màtsur'la màshua rà, jaamabe dziù dòbɛɛ raa.
22 Nìì reè yè e cir'la, ye màtsuru twɛy rà. 23 Ye swey tòfa tsi sàà rà. Swey, e shiuma yè màtsuru twɛy rà. Arì è vura vyaa, è gɔɔ̀n ɲàn gooɲaan tɔ̀ niì nooŋnà, ye tɔ̀ sa xɔbe e ma.
Yudè tsoo dzi niì ɲɛun Ŋaablà tsɛ
24 Arì she, nìi dzia ye màrà, è ye tààn mɛɛ̀ mà, è ye jààkì bɛy tsiiŋma to taamadzibeè ɲàn nɔɔrɔɔ̀ jaaterema, 25 Ŋaablà soo pee, mùn Tsibaà, Yesù Kirisà, mùn Tsìfaà, tɔ̀ baraka ɲan, nɔɔrɔɔ̀, ko màsàbee, ko dzibaabee, ko kùntsììbee, twɛy yè ɲɛn à tsɛ è sen fɔ dan, è nà dòònun nà, è be suu fɔ watsia sapɛ dzu. Àmiinà !